ຂ່າວຫຼ້າສຸດ

ເມົາຂັບ ປັບ 20 ເທົ່າ ເລີ່ມສັກສິດ 1 ເມສານີ້ ທີ່ ນວ

389 29 ມ.ນ. 2019 ຫົວຂໍ້ຂ່າວອື່ນໆ

    ກອງ​ປະ­ຊຸມ​ເຊື່ອມ​ຊຶມ​ຂໍ້​ຕົກ­ລົງ​ສະ­ບັບ​ເລກ​ທີ 1323/ຈ​ນວ ລົງ​ວັນ​ທີ 21 ທັນ­ວາ 2018 ວ່າ​ດ້ວຍ​ມາດ​ຕະ­ການ​ຫຼຸດ­ຜ່ອນ​ອຸ­ບັດ­ເຫດ ແລະ ຮັກ­ສາ​ຄວາມ​ປອດ​ໄພ​ຕາມ​ຖະ­ໜົນ ທົ່ວ​ນະ­ຄອນ­ຫຼວງ​ວຽງ​ຈັນ ທີ່​ຈັດ​ຂຶ້ນ​ໃນ​ວັນ​ທີ 19 ມີ­ນາ 2019 ຢູ່​ກອງ​ບັນ­ຊາ​ການ​ປ້ອງ​ກັນ​ຄວາມ​ສະ­ຫງົບ ນະ­ຄອນ­ຫຼວງ​ວຽງ​ຈັນ ເຊິ່ງ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ກໍ​ໄດ້​ກ່າວ​ເນັ້ນ​ໃຫ້ ປກສ ນວ ກໍ​ຄື ຕຳ­ຫຼວດ​ຈະ­ລາ­ຈອນ ນະ­ຄອນ­ຫຼວງ​ວຽງ​ຈັນ ໃຫ້​ເລີ່ມ​ຈັດ​ຕັ້ງ​ປະ­ຕິ­ບັດ​ຂໍ້​ຕົກ­ລົງ​ສະ­ບັບ​ດັ່ງ­ກ່າວ ຕັ້ງ­ແຕ່​ວັນ​ທີ 1 ເມ­ສາ 2019 ເປັນ­ຕົ້ນ​ໄປ.

    ຂໍ້​ຕົກ­ລົງ​ສະ­ບັບ​ນີ້ ປະ­ກອບ​ມີ 7 ໝວດ 29 ມາດ­ຕາ ເຊິ່ງ​ໃນ​ໝວດ​ທີ III ມາດ­ຕາ 13 ໃນ​ຂໍ້ 3 ໄດ້​ລະ­ບຸ​ໄວ້​ວ່າ: ເມື່ອ​ກວດ​ພົບ​ທາດ​ເຫຼົ້າ ແລະ ສິ່ງ​ມຶນ­ເມົາ​ໃນ​ຮ່າງ­ກາຍ​ຂອງ​ຜູ້​ຂັບ​ຂີ່​ຍານ­ພາ­ຫະ­ນະ​ເກີນ​ປະ­ລິ­ມານ​ທີ່​ກຳ­ນົດ​ໄວ້ ໃນ​ມາດ­ຕາ 20 ຂອງ​ກົດ­ໝາຍ​ວ່າ​ດ້ວຍ​ການ​ຈະ­ລາ­ຈອນ​ທາງ­ບົກ ໃຫ້​ປະ­ຕິ­ບັດ​ມາດ​ຕະ­ການ​ຕໍ່​ຜູ້​ຂັບ​ຂີ່​ດັ່ງ­ນີ້:

    - ຄັ້ງ​ທີ 1 ຂຽນ​ໃບ­ຮັບ​ສາ­ລະ­ພາບ​ລະ­ເມີດ​ກົດ​ຈະ­ລາ­ຈອນ ກັກ​ໃບ​ຂັບ​ຂີ່ 1 ເດືອນ ແລະ ປັບ​ໃໝ​ຕ່ຳ​ສຸດ​ຕາມ​ມາດ­ຕາ 5 ຂອງ​ດຳ­ລັດ​ເລກ​ທີ 188/ນຍ ລົງ​ວັນ​ທີ 03 ກໍ­ລະ­ກົດ 2007 ແລະ ຕາມ​ມາດ­ຕາ 2 ຂອງ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 4 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຊຸດ​ທີ I ສະ­ບັບ​ເລກ​ທີ 028/ສປ ນວ ລົງ​ວັນ​ທີ 06 ກັນ­ຍາ 2018.

    - ຄັ້ງ​ທີ 2 ຂຽນ​ໃບ­ຮັບ​ສາ­ລະ­ພາບ​ລະ­ເມີດ​ກົດ​ຈະ­ລາ­ຈອນ ກັກ​ໃບ​ຂັບ​ຂີ່ 3 ເດືອນ ແລະ ປັບ​ໃໝ 10 ເທົ່າ ຕາມ​ມາດ­ຕາ 5 ຂອງ​ດຳ­ລັດ​ເລກ​ທີ 188/ນຍ ແລະ ຕາມ​ມາດ­ຕາ 2 ຂອງ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 4 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຊຸດ​ທີ I ສະ­ບັບ​ເລກ​ທີ 028/ສປ ນວ ລົງ​ວັນ​ທີ 06 ກັນ­ຍາ 2018.

    - ຄັ້ງ​ທີ 3 ຂຽນ​ໃບ­ຮັບ​ສາ­ລະ­ພາບ​ລະ­ເມີດ​ກົດ​ຈະ­ລາ­ຈອນ ກັກ​ໃບ​ຂັບ​ຂີ່ 6 ເດືອນ​ຫາ 1 ປີ ແລະ ປັບ​ໃໝ 20 ເທົ່າ​ຕາມ​ມາດ­ຕາ 5 ຂອງ​ດຳ­ລັດ ເລກ​ທີ 188/ນຍ ແລະ ຕາມ​ມາດ­ຕາ 2 ຂອງ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 4 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຊຸດ​ທີ I ສະ­ບັບ​ເລກ​ທີ 028/ສປ ນວ ລົງ​ວັນ​ທີ 06 ກັນ­ຍາ 2018.

    - ຄັ້ງ​ທີ 4 ຂຽນ​ໃບ­ຮັບ​ສາ­ລະ­ພາບ​ລະ­ເມີດ​ກົດ​ຈະ­ລາ­ຈອນ ຢຶດ​ໃບ​ຂັບ​ຂີ່​ເລີຍ 1 ປີ ຈຶ່ງ​ອະ­ນຸ­ຍາດ​ໃຫ້​ໄປ​ເສັງ​ເອົາ​ໃບ​ຂັບ​ຂີ່​ຄືນ­ໃໝ່ ແລະ ປັບ​ໃໝ 20 ເທົ່າ ຕາມ​ມາດ­ຕາ 5 ຂອງ​ດຳ­ລັດ​ເລກ​ທີ 188/ນຍ ແລະ ຕາມ​ມາດ­ຕາ 2 ຂອງ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 4 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຊຸດ​ທີ I ສະ­ບັບ​ເລກ​ທີ 028/ສປ ນວ ລົງ​ວັນ​ທີ 06 ກັນ­ຍາ 2018.

    ກໍ­ລະ­ນີ​ຜູ້​ຂັບ​ຂີ່​ຍານ­ພາ­ຫະ­ນະ​ດື່ມ​ເຄື່ອງ​ດື່ມ​ທີ່​ມີ​ທາດ​ເຫຼົ້າ ແລະ ເສບ​ສິ່ງ​ມຶນ­ເມົາ​ເປັນ­ຕົ້ນ​ເຫດ​ພາ­ໃຫ້​ເກີດ​ອຸ­ບັດ­ເຫດ ແມ່ນ​ໃຫ້​ນຳ​ໃຊ້​ມາດ​ຕະ­ການ​ສູງ​ສຸດ ຕາມ​ຄັ້ງ​ທີ 4 ຂ້າງ​ເທິງ ແລະ ດຳ­ເນີນ​ຄະ­ດີ​ຕາມ​ກົດ­ໝາຍ​ທີ່​ກ່ຽວ­ຂ້ອງ ຖ້າ​ບໍ່​ໄດ້​ເປັນ­ຕົ້ນ​ເຫດ ກໍ​ໃຫ້​ນຳ​ໃຊ້​ມາດ​ຕະ­ການ​ຕາມ​ລຳ­ດັບ​ຂ້າງ​ເທິງ​ນັ້ນ.

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ