ນັກກີລາ​ມວຍ​ສາກົນ​ທີມ​ຊາດ​ໄດ້​ຮັບ​ການ​ຊຸກຍູ້​ເຄື່ອງ​ກີລາ

192 29 ມ.ນ. 2019 ວົງຈອນກີລາ
 ນັກກີລາ​ມວຍ​ສາກົນ​ທີມ​ຊາດ​ໄດ້​ຮັບ​ການ​ຊຸກຍູ້​ເຄື່ອງ​ກີລາ

    ພິທີ​ມອບ​ເຄື່ອງ​ກີລາ 14 ຊຸດ ໃນ​ນີ້​ຊຸດ​ວອມ 7 ຊຸດ ແລະ ເຄື່ອງນຸ່ງ​ເຝິກຊ້ອມ 7 ຊຸດ ລວມ​ມູນ​ຄ່າ 4 ລ້ານ​ກວ່າ​ກີບ ໃຫ້​ແກ່​ນັກກີລາ​ຊົກມວຍ​ສາກົນ​ທີມ​ຊາດ​ລາວ ຈັດ​ຂຶ້ນ​ວັນ​ທີ 27 ມີນາ 2019 ທີ່​ຫ້ອງການ​ຄະນະ​ກຳມະການ​ໂອ​ແລມ​ປິກ​ແຫ່ງ​ຊາດ​ລາວ ກ່າວ​ມອບ​ຂອງ​ທ່ານ ນາງ ກັນລະຍານີ ມີ​ໄຊ ປະທານ​ບໍລິສັດ ເມ​ດິ​ທອບ ການ​ຢາ ກອງທັບ ແລະ ກ່າວ​ຮັບ​ໂດຍ​ທ່ານ ສົມ​ພອນ ມະນີ​ຄຳ ເລຂາທິການ​ສະຫະພັນ​ມວຍ​ສາກົນ​ແຫ່ງ​ຊາດ​ລາວ ມີ​ທ່ານ ກະເສມ ອິນ​ທະລາ ຮອງ​ປະທານ​ຄະນະ​ກຳມະການ​ໂອ​ແລມ​ປິກ​ແຫ່ງ​ຊາດ ແລະ ທ່ານ ອຸດອນ ຂັນໄຊ ຫົວໜ້າ​ຄູ​ເຝິກ​ມວນ​ສາກົນ​ທີມ​ຊາດ ແລະ ນັກກີລາ​ມວຍ​ສາກົນ​ທີມ​ຊາດ​ລາວ​ເຂົ້າ​ຮ່ວມ.

    ທ່ານ ສົມ​ພອນ ມະນີ​ຄຳ ກ່າວ​ວ່າ: ແຜນການ​ເຂົ້າ​ຮ່ວມ​ໃນ​ແຂ່ງຂັນ​ມວຍ​ສາກົນ​ຊີງ​ແຊັມ​ອາຊີ 2019 ທີ່​ນະຄອນຫຼວງ​ບາງກອກ ປະເທດ​ໄທ ຄັ້ງ​ນີ້ ແມ່ນ​ນອນ​ໃນ​ແຜນ​ເປົ້າ​ໝາຍ​ຂອງ​ການ​ສົ່ງເສີມ​ນັກກີລາ​ໃຫ້​ໄດ້​ເຄື່ອນ​ໄຫວ​ຮ່ວມ​ງານ​ຕ່າງໆ​ຂອງ​ສະຫະພັນ​ມວຍ​ສາກົນ​ແຫ່ງ​ຊາດ ເພື່ອ​ສ້າງ​ນັກກີລາ​ກຽມ​ສົ່ງ​ເຂົ້າ​ຮ່ວມ​ສ້າງ​ຜົນງານ​ຄັ້ງ​ປະຫວັດສາດ ການ​ແຂ່ງຂັນ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ 30 ທີ່​ປະເທດ​ຟີ​ລິບ​ປິນ ເປັນ​ເຈົ້າພາບ ຈະ​ຈັດ​ຂຶ້ນ​ທ້າຍ​ປີ 2019 ສຳລັບ​ການ​ແຂ່ງຂັນ​ຊີງ​ແຊັມ​ອາຊີ​ທີ່​ປະເທດ​ໄທ​ຈະ​ສົ່ງ​ນັກກີລາ 4 ຄົນ ຍິງ 2 ຄົນ ແລະ ຄູ​ເຝິກ 1 ຄົນ ກຽມ​ອອກ​ເດີນທາງ​ໄປ​ເກັບ​ຕົວ​ເຝິກຊ້ອມ​ທີ່​ແຂວງ​ນະຄອນ​ຣາ​ຊະ​ສີມາ ປະເທດ​ໄທ ຈາກ​ນັ້ນ​ໃນ​ຕົ້ນ​ເດືອນ​ເມສາ 2019 ຈະ​ສືບຕໍ່​ເຂົ້າ​ຮ່ວມ​ແຂ່ງຂັນ​ມວຍ​ສາກົນ ຊີງ​ແຊັມ​ອາຊີ​ທີ່​ນະຄອນຫຼວງ​ບາງກອກ ປະເທດ​ໄທ ຈັດ​ຂຶ້ນ​ວັນ​ທີ 6-27 ເມສາ 2019 ຄາດ​ວ່າ​ຈະ​ມີ​ນັກກີລາ​ຈາກ 40 ກວ່າ​ປະເທດ​ໃນ​ທົ່ວ​ທະວີບອາຊີ​ເຂົ້າ​ຮ່ວມ.

    ສຳລັບ​ນັກ​ມວຍ​ສາກົນ​ທີມ​ຊາດ​ລາວ​ສົ່ງ​ເຂົ້າ​ຮ່ວມ​ການ​ແຂ່ງຂັນ​ມວຍ​ສາກົນ​ຊີງ​ແຊັມ​ອາຊີ​ຄັ້ງ​ນີ້ ປະກອບ​ມີ​ທ້າວ ຄຳ​ພູ​ວັນ ຄຳ​ສູນ​ທອນ ຮຸ່ນ​ນ້ຳໜັກ 49 ກິ​ໂລ ທ້າວ ນັນທະ​ວົງ ສິມ​ພະ​ວົງ ຮຸ່ນ​ນ້ຳໜັກ 56 ກິ​ໂລ ນາງ ວິໄລ​ພອນ ວົງ​ພະຈັນ ຮຸ່ນ​ນ້ຳໜັກ 54 ກິ​ໂລ ແລະ ນາງ ດາວ​ມະຍຸລີ ຈັນ​ທິ​ລາດ ຫຼື ນ້ອງ​ດີ້​ສາວ​ລາວ ເຈົ້າ​ຂອງ​ແຊັມ​ມວຍ​ໂລກ​ຍິງ​ຄົນ​ທຳ​ອິດ​ຂອງ​ລາວ​ຮຸ່ນ​ນ້ຳໜັກ 54 ກິ​ໂລ. 

ຂ່າວທີ່ກ່ຽວຂ້ອງ