ນັກທ່ອງທ່ຽວ ຫາຍນານ ມາທ່ຽວ ສປປ ລາວ ນັບມື້ເພີ່ມຂຶ້ນ

296 29 ມ.ນ. 2019 ຂ່າວໜ້າ​ໜຶ່ງ
ນັກທ່ອງທ່ຽວ ຫາຍນານ ມາທ່ຽວ ສປປ ລາວ ນັບມື້ເພີ່ມຂຶ້ນ

    ວັນ​ທີ 27 ມີ­ນາ ປີ 2019 ທ່ານ XIE CHANGAN ປະ­ທານ ບໍ­ລິ­ສັດ ໄທ​ໂກນ ແມັນ​ທຣາວ​ໂວ​ອິນ​ເວ​ສ​ເມັ້ນ ຈຳ­ກັດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ໄດ້​ຈັດ​ພິ­ທີ­ການ​ເໝົາ​ລຳ ຄົບ­ຮອບ 1 ປີ ລະ­ຫວ່າງ​ມົນ­ທົນ​ຫາຍ​ນານ ກັບ​ສາຍ​ການ­ບິນ​ລາວ ເພື່ອ​ນຳ​ນັກ​ທ່ອງ​ທ່ຽວ​ຈາກ​ມົນ­ທົນ​ຫາຍ​ນານ ສປ ຈີນ ມາ​ທ່ຽວ ສປປ ລາວ ຢູ່​ສະ­ໜາມ​ບິນ​ສາ­ກົນ​ວັດ​ໄຕ.

    ທ່ານ Xie Changan ກ່າວ​ວ່າ: ບໍ­ລິ­ສັດ ໄທ​ໂກນ​ແມັນ​ທຣາວ​ໂວ​ອິນ​ເວ​ສ​ເມັ້ນ ຈຳ­ກັດ ໄດ້​ສ້າງ­ຕັ້ງ ແລະ ດຳ­ເນີນ​ການ​ເໝົາ​ຍົນ​ເໝົາ​ລຳ​ແຕ່​ປີ 2018 ເປັນ­ຕົ້ນ​ມາ ໂດຍ​ໄດ້​ນຳ​ນັກ​ທ່ອງ​ທ່ຽວ​ຈາກ​ມົນ­ທົນ ຫາຍ​ນານ ສປ ຈີນ ມາ​ທ່ອງ​ທ່ຽວ ສປປ ລາວ 3 ຄັ້ງ​ຕໍ່​ອາ­ທິດ ຄື: ວັນ​ພຸດ ມາ​ລົງ​ນະ­ຄອນ­ຫຼວງ​ວຽງ​ຈັນ ວັນ​ສຸກ ມາ​ລົງ​ແຂວງ​ຫຼວງ​ພະ​ບາງ ແລະ ວັນ​ອາ­ທິດ ມາ​ລົງ​ນະ­ຄອນ­ຫຼວງ​ວຽງ​ຈັນ ເຊິ່ງ​ນອກ­ຈາກ​ຈະ​ສ້າງ​ລາຍ​ຮັບ​ໃຫ້​ລັດ­ຖະ­ບານ​ແລ້ວ ຍັງ​ສາ­ມາດ​ສ້າງ​ລາຍ​ໄດ້​ໃຫ້​ຫຼາຍ​ພາກ­ສ່ວນ ເຊັ່ນ: ໂຮງ­ແຮມ ເຮືອ​ນຳ​ທ່ຽວ​ທຳ​ມະ​ຊາດ ບໍ­ລິ­ສັດ​ລົດ ເຮັດ​ໃຫ້​ຄົນ​ລາວ​ມີ​ວຽກ​ເຮັດ​ງານ​ທຳ ແລະ ກະ­ຈາຍ​ລາຍ​ໄດ້​ໃຫ້​ປະ­ຊາ­ຊົນ​ທ້ອງ­ຖິ່ນ​ເປັນ​ຈຳ­ນວນ​ຫຼວງ­ຫຼາຍ ນອກ​ນີ້​ຍັງ​ເປັນ​ການ​ຊຸກ­ຍູ້-ສົ່ງ­ເສີມ​ການ​ຮ່ວມ​ມື​ດ້ານ​ການ­ທ່ອງ­ທ່ຽວ ລະ­ຫວ່າງ ລາວ-ຈີນ ໃຫ້​ນັບ​ມື້​ຂະ­ຫຍາຍ­ຕົວ​ຂຶ້ນ​ເລື້ອຍໆ ໂດຍ​ສະ­ເພາະ​ປີ​ທ່ອງ​ທ່ຽວ ລາວ-ຈີນ 2019. ບໍ­ລິ­ສັດ ໄທ​ໂກນ​ແມັນ ເປັນ​ບໍ­ລິ­ສັດ​ໜື່ງ​ທີ່​ສາ­ມາດ​ເຜີຍ­ແຜ່​ວັດ­ທະ­ນາ​ທຳ ຮິດ​ຄອງ​ປະ­ເພ­ນີ ຊີ­ວິດ​ການ​ເປັນ​ຢູ່​ແບບ​ດັ້ງ­ເດີມ​ຂອງ​ລາວ ໃຫ້​ກັບ​ຄົນ​ຕ່າງ​ຊາດ ເຂົ້າ​ມາ​ຮຽນ​ຮູ້​ໄດ້​ເປັນ​ຢ່າງ​ດີ ສະ­ຖານ­ທີ່​ຫຼັກໆ​ທີ່​ບໍ­ລິ­ສັດ​ເນັ້ນ​ຫຼາຍ​ທີ່​ສຸດ ແມ່ນ​ສະ­ຖານ­ທີ່​ທ່ອງ​ທ່ຽວ​ສຳ­ຄັນ​ທາງ​ປະ­ຫວັດ­ສາດ ເຊັ່ນ: ພະ​ທາດ­ຫຼວງ ປະ­ຕູ​ໄຊ ວັດ​ຊຽງ​ຄວນ ຫໍ­ພະ­ແກ້ວ ວັດ​ສີ­ສະ​ເກດ ນອກ​ນີ້​ຍັງ​ມີ​ຖ້ຳ​ຈັງ​ວັງ​ວຽງ ຖ້ຳ​ປູ​ຄຳ ເມືອງ​ວັງ​ວຽງ ແຂວງ​ວຽງ​ຈັນ ພະ­ລາດ​ສະ​ວັງ​ຫຼວງ ພະ­ທາດ​ພູ​ສີ ວັດ​ຊຽງ​ທອງ ນ້ຳ­ຕົກ­ຕາດ​ກວາງ­ຊີ ແລະ ສະ­ຖານ­ທີ່​ອື່ນໆ ພິ­ເສດ​ກວ່າ​ນັ້ນ ທາງ​ບໍ­ລິ­ສັດ​ຍັງ​ໄດ້​ຈັດ​ໃຫ້​ນັກ​ທ່ອງ​ທ່ຽວ​ທຸກ​ຄົນ​ຮຽນ​ຮູ້​ພິ­ທີ​ໃສ່​ບາດ ກາ​ນຸ່ງ​ຖື​ແບບ​ລາວ ອັນ​ເປັນ​ເອ­ກະ­ລັກ​ທີ່​ງົດ​ງາມ ຄົນ​ລາວ​ເປັນ​ຄົນ​ມີ​ນ້ຳ­ໃຈ ແລະ ໃຫ້­ການ​ຕ້ອນ­ຮັບ​ນັກ​ທ່ອງ​ທ່ຽວ​ດ້ວຍ​ຄວາມ​ຈິງ​ໃຈ.

ຂ່າວທີ່ກ່ຽວຂ້ອງ