ຂ່າວຫຼ້າສຸດ

ຍທຂ ສຸມໃສ່ພັດທະນາ ແລະ ກໍ່ສ້າງພື້ນຖານໂຄງລ່າງ

449 29 ມ.ນ. 2019 ຂ່າວໜ້າ​ໜຶ່ງ
ຍທຂ ສຸມໃສ່ພັດທະນາ ແລະ ກໍ່ສ້າງພື້ນຖານໂຄງລ່າງ

    ກອງ​ປະ­ຊຸມ​ວຽກ​ງານ​ໂຍ­ທາ​ທິ​ການ ແລະ ຂົນ­ສົ່ງ (ຍທຂ) ປີ 2018 ຈັດ​ຂຶ້ນ​ວັນ​ທີ 28-29 ມີ­ນາ 2019 ທີ່​ຫໍ​ປະ­ຊຸມ​ແຫ່ງ​ຊາດ ເປັນ​ປະ­ທານ​ຂອງ​ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ຮອງ​ເຈົ້າ­ແຂວງ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຫົວ­ໜ້າ​ກົມ ສະ​ຖາ​ບັນ ກອງ​ວິ­ຊາ​ການ ພະ​ແນກ ຍທຂ ທົ່ວ​ປະ­ເທດ ແລະ ຫົວ­ໜ່ວຍ​ທຸ­ລະ​ກິດ​ເຂົ້າ​ຮ່ວມ.

    ທ່ານ ແສງ​ດາ​ລິດ ກັດ​ຕິ​ຍະ​ສັກ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ກະ­ຊວງ ຍທຂ ໄດ້​ຂຶ້ນ​ລາຍ​ງານ​ຜົນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ປີ 2017-2018 (ຕິດ​ພັນ​ກັບ​ບົດ​ສະ­ຫຼຸບ​ກາງ​ສະ­ໄໝ​ຂອງ​ແຜນ​ພັດ­ທະ­ນາ​ຂະ­ແໜງ­ການ ຍທຂ 5 ປີ 2016-2020) ແລະ ທິດ​ທາງ​ແຜນ­ການ​ປີ 2019-2020 ໂດຍ​ລວມ ປີ 2017-2018 ກະ­ຊວງ ຍທຂ ສາ­ມາດ​ຈັດ​ຕັ້ງ​ປະ­ຕິ­ບັດ ແລະ ດຳ­ເນີນ​ວຽກ​ງານ​ອັນ​ພົ້ນ​ເດັ່ນ​ທີ່​ຕິດ​ພັນ ແລະ ສົ່ງ­ເສີມ​ກັບ​ພັດ­ທະ­ນາ​ເສດ­ຖະ­ກິດ​ສັງ­ຄົມ​ແຫ່ງ​ຊາດ ແລະ ແກ້​ໄຂ​ບັນ­ຫາ​ໜີ້​ສິນ ທີ່​ເກີດ​ຂຶ້ນ​ຈາກ​ການ​ພັດ­ທະ­ນາ​ທາງ​ດ້ານ​ພື້ນ­ຖານ​ໂຄງ​ລ່າງ ທີ່​ເປັນ​ພາ­ລະ​ແບກ​ຫາບ​ຂອງ​ລັດ­ຖະ­ບານ ຄຽງ​ຄູ່​ກັນ​ນັ້ນ ກໍ​ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ ໃນ​ນັ້ນ ວຽກ​ງານ​ການ​ພັດ­ທະ­ນາ ແລະ ກໍ່­ສ້າງ​ໂຄງ​ລ່າງ​ດ້ານ ຍທຂ ເປັນ­ຕົ້ນ ວຽກ​ງານ​ກໍ່­ສ້າງ​ຍົກ​ລະ­ດັບ​ເສັ້ນ­ທາງ ແລະ ຂົວ​ທາງ ສາ­ມາດ​ປະ­ຕິ­ບັດ​ຫຼາຍ​ໂຄງ­ການ​ສຳ­ເລັດ 100%.

    ວຽກ​ງານ​ຂົນ­ສົ່ງ ໄດ້​ເອົາ­ໃຈ­ໃສ່​ພັດ­ທະ­ນາ​ລະ­ບົບ​ການ​ຂົນ­ສົ່ງ ໃຫ້​ສາ­ມາດ​ຮັບ­ປະ­ກັນ​ການ​ຈໍ​ລະ​ຈອນ​ສິນ­ຄ້າ ແລະ ໂດຍ­ສານ​ໄດ້​ທົ່ວ​ເຖິງ​ປະ­ເທດ ພ້ອມ​ນັ້ນ ໄດ້​ພັດ­ທະ­ນາ​ລະ­ບົບ​ຂົນ­ສົ່ງ ສາ­ມາດ​ເຊື່ອມ​ຈອດ​ກັບ​ບັນ­ດາ​ປະ­ເທດ​ອ້ອມ​ຂ້າງ ສົ່ງ­ເສີມ​ການ​ຂົນ­ສົ່ງ​ສິນ­ຄ້າ ແລະ ໂດຍ­ສານ​ລະ­ຫວ່າງ​ປະ­ເທດ​ໄດ້​ນັບ​ມື້​ຫຼາຍ​ຂຶ້ນ ເຊັ່ນ: ສາຍ​ທາງ​ແລ່ນ​ລົດ​ໂດຍ­ສານ​ລາວ-ໄທ​ມີ​ທັງ​ໝົດ 16 ສາຍ​ທາງ ສາຍ​ທາງ​ແລ່ນ​ລົດ​ໂດຍ­ສານ​ລາວ-ຈີນ 17 ສາຍ​ທາງ ສາຍ​ທາງ​ແລ່ນ​ລົດ​ໂດຍ­ສານ​ລາວ-ຫວຽດ­ນາມ ໃນ​ປີ 2017 ມີ​ທັງ​ໝົດ 39 ສາຍ​ທາງ ສາຍ​ທາງ​ແລ່ນ​ລົດ​ໂດຍ­ສານ​ລາວ-ຫວຽດ­ນາມ ແລະ ສາຍ​ທາງ​ແລ່ນ​ລົດ​ໂດຍ­ສານ​ລາວ-ກຳ­ປູ­ເຈຍ ມີ​ທັງ​ໝົດ 2 ສາຍ​ທາງ.

    ວຽກ​ງານ​ບູ­ລະ­ນະ​ສ້ອມ­ແປງ​ທາງ​ຫຼວງ ໄດ້​ສຸມ​ໃສ່​ບູ­ລະ­ນະ​ສ້ອມ­ແປງ​ຕາ​ໜ່າງ​ເສັ້ນ­ທາງ​ຫຼວງ ເພື່ອ​ໃຫ້​ສາ­ມາດ​ຮັບ​ໃຊ້​ການ​ຂົນ­ສົ່ງ​ໃຫ້​ມີ​ຄວາມ​ສະ­ດວກ ໂລ່ງ​ລ່ຽນ ໂດຍ​ໄດ້​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ບູ­ລະ­ນະ​ຮັກ­ສາ​ທາງ​ຫຼວງ ປີ 2017 ປະ­ຕິ­ບັດ​ໄດ້​ທັງ​ໝົດ 25 ໂຄງ­ການ ແບ່ງ​ອອກ​ເປັນ 126 ສັນ­ຍາ ລວມ​ມູນ​ຄ່າ​ປະ­ມານ 581,77 ຕື້​ກີບ ປີ 2018 ມີ​ທັງ​ໝົດ 130 ສັນ­ຍາ ຂຶ້ນ​ກັບ 25 ໂຄງ­ການ ລວມ​ມູນ​ຄ່າ 596,99 ຕື້​ກີບ ກຳ­ນົດ​ເວ­ລາ​ການ­ຈັດ­ຕັ້ງ​ປະ­ຕິ­ບັດ 5 ເດືອນ ຮອດ​ທ້າຍ​ເດືອນ​ທັນ­ວາ 2018 ສະ­ເລ່ຍ​ຄວາມ​ຄືບ​ໜ້າ​ທັງ​ໝົດ 97,19%.

    ສຳ­ລັບ​ທິດ​ທາງ​ໃນ­ຕໍ່­ໜ້າ ສືບ­ຕໍ່​ເອົາ­ໃຈ­ໃສ່​ຄຸ້ມ​ຄອງ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ກໍ່­ສ້າງ​ຂົວ​ທາງ​ໃນ​ປັດ­ຈຸ­ບັນ ແລະ ບັນ­ດາ​ໂຄງ­ການ​ທີ່​ໃກ້​ຈະ​ສຳ­ເລັດ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ບູ­ລະ­ນະ​ຮັກ­ສາ​ຕາ​ໜ່າງ​ເສັ້ນ­ທາງ​ທົ່ວ​ປະ­ເທດ ເພື່ອ​ຮັບ­ປະ­ກັນ​ການ​ຈໍ​ລະ​ຈອນ​ບໍ່​ໃຫ້​ຕັດ­ຂາດ ໂດຍ​ສືບ­ຕໍ່​ປະ­ຕິ­ບັດ​ການ​ບູ­ລະ­ນະ​ທາງ​ຫຼວງ​ແຫ່ງ​ຊາດ​ຕາມ​ແຜນ​ປີ 2019 ແລະ ປີ 2020 ໃຫ້​ສຳ­ເລັດ​ຕາມ​ແຜນ­ທີ່​ວາງ​ໄວ້ ເອົາ­ໃຈ­ໃສ່​ຂະ­ຫຍາຍ​ຕາ​ໜ່າງ​ຂົນ­ສົ່ງ​ໂດຍ­ສານ​ທັງ​ພາຍ​ໃນ ແລະ ຕ່າງ­ປະ­ເທດ ເພື່ອ​ສາ­ມາດ​ຈໍ​ລະ​ຈອນ​ໂດຍ­ສານ ແລະ ສິນ­ຄ້າ​ໃຫ້​ຫຼາຍ​ຂຶ້ນ ພ້ອມ​ທັງ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ວຽກ​ຄວາມ​ປອດ​ໄພ​ທາງ​ຖະ­ໜົນ ເພື່ອ​ແນ­ໃສ່​ການ​ຫຼຸດ­ຜ່ອນ​ອຸ­ບັດ­ເຫດ​ຕາມ​ຖະ­ໜົນ ແລະ ສູ້​ຊົນ​ໃຫ້​ສຳ­ເລັດ​ໂຄງ­ການ​ທົດ​ລອງ​ລະ­ບົບ​ດ່ານ​ຊັ່ງ​ນ້ຳ­ໜັກ​ທີ່​ທັນ​ສະ­ໄໝ​ຢູ່​ສາມ​ຈຸດ​ຄື: ຈຸດ​ນາ​ເຕີຍ ທາງ R3 ບ້ານ​ແຈ້ງ​ສະ­ຫວ່າງ ທາງ 13 ເໜືອ ແລະ ທາງ​ເລກ 9 ແລະ ກະ­ກຽມ​ຍາດ​ແຍ່ງ​ສົມ­ທົບ​ທຶນ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ ເພື່ອ​ໃຫ້​ປະ­ຕິ­ບັດ​ຕື່ມ​ອີກ 6 ຈຸດ​ຕາມ​ການ​ທາບ​ທາມ​ເບື້ອງ​ຕົ້ນ.

ຂ່າວທີ່ກ່ຽວຂ້ອງ