ສຳເລັດ​ການ​ແຂ່ງຂັນ​ກີລາ​ທົ່ວ ​ມຊ ສົກຮຽນ 2018-2019

244 29 ມ.ນ. 2019 ວົງຈອນກີລາ
ສຳເລັດ​ການ​ແຂ່ງຂັນ​ກີລາ​ທົ່ວ ​ມຊ ສົກຮຽນ 2018-2019

     ພິທີ​ປິດ​ການ​ແຂ່ງຂັນ​ງານ​ກີລາ​ນັກ​ສຶກ​ສາ​ທົ່ວ​ມະຫາວິທະຍາໄລ​ແຫ່ງ​ຊາດ (​ມຊ) ປະຈຳ​ສົກຮຽນ 2018-2019 ຈັດ​ຂຶ້ນ​ວັນ​ທີ 27 ມີນາ 2019 ທີ່​ສະໜາມ​ກີລາ​ກາງ ​ມຊ ວິທະຍາ​ເຂດ​ດົງ​ໂດກ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ມີ​ທ່ານ ສົມ​ສີ ຍໍ​ພັນ​ໄຊ ວ່າການ​ອະທິການ​ບໍດີ ​ມຊ ແລະ ບັນດາ​ຄະນະບໍດີ ພະນັກງານ​ຄູ​ອາຈານ ແລະ ນັກ​ສຶກ​ສາ​ເຂົ້າ​ຮ່ວມ​ຫຼາຍ​ພັນ​ຄົນ.

    ສະຫຼຸບ​ຜົນ​ການ​ແຂ່ງຂັນ​ທຸກ​ປະເພດ​ກີລາ​ຜົນ​ປາກົດ​ວ່າ:ຄະນະ​ວິທະຍາສາດ​ການ​ກີລາ-ກາຍຍະກຳ (ຄວກ) ກວາດ​ມາ​ໄດ້​ເຖິງ 12 ຫຼຽນ​ຄຳ 5 ຫຼຽນ​ເງິນ ແລະ 4 ຫຼຽນ​ທອງ ລວມ 21 ຫຼຽນ ຄອງ​ເຈົ້າ​ຫຼຽນ​ຄຳ 3 ສະໄໝ​ຕິດຕໍ່​ກັນ ສ່ວນ​ອັນ​ດັບ 2 ຄະນະ​ວິທະຍາສາດ​ທຳ​ມະ​ຊາດ (ຄວ​​ທ) ຍາດ​ໄດ້ 2 ຫຼຽນ​ຄຳ 4 ຫຼຽນ​ເງິນ ແລະ 5 ຫຼຽນ​ທອງ ລວມ 11 ຫຼຽນ ແລະ ອັນ​ດັບ 3 ຄະນະ​ເສດຖະສາດ ແລະ ບໍລິຫານ​ທຸລະ​ກິດ (​ຄສບ) ຍາດ​ໄດ້ 2 ຫຼຽນ​ຄຳ ແລະ 1 ຫຼຽນ​ທອງ ລວມ 3 ຫຼຽນ.  

    ການ​ແຂ່ງຂັນ​ກີລາ​ປະຈຳ​ປີ 2019 ທົ່ວ ​ມຊ ຄັ້ງ​ນີ້​ມີ​ນັກ​ສຶກ​ສາ​ຈາກ 13 ຄະນະ​ເຂົ້າ​ຮ່ວມ ປະກອບ​ມີ: ຄວກ ຄະນະ​ສະຖາປັດຕະຍະກຳ​ສາດ ຄະນະ​ວິທະຍາສາດ​ສັງຄົມ ຄວ​​ທ ຄະນະ​ວິທະຍາສາດ​ສິ່ງແວດລ້ອມ ຄະນະ​ວິທະຍາສາດ​ປ່າໄມ້ ​ຄສບ ຄະນະ​ສຶກ​ສາ​ສາດ ຄະນະ​ວິສະວະກຳ​ສາດ ຄະນະ​ຊັບພະຍາກອນ​ນ້ຳ ຄະນະ​ນິຕິສາດ-ລັດຖະສາດ ຄະນະ​ກະເສດສາດ ແລະ ຄະນະ​ອັກສອນສາດ ແລະ ມີ​ການ​ແຂ່ງຂັນ 5 ປະເພດ​ກີລາ ປະກອບ​ມີ ຟຸດ​ຊໍ​ຊາຍ ບານສົ່ງ​ຍິງ-ຊາຍ ກະຕໍ້​ຍິງ-ຊາຍ ເຕະບານ​ຍິງ-ຊາຍ ແລະ ເປ​ຕັງ​ຍິງ​ຊາຍ. 

ຂ່າວທີ່ກ່ຽວຂ້ອງ