ເປີດ​ຄັດ​ເລືອກ​ນັກກີລາ​ເຕະບານ​ຍິງ U-15 ແລະ U-19

253 29 ມ.ນ. 2019 ວົງຈອນກີລາ
ເປີດ​ຄັດ​ເລືອກ​ນັກກີລາ​ເຕະບານ​ຍິງ U-15 ແລະ U-19

    ອີງ​ຕາມ​ຂໍ້​ມູນ​ຈາກ​ສະຫະພັນ​ກີລາ​ບານເຕະ​ແຫ່ງ​ຊາດ​ລາວ (​ສຕລ) ໃຫ້​ຮູ້​ວ່າ: ​ສຕລ ມີ​ຈຸດ​ປະ ສົງ​ຄັດ​ເລືອກ​ນັກກີລາ​ເຕະບານ​ຍິງ​ທີ່​ມີ​ຄວາມ​ສາມາດ ມີ​ພອນ​ສະຫວັນ​ດີເດັ່ນ ແລະ ມີ​ທັກ​ສະ ເພື່ອ​ກະກຽມ​ນັກກີລາ​ທີມ​ເຕະບານ​ຍິງ ທີມ​ຊາດ​ລາວ ຮຸ່ນ​ອາຍຸ​ບໍ່​ເກີນ 15 ປີ ເຂົ້າ​ຮ່ວມ​ການ​ແຂ່ງຂັນ​ບານເຕະ​ຍິງ ຊີງ​ແຊັມ​ອາ​ຊຽນ ຮຸ່ນ​ອາຍຸ​ບໍ່​ເກີນ 15 ປີ (AFF U-15 GIRLS' CHAMPIONSHIP 2019) ທີ່​ແຂວງ​ຊົນ​ບູ​ຣີ ປະເທດ​ໄທ ເປັນ​ເຈົ້າພາບ ໃນ​ວັນ​ທີ 9-22 ພຶດສະພາ 2019 ເຊິ່ງ​ທີມ​ຊາດ​ລາວ​ຖືກ​ຈັດ​ຢູ່​ກຸ່ມ B ຮ່ວມ​ກັບ​ເຈົ້າພາບ​ທີມ​ຊາດ​ໄທ ທີມ​ຊາດ​ມາ​ເລ​ເຊຍ ທີມ​ຊາດ​ສິງກະໂປ ແລະ ທີມ​ຊາດ​ກຳປູເຈຍ.

    ສຳລັບ​ການ​ຄັດ​ເລືອກ​ນັກກີລາ​ຈະ​ໄດ້​ຈັດ​ຂຶ້ນ​ວັນ​ທີ 3-17 ເມສາ 2019 ທີ່​ສູນ​ຝຶກ​ສະຫະພັນ​ບານເຕະ​ແຫ່ງ​ຊາດ​ລາວ ບ້ານ​ຫ້ວຍ​ຫົງ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ໃນ​ເວລາ 16:30-18:30 ໂມງ ແລະ ທີມ​ເຕະບານ​ຍິງ ທີມ​ຊາດ​ລາວ ຮຸ່ນ​ອາຍຸ​ບໍ່​ເກີນ 19 ປີ ເພື່ອ​ກຽມ​ເຂົ້າ​ຮ່ວມ​ການ​ແຂ່ງຂັນ​ເຕະບານ​ຍິງ ລາຍການ Bangmata U19 Women’s International Gold Cup 2019 ທີ່​ປະເທດ​ບັງ​ກລາ​ເທດ ເປັນ​ເຈົ້າພາບ​ວັນ​ທີ 22 ເມສາ ຫາ 3 ພຶດສະພາ 2019.

    ສຳລັບ​ເງື່ອນໄຂ​ຂອງ​ນັກກີລາ​ທີ່​ຈະ​ເຂົ້າ​ຮ່ວມ​ຄັດ​ເລືອກ​ຈະ​ຕ້ອງ​ຮັບປະກັນ​ຄວາມ​ພ້ອມ​ຂອງ​ຮ່າງ ກາຍ​ຕະຫຼອດ​ໄລຍະ​ການ​ຄັດ​ເລືອກ ນັກກີລາ​ຕ່າງ​ແຂວງ​ທີ່​ຕ້ອງການ​ມາ​ຄັດ​ເລືອກ​ນັກກີລາ​ໃນ​ຄັ້ງ​ນີ້​ທາງ ​ສຕລ ແມ່ນ​ອຳນວຍ​ຄວາມ​ສະດວກ​ທາງ​ດ້ານ​ທີ່​ພັກ ແລະ ອາຫານ​ຕະຫຼອດ​ໄລຍະ​ການ​ຄັດ​ເລືອກ ສ່ວນ​ການ​ເດີນທາງ​ແມ່ນ​ກຸ້ມ​ຕົນ​ເອງ.

ຂ່າວທີ່ກ່ຽວຂ້ອງ