ອາຊຽນ ສົ່ງເສີມວຽກງານເຊື່ອມສານສື່ມວນຊົນ

378 29 ມ.ນ. 2019 ຂ່າວໜ້າ​ໜຶ່ງ
ອາຊຽນ ສົ່ງເສີມວຽກງານເຊື່ອມສານສື່ມວນຊົນ

    ກອງ​ປະ­ຊຸມ​ຄະ­ນະ​ບໍ­ລິ­ຫານ​ງານ​ສະ​ມາ​ພັນ​ນັກ​ຂ່າວ​ອາ​ຊຽນ ຈັດ​ຂຶ້ນ​ວັນ​ທີ 28 ມີ­ນາ 2019 ທີ່​ສຳ­ນັກ­ງານ​ໜັງ­ສື­ພິມ​ວຽງ​ຈັນ​ທາມ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ສະ­ຫວັນ​ຄອນ ຣາ​ຊ​ມຸນ​ຕຣີ ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ປະ­ທານ​ສະ­ມາ­ຄົມ​ນັກ​ຂ່າວ​ແຫ່ງ​ປະ­ເທດ​ລາວ ທ່ານ ເທບ​ພະ​ໄຊ ຢ໋ອງ ປະ­ທານ​ສະ​ມາ​ພັນ​ນັກ​ຂ່າວ​ອາ​ຊຽນ ພ້ອມ​ດ້ວຍ​ບັນ­ດາ​ສະ­ມາ­ຊິກ​ສະ​ມາ​ພັນ​ນັກ​ຂ່າວ​ອາ​ຊຽນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສະ­ຫວັນ​ຄອນ ຣາ​ຊ​ມຸນ​ຕຣີ ກ່າວ​ວ່າ: ເພື່ອ​ໃຫ້​ສາ­ມາດ​ຈັດ​ຕັ້ງ​ແຜນ​ປະ­ຕິ­ບັດ​ງານ​ສຳ­ລັບ​ໄລ­ຍະ 2018-2020 ເຊິ່ງ​ໄດ້​ຮັບ­ຮອງ​ໃນ​ລະ­ຫວ່າງ​ກອງ​ປະ­ຊຸມ​ໃຫຍ່ ຄັ້ງ​ທີ 19 ຂອງ​ສະ​ມາ​ພັນ​ນັກ​ຂ່າວ​ອາ​ຊຽນ ທີ່​ບາງ­ກອກ ປະ­ເທດ​ໄທ ຄັ້ງ​ຜ່ານ​ມາ ເຊິ່ງ​ກອງ​ປະ­ຊຸມ​ຄັ້ງ​ນີ້ ບັນ­ດາ​ປະ­ເທດ​ສະ­ມາ­ຊິກ ຈະ​ໄດ້​ຍົກ​ຫຼາຍ​ບັນ­ຫາ​ຂຶ້ນ​ມາ​ສົນ­ທະ­ນາ​ແລກ­ປ່ຽນ​ກັນ ເພື່ອ​ໃຫ້​ສາ­ມາດ​ບັນ­ລຸ​ເປົ້າ​ໝາຍ​ທີ່​ວາງ​ໄວ້ ພ້ອມ​ທັງ​ເປັນ​ການ​ຮັດ​ແໜ້ນ​ຄວາມ​ສາ­ມັກ­ຄີ ການ​ເຊື່ອມ​ຈອດ​ລະ­ຫວ່າງ​ບັນ­ດາ​ສະ­ມາ­ຄົມ​ນັກ​ຂ່າວ ແລະ ອົງ­ການ​ສື່​ຕ່າງໆ​ໃນ​ປະ­ຊາ​ຄົມ​ອາ​ຊຽນ ຊຸກ­ຍູ້​ໃຫ້​ວຽກ​ງານ​ການ​ເຝິກ­ອົບ­ຮົມ ການ​ແລກ­ປ່ຽນ​ຖອດ​ຖອນ​ບົດ­ຮຽນ​ປະ­ສົບ​ປະ­ການ​ລະ­ຫວ່າງ​ນັກ​ຂ່າວ​ດ້ວຍ​ກັນ ແລະ ຍົກ​ສູງ​ຖາ­ນະ​ບົດ­ບາດ​ຂອງ​ສະ​ມາ​ພັນ​ນັກ​ຂ່າວ​ອາ​ຂຽນ​ໃນ​ພາກ​ພື້ນ ແລະ ສາ­ກົນ.

    ພ້ອມ​ນີ້ ທ່ານ​ຍັງ​ເນັ້ນ​ໃນ​ຖາ­ນະ​ນັກ​ຄຸ້ມ​ຄອງ​ບໍ­ລິ­ຫານ​ສື່ ຄວນ​ສົ່ງ­ເສີມ​ບຸ​ຄະ­ລາ​ກອນ​ສື່​ຂອງ​ຕົນ ໃຫ້​ລາຍ​ງານ​ອອກ​ຂ່າວ​ກ່ຽວ​ກັບ​ບັນ­ດາ​ແຜນ​ບຸ­ລິ­ມະ­ສິດ ແລະ ແຜນ­ການ­ເຄື່ອນ­ໄຫວ​ຕ່າງໆ​ຂອງ​ສະ​ມາ​ພັນ​ນັກ​ຂ່າວ​ອາ​ຊຽນ ກໍ​ຄື​ຂອງ​ສະ­ມາ­ຄົມ​ນັກ​ຂ່າວ​ຂອງ​ແຕ່​ລະ​ປະ­ເທດ​ສະ­ມາ­ຊິກ ຢ່າງ​ເປັນ​ປົກ­ກະ­ຕິ​ຫຼາຍ​ກວ່າ​ເກົ່າ ທັງ​ນີ້ ເພື່ອ​ເຜີຍ­ແຜ່​ໂຄ­ສະ­ນາ​ໃຫ້​ແກ່​ວິ­ໄສ​ທັດ​ອາ​ຊຽນ​ແຕ່​ນີ້​ຮອດ​ປີ 2025 ລວມ​ທັງ​ເພື່ອ​ຍົກ​ລະ­ດັບ​ຄວາມ​ຮັບ​ຮູ້​ຄວາມ​ເຂົ້າ­ໃຈ ເສີມ​ຂະ­ຫຍາຍ​ຄວາມ​ເຂົ້າ​ອົກ​ເຂົ້າ­ໃຈ​ລະ­ຫວ່າງ​ປະ­ຊາ​ຄົມ​ອາ​ຊຽນ​ດ້ວຍ​ກັນ.

ຂ່າວທີ່ກ່ຽວຂ້ອງ