ພັດທະນາຕະຫຼາດທຶນລາວໃຫ້ມີປະສິດຕິພາບ

412 29 ມ.ນ. 2019 ຂ່າວໜ້າ​ໜຶ່ງ
ພັດທະນາຕະຫຼາດທຶນລາວໃຫ້ມີປະສິດຕິພາບ

    ກອງ​ປະ­ຊຸມ​ຄະ­ນະ​ກຳ­ມະ­ການ​ຄຸ້ມ​ຄອງ​ຫຼັກ​ຊັບ (ຄຄຊ) ຄັ້ງ​ທີ I ປະ­ຈຳ​ປີ 2019 ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ແລະ ປະ­ທານ ຄຄຊ ມີ​ທ່ານ ສອນ​ໄຊ ສິດ​ພະ​ໄຊ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ ຮອງ​ປະ­ທານ ຄຄຊ ບັນ­ດາ​ຄະ­ນະ​ກຳ­ມະ­ການ​ຄຸ້ມ​ຄອງ​ຫຼັກ​ຊັບ ຈັດ​ຂຶ້ນ​ວັນ​ທີ 27 ມີ­ນາ 2019.

    ກອງ​ປະ­ຊຸມ​ຄັ້ງ​ນີ້ ໄດ້​ຕີ​ລາ­ຄາ​ຜົນ­ສຳ­ເລັດ​ກອງ​ປະ­ຊຸມ ຄຄຊ ຄັ້ງ​ທີ III ປະ­ຈຳ​ປີ 2018 ເຊິ່ງ​ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ການ­ເຄື່ອນ­ໄຫວ ວຽກ​ງານ​ຄຸ້ມ​ຄອງ​ຫຼັກ​ຊັບ​ຢ່າງ​ຕັ້ງ­ໜ້າ ໃນ​ນັ້ນ ອັນ​ພົ້ນ​ເດັ່ນ​ແມ່ນ​ສຳ­ເລັດ​ການ​ສ້າງ​ນິ­ຕິ​ກຳ​ລຸ່ມ​ກົດ­ໝາຍ ຈຳ­ນວນ 3 ສະ­ບັບ ສຳ­ເລັດ​ການ​ພິ­ຈາ­ລະ­ນາ​ອະ­ນຸ­ຍາດ​ໃຫ້​ບໍ­ລິ­ສັດ ໄຟ­ຟ້າ-ນ້ຳ​ງື່ມ 2 ຈຳ­ກັດ ອອກ​ຈຳ­ໜ່າຍ​ຮຸ້ນ​ກູ້​ຢູ່​ປະ­ເທດ​ໄທ ແລະ ບໍ­ລິ­ສັດ ຜະ­ລິດ-ໄຟ­ຟ້າ​ລາວ ມະ­ຫາ­ຊົນ ອອກ​ຈຳ­ໜ່າຍ​ຮຸ້ນ​ກູ້ ສ່ວນ​ທີ່​ເຫຼືອ​ຢູ່​ປະ­ເທດ​ໄທ ແຕ່​ຢ່າງ­ໃດ​ກໍ່​ຕາມ ຍັງ​ຈະ​ສືບ­ຕໍ່​ເອົາ­ໃຈ­ໃສ່​ພັດ­ທະ­ນາ​ຕະ­ຫຼາດ​ທຶນ​ລາວ​ໃຫ້​ມີ​ປະ­ສິດ­ທິ­ພາບ ມີ​ຄວາມ​ໜ້າ​ເຊື່ອ​ຖື ແລະ ມີ​ມາດ­ຕະ­ຖານ​ສາ­ກົນ ກອງ​ປະ­ຊຸມ​ໄດ້​ມີ​ການ​ປຶກ­ສາ​ຫາ­ລື​ບາງ​ໜ້າ​ວຽກ​ທີ່​ສຳ­ຄັນ ໂດຍ​ສະ­ເພາະ ໄດ້​ມີ​ການ​ລາຍ​ງານ​ຜົນ​ການ­ຈັດ­ຕັ້ງ​ປະ­ຕິ­ບັດ ມະ­ຕິ​ກອງ​ປະ­ຊຸມ​ສຸດ​ທ້າຍ​ຂອງ​ປີ 2018 ຮັບ­ຮອງ​ນິ­ຕິ​ກຳ​ໃຕ້​ກົດ­ໝາຍ​ວ່າ​ດ້ວຍ​ຫຼັກ​ຊັບ 2 ສະ­ບັບ ຂໍ້​ຕົກ­ລົງ​ວ່າ​ດ້ວຍ​ສະ­ພາ​ບໍ­ລິ­ຫານ​ຂອງ​ບໍ­ລິ­ສັດ​ຈົດ​ທະ­ບຽນ (ສະ­ບັບ​ປັບ­ປຸງ) ຄຳ​ແນະ­ນຳ​ກ່ຽວ​ກັບ​ການ​ຄຸ້ມ​ຄອງ​ບໍ­ລິ­ຫານ​ສຳ­ລັບ​ບໍ­ລິ­ສັດ​ຈົດ​ທະ­ບຽນ ຄວາມ​ຄືບ​ໜ້າ​ໃນ​ການ​ປັບ­ປຸງ​ກົດ­ໝາຍ​ວ່າ​ດ້ວຍ​ຫຼັກ​ຊັບ (ສະ­ບັບ​ປັບ­ປຸງ) ແລະ ການ​ປັບ­ປຸງ​ຕົວ​ຊີ້​ວັດ​ຂອງ​ບົດ​ລາຍ​ງານ​ການ​ດຳ­ເນີນ​ທຸ­ລະ​ກິດ​ກ່ຽວ​ກັບ​ການ​ປົກ​ປ້ອງ​ຜູ້​ລົງ­ທຶນ​ລາຍ​ຍ່ອຍ.

    ເພື່ອ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ຄຸ້ມ​ຄອງ​ຫຼັກ​ຊັບ​ໃຫ້​ໜັກ​ແໜ້ນ​ເຂັ້ມ­ແຂງ​ກວ່າ​ເກົ່າ ທ່ານ​ປະ­ທານ ຄຄຊ ໄດ້​ມອບ​ໃຫ້​ຮອງ​ປະ­ທານ ຄຄຊ ຜູ້​ປະ­ຈຳ­ການ ແລະ ສຳ­ນັກ­ງານ ຄຄຊ ເປັນ​ກົງ­ຈັກ​ຊ່ວຍ​ວຽກ​ຂອງ ຄຄຊ ໃນ​ການ​ພັດ­ທະ­ນາ​ຕະ­ຫຼາດ​ທຶນ ຈົ່ງ​ຮີບ​ຮ້ອນ​ປະ­ສານ​ສົມ­ທົບ​ກັບ​ຂະ­ແໜງ­ການ​ກ່ຽວ­ຂ້ອງ​ຕ່າງໆ ຜັນ​ຂະ­ຫຍາຍ​ເນື້ອ​ໃນ​ຈິດ­ໃຈ​ກອງ​ປະ­ຊຸມ​ໃຫ້​ເປັນ​ໜ້າ​ວຽກ​ລະ­ອຽດ ແລະ ໃຫ້​ເປັນ​ຮູບ​ປະ​ທຳ​ດ້ວຍ​ຈິດ­ໃຈ​ເປັນ​ເຈົ້າ​ການ ແລະ ຄວາມ​ຮັບ­ຜິດ­ຊອບ​ສູງ ສາ­ມາດ​ນຳ­ໄປ​ຈັດ​ຕັ້ງ​ປະ­ຕິ­ບັດ​ໄດ້​ຢ່າງ​ແທດ­ເໝາະ ແລະ ມີ​ປະ­ສິດ­ທິ­ພາບ​ສູງ ບົນ​ພື້ນ­ຖານ​ເພື່ອ​ຜົນ​ປະ­ໂຫຍດ​ລວມ​ຂອງ​ຊາດ.

ຂ່າວທີ່ກ່ຽວຂ້ອງ