ຂ່າວຫຼ້າສຸດ

ຍີ່ປຸ່ນ ສືບຕໍ່ໃຫ້ທຶນຊ່ວຍເຫຼືອລາວຫຼາຍໂຄງການ

423 29 ມ.ນ. 2019 ຂ່າວໜ້າ​ໜຶ່ງ
ຍີ່ປຸ່ນ ສືບຕໍ່ໃຫ້ທຶນຊ່ວຍເຫຼືອລາວຫຼາຍໂຄງການ

    ພິ­ທີ​ເຊັນ​ສັນ­ຍາ​ຊ່ວຍ­ເຫຼືອ​ໂຄງ­ການ​ກໍ່­ສ້າງ​ໂຮງ​ໝໍ­ນ້ອຍ ແລະ ລະ­ບົບ​ນ້ຳ​ລິນ​ຢູ່​ແຂວງ​ອຸ­ດົມ​ໄຊ ສາ­ລະ​ວັນ ຈຳ­ປາ​ສັກ ໄຊ​ຍະ​ບູ​ລີ ຫົວ­ພັນ ແລະ ແຂວງ​ຊຽງ​ຂວາງ ພາຍ​ໃຕ້​ໂຄງ­ການ​ເສີມ​ສ້າງ​ຄວາມ​ໝັ້ນ­ຄົງ​ຂອງ​ມະ­ນຸດ​ຂັ້ນ​ຮາກ​ຖານ ໂດຍ​ການ​ຊ່ວຍ­ເຫຼືອ​ລ້າ​ຈາກ​ລັດ­ຖະ­ບານ ແລະ ປະ­ຊາ­ຊົນ​ຍີ່­ປຸ່ນ ມູນ​ຄ່າ 414.128 ໂດ​ລາ​ສະ­ຫະ­ລັດ ຫຼື ປະ­ມານ 3,5 ຕື້​ກີບ ເພື່ອ​ກໍ່­ສ້າງ​ໂຮງ​ໝໍ­ນ້ອຍ 3 ໂຄງ­ການ ແລະ ລະ­ບົບ​ນ້ຳ​ລິນ 4 ໂຄງ­ການ ຈັດ​ຂຶ້ນ​ວັນ​ທີ 27 ມີ­ນາ 2019 ທີ່​ສະ­ຖານ­ທູດ​ຍີ່­ປຸ່ນ​ປະ­ຈຳ​ລາວ ຮ່ວມ​ລົງ​ນາມ​ລະ­ຫວ່າງ​ທ່ານ ຄຸ​ໂນະ ຄາ​ຊຶ​ຮິ​ໂຣະ ອຸ­ປະ​ທູດ​ຍີ່­ປຸ່ນ​ປະ­ຈຳ​ລາວ ແລະ ບັນ­ດາ​ຕົວ​ແທນ​ຈາກ​ພະ​ແນກ​ສາ­ທາ­ລະ­ນະ​ສຸກ​ຂັ້ນ​ແຂວງ ແລະ ຂັ້ນ​ເມືອງ ມີ​ທ່ານ ເນົາ ບຸດ­ຕາ ຫົວ­ໜ້າ​ຫ້ອງ­ການ​ກະ­ຊວງ​ສາ­ທາ­ລະ­ນະ​ສຸກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ­ລັບ 3 ໂຄງ­ການ​ທຳ​ອິດ​ແມ່ນ​ການ​ກໍ່­ສ້າງ​ໂຮງ​ໝໍ­ນ້ອຍ​ທີ່​ເມືອງ​ແບງ ແຂວງ​ອຸ­ດົມ​ໄຊ ເມືອງ​ສາ­ລະ​ວັນ ແຂວງ​ສາ­ລະ​ວັນ ແລະ ເມືອງ​ໂພນ​ທອງ ແຂວງ​ຈຳ­ປາ​ສັກ ເນື່ອງ​ຈາກ​ສະ­ພາບ​ສິ່ງ​ອຳ­ນວຍ​ຄວາມ​ສະ­ດວກ​ດັ່ງ­ກ່າວ​ໃນ​ປັດ­ຈຸ­ບັນ ມີ​ຄວາມ​ຊຸດ­ໂຊມ ຈຶ່ງ​ຈຳ­ເປັນ​ຕ້ອງ​ໄດ້​ຮັບ​ການ​ຊ້ອມ​ແຊມ​ຢ່າງ​ສະ​ໝ່ຳ​ສະ­ເໜີ ດັ່ງ­ນັ້ນ ໂຄງ­ການ​ເຫຼົ່າ​ນີ້​ມີ​ເປົ້າ​ໝາຍ​ທີ່​ຈະ​ຍົກ​ລະ­ດັບ​ການ​ເຂົ້າ​ເຖິງ ການ​ບໍ­ລິ­ການ​ດ້ານ​ສາ­ທາ­ລະ­ນະ​ສຸກ ໂດຍ​ການ​ກໍ່­ສ້າງ​ໂຮງ​ໝໍ­ນ້ອຍ​ທີ່​ມີ​ຂະ­ໜາດ 5-7 ຫ້ອງ ພ້ອມ​ອຸ­ປະ­ກອນ​ການ​ແພດ ຜົນ​ທີ່​ໄດ້​ຮັບ​ຄື ຈະ​ມີ​ປະ­ຊາ­ກອນ 20 ບ້ານ 13.162 ຄົນ ໄດ້​ຮັບ​ຜົນ​ປະ­ໂຫຍດ.

    ສ່ວນ​ໂຄງ­ການ​ກໍ່­ສ້າງ​ລະ­ບົບ​ນ້ຳ​ລິນ 4 ໂຄງ­ການ ຈັດ​ຕັ້ງ​ຂຶ້ນ​ທີ່​ເມືອງ​ໄຊ ແຂວງ​ອຸ­ດົມ​ໄຊ ເມືອງ​ໄຊ​ຍະ​ບູ​ລີ ແຂວງ​ໄຊ​ຍະ​ບູ​ລີ ເມືອງ​ຊຳ​ເໜືອ ແຂວງ​ຫົວ­ພັນ ແລະ ເມືອງ​ຄຳ ແຂວງ​ຊຽງ​ຂວາງ ເຖິງ​ວ່າ​ແຕ່​ລະ​ບ້ານ​ຈະ​ມີ​ລະ­ບົບ​ນ້ຳ​ລິນ ແຕ່​ການ​ເຂົ້າ​ເຖິງ​ນ້ຳ​ສະ­ອາດ​ຍັງ​ບໍ່​ທົ່ວ​ເຖິງ ເນື່ອງ​ຈາກ​ຂະ­ໜາດ​ທີ່​ຈຳ­ກັດ ບາງ​ບ້ານ​ລະ­ບົບ​ນ້ຳ​ລິນ​ໄດ້​ຖືກ​ທຳ­ລາຍ​ຈາກ​ນ້ຳ​ຖ້ວມ​ກະ­ທັນ­ຫັນ ແລະ ດິນ​ເຈື່ອນ​ໃນ​ປີ­ຜ່ານ­ມາ ພາ­ໃຫ້​ປະ­ຊາ­ຊົນ​ໃນ​ຂົງ­ເຂດ​ດັ່ງ­ກ່າວ ຈຳ​ຕ້ອງ​ໄດ້​ໃຊ້​ນ້ຳ​ຈາກ​ບ້ານ​ທີ່​ໃກ້​ຄຽງ​ຂອງ​ການ​ຊົມ­ໃຊ້​ໃນ​ຊີ­ວິດ​ປະ­ຈຳ​ວັນ ແລະ ການ​ດື່ມ­ນ້ຳ​ກິນ ໂຄງ­ການ​ເຫຼົ່າ​ນີ້ ຈະ​ຊ່ວຍ​ຍົກ​ລະ­ດັບ​ການ​ເຂົ້າ​ເຖິງ​ນ້ຳ​ສະ­ອາດ ໂດຍ​ການ​ສ້າງ​ລະ­ບົບ​ນ້ຳ​ລິນ​ໃໝ່​ທີ່​ປະ­ກອບ​ມີ​ຖັງ​ດູດ​ນ້ຳ ຖັງ​ບີບ​ອັດ​ນ້ຳ ຖັງ​ເກັບ​ນ້ຳ ທໍ່​ສົ່ງ​ນ້ຳ ແລະ ຫົວ​ກັອກ​ນ້ຳ.

ຂ່າວທີ່ກ່ຽວຂ້ອງ