ຂ່າວຫຼ້າສຸດ

ລາວ-ຫວຽດນາມ ຮ່ວມມືດ້ານແຮງງານ ສະຫວັດດີການສັງຄົມ

735 29 ມ.ນ. 2019 ຂ່າວໜ້າ​ໜຶ່ງ
ລາວ-ຫວຽດນາມ ຮ່ວມມືດ້ານແຮງງານ ສະຫວັດດີການສັງຄົມ

    ກອງ​ປະ­ຊຸມ​ລັດ­ຖະ­ມົນ­ຕີ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ລາວ-ຫວຽດ­ນາມ ຄັ້ງ​ທີ VI ຈັດ​ຂຶ້ນ​ວັນ​ທີ 28 ມີ­ນາ 2019 ຢູ່​ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ໂດຍ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ລາວ ແລະ ທ່ານ ດ່າວ ຫງ໋ອກ ຢຸງ ລັດ­ຖະ­ມົນ­ຕີ ກະ­ຊວງ​ແຮງ​ງານ-ເສຍ​ອົງ­ຄະ ແລະ ສັງ­ຄົມ​ຫວຽດ­ນາມ.

    ກອງ​ປະ­ຊຸມ ສອງ​ຝ່າຍ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະ­ພາບ​ການ​ພັດ­ທະ­ນາ​ໃນ​ຂົງ­ເຂດ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ຂອງ​ແຕ່​ລະ​ປະ­ເທດ ໄດ້​ຢັ້ງ­ຢືນ​ໃຫ້​ເຫັນ​ເຖິງ​ຄວາມ​ສາ­ມັກ­ຄີ ແລະ ການ​ຮ່ວມ​ມື​ອັນ​ສະ­ໜິດ​ແໜ້ນ ນອກ​ນັ້ນ ສອງ​ກະ­ຊວງ​ຍັງ​ໄດ້​ພົບ​ປະ​ສອງ​ຝ່າຍ ແລະ ແລກ­ປ່ຽນ​ຂໍ້​ມູນ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ສອງ​ປະ­ເທດ ແລະ ຜົນ­ສຳ­ເລັດ​ດ້ານ​ວຽກ​ງານ​ຮ່ວມ​ມື​ຂອງ​ສອງ​ກະ­ຊວງ​ໃນ​ໄລ­ຍະ​ຜ່ານ​ມາ ແລະ ທິດ​ທາງ​ແຜນ­ການ​ຕໍ່­ໜ້າ ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ ການ­ຈັດ­ຕັ້ງ​ປະ­ຕິ­ບັດ​ເນື້ອ​ໃນ​ບົດ​ບັນ­ທຶກ​ກອງ​ປະ­ຊຸມ​ລັດ­ຖະ­ມົນ­ຕີ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ລາວ-ຫວຽດ­ນາມ ຄັ້ງ​ທີ V ປີ 2017 ຜົນ­ສຳ­ເລັດ​ກອງ​ປະ­ຊຸມ​ວິ­ຊາ​ການ​ກ່ຽວ​ກັບ​ວຽກ​ແຮງ​ງານ ແລະ ຈັດ​ຫາ​ງານ ວຽກ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ວຽກ​ສະ­ຫວັດ­ດີ​ການ​ສັງ­ຄົມ ກໍ​ຄື​ກອງ​ປະ­ຊຸມ ຄັ້ງ​ທີ 2 ຂອງ​ຄະ­ນະ​ຮ່ວມ​ມື​ປະ­ຕິ­ບັດ​ສັນ­ຍາ​ວ່າ​ດ້ວຍ​ການ​ຮ່ວມ​ມື​ດ້ານ​ແຮງ​ງານ​ລາວ-ຫວຽດ­ນາມ ກອງ​ປະ­ຊຸມ​ໄດ້​ແລກ­ປ່ຽນ​ຄວາມ​ຄິດ​ເຫັນ ກ່ຽວ​ກັບ​ຂໍ້­ຄົງ­ຄ້າງ​ທີ່​ຈະ​ຕ້ອງ​ໄດ້​ຮ່ວມ​ມື​ກັນ ສືບ­ຕໍ່​ສົ່ງ­ເສີມ​ການ​ຮ່ວມ​ມື​ໃນ­ຕໍ່­ໜ້າ​ໃຫ້​ມີ​ປະ​ສິດ­ທິ​ຜົນ.

    ນອກ​ນີ້ ລັດ­ຖະ­ມົນ­ຕີ​ສອງ​ກະ­ຊວງ​ເຫັນ​ດີ​ເປັນ​ເອ­ກະ​ພາບ​ຕໍ່​ເນື້ອ​ໃນ​ບົດ​ລາຍ​ງານ​ຜົນ­ສຳ­ເລັດ ກ່ຽວ​ກັບ​ການ​ຮ່ວມ​ມື​ດ້ານ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໃນ​ໄລ­ຍະ​ປີ 2017-2019 ແລະ ແຜນ­ການ​ຮ່ວມ​ມື​ໄລ­ຍະ 2019-2021 ສຳ­ລັບ​ກອງ​ປະ­ຊຸມ​ລັດ­ຖະ­ມົນ­ຕີ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ລາວ-ຫວຽດ­ນາມ ຄັ້ງ​ທີ VII ຈະ​ຈັດ​ຂຶ້ນ​ທີ່​ຫວຽດ­ນາມ​ໃນ​ປີ 2021.

    ຕອນ​ທ້າຍ​ກອງ​ປະ­ຊຸມ ຝ່າຍ​ລາວ​ຍັງ​ໄດ້​ປະ­ດັບ​ຫຼຽນ​ໄຊ​ມິດ­ຕະ­ພາບ​ໃຫ້​ບັນ­ດາ​ກົມ​ກອງ​ຂອງ​ກະ­ຊວງ​ແຮງ​ງານ ເສຍ​ອົງ­ຄະ ແລະ ສັງ­ຄົມ​ຫວຽດ­ນາມ 16 ກົມ​ກອງ ແລະ ຝ່າຍ​ຫວຽດ­ນາມ ກໍ​ໄດ້​ປະ­ດັບ​ຫຼຽນ​ໄຊ​ມິດ­ຕະ­ພາບ​ໃຫ້​ບັນ­ດາ​ກົມ​ກອງ​ຂອງ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ລາວ 11 ກົມ​ກອງ​ລວມ​ໝູ່​ທີ່​ມີ​ຜົນ­ງານ​ດີ­ເດັ່ນ ໃນ​ການ​ປະ­ກອບ­ສ່ວນ​ວຽກ​ງານ​ດັ່ງ­ກ່າວ ໃນ​ໄລ­ຍະ​ຜ່ານ​ມາ​ຕື່ມ​ອີກ.

ຂ່າວທີ່ກ່ຽວຂ້ອງ