ແລກປ່ຽນບົດຮຽນ ຈັດສັນ ແລະ ຟື້ນຟູຊີວິດການເປັນຢູ່ຂອງປະຊາຊົນຖືກໂຄງການໄຟຟ້າ

285 28 ມ.ນ. 2019 ຂ່າວໜ້າ​ໜຶ່ງ
ແລກປ່ຽນບົດຮຽນ ຈັດສັນ ແລະ ຟື້ນຟູຊີວິດການເປັນຢູ່ຂອງປະຊາຊົນຖືກໂຄງການໄຟຟ້າ

    ກົມ​ທຸ­ລະ​ກິດ​ພະ­ລັງ­ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ ໄດ້​ຈັດ​ກອງ​ປະ­ຊຸມ​ແລກ­ປ່ຽນ ແລະ ຖອດ​ຖອນ​ບົດ­ຮຽນ​ວຽກ​ງານ​ຈັດ​ສັນ-ຍົກ­ຍ້າຍ ການ​ຊົດ​ເຊີຍ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ​ພັດ­ທະ­ນາ​ພະ­ລັງ­ງານ​ໄຟ­ຟ້າ ຄັ້ງ​ທີ 4 ຂຶ້ນ​ວັນ​ທີ 27-28 ມີ­ນາ 2019 ທີ່​ເມືອງ​ນາ​ກາຍ ແຂວງ​ຄຳ​ມ່ວນ ໂດຍ​ເປັນ​ປະ­ທານ​ຂອງ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ມີ​ບັນ­ດາ​ຮອງ​ເຈົ້າ­ແຂວງ ເຈົ້າ­ເມືອງ ຕາງ­ໜ້າ​ຜູ້​ພັດ­ທະ­ນາ​ໂຄງ­ການ​ໄຟ­ຟ້າ ແລະ ຂະ­ແໜງ​ກ່ຽວ­ຂ້ອງ​ທັງ​ສູນ​ກາງ ແລະ ທ້ອງ­ຖິ່ນ ເຂົ້າ​ຮ່ວມ.

    ທ່ານ ຄຳ​ມະ­ນີ ອິນ​ທິ​ລາດ ກ່າວ​ວ່າ: ຜົນ­ສຳ­ເລັດ​ຂອງ​ການ​ພັດ­ທະ­ນາ​ອຸດ­ສາ­ຫະ­ກຳ​ໄຟ­ຟ້າ​ຢູ່​ປະ­ເທດ​ເຮົາ​ໄລ­ຍະ​ຜ່ານ​ມາ ແມ່ນ​ມີ​ຜົນ­ສຳ­ເລັດ​ທີ່​ສຳ­ຄັນ ມີ​ລັກ­ສະ­ນະ​ພື້ນ­ຖານ​ທີ່​ໜັກ​ແໜ້ນ ໃຫ້​ແກ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຜົນ­ສຳ­ເລັດ​ດັ່ງ­ກ່າວ ໄດ້​ນຳ​ເອົາ​ຜົນ​ປະ­ໂຫຍດ​ມາ­ສູ່ ສປປ ລາວ ໃນ​ນີ້ ຜົນ​ປະ­ໂຫຍດ​ທາງ​ດ້ານ​ການ​ເງິນ ທີ່​ຈະ​ໄດ້​ຈາກ​ໂຄງ­ການ​ໂດຍ​ກົງ ເຊິ່ງ​ໄລ­ຍະ​ສຳ​ປະ­ທານ​ແມ່ນ​ຈະ​ໄດ້​ໃນ​ຮູບ​ແບບ​ຂອງ​ຄ່າ​ພາກ​ຫຼວງ​ອາ­ກອນ​ຕ່າງໆ ແລະ ເງິນ​ປັນ​ຜົນ ສຳ­ລັບ​ໂຄງ­ການ​ທີ່​ລັດ​ຖື​ຮຸ້ນ​ນຳ ຫຼັງ​ຈາກ​ໝົດ​ອາ­ຍຸ​ສຳ​ປະ­ທານ​ຊັບ​ສິນ ແລະ ການ​ດຳ­ເນີນ​ທຸ­ລະ​ກິດ​ທັງ​ໝົດ​ຂອງ​ໂຄງ­ການ​ຈະ​ກາຍ­ເປັນ​ຂອງ​ລັດ­ຖະ­ບານ 100% ນອກ­ຈາກ​ນັ້ນ ຍັງ​ມີ​ຜົນ​ປະ­ໂຫຍດ​ທາງ​ອ້ອມ​ອື່ນໆ​ທີ່​ຈະ​ໄດ້​ຮັບ​ຈາກ​ໂຄງ­ການ ເຊັ່ນ: ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ເປັນ­ຕົ້ນ​ແມ່ນ ຖະ­ໜົນ​ຫົນ­ທາງ ສາຍ​ສົ່ງ​ໄຟ­ຟ້າ ອ່າງ­ເກັບ­ນ້ຳ ຄອງ​ສົ່ງ​ນ້ຳ​ໃຕ້​ເຂື່ອນ ແລະ ສິ່ງ​ອຳ­ນວຍ​ຄວາມ​ສະ­ດວກ​ອື່ນໆ​ທີ່​ໂຄງ­ການ​ສ້າງ​ຂຶ້ນ ເຊິ່ງ​ໄດ້​ສ້າງ​ເງື່ອນ­ໄຂ​ເອື້ອ​ອຳ­ນວຍ​ໃຫ້​ແກ່​ປະ­ຊາ­ຊົນ​ບັນ­ດາ­ເຜົ່າ ຢູ່​ເຂດ​ໃກ້​ຄຽງ​ໄດ້​ຊົມ­ໃຊ້​ໄຟ­ຟ້າ​ຮ່ວມ​ນຳ ອັນ​ເປັນ​ການ​ປະ­ກອບ­ສ່ວນ​ໃຫ້​ແກ່​ການ​ຊຸກ­ຍູ້​ຂະ​ບວນ​ການ​ຜະ­ລິດ​ເປັນ​ສິນ­ຄ້າ ການ​ບໍ­ລິ­ການ ແລະ ການ­ທ່ອງ­ທ່ຽວ ກໍ​ຄື​ການ​ເອື້ອ​ອຳ­ນວຍ​ການ​ປະ­ຕິ­ບັດ​ນະ­ໂຍ­ບາຍ​ການ​ໂຮມ​ບ້ານ​ນ້ອຍ​ເປັນ​ບ້ານ​ໃຫຍ່ ສ້າງ​ຕົວ​ເມືອງ​ນ້ອຍ​ໃນ​ເຂດ​ຊົນ­ນະ­ບົດ ເຮັດ​ໃຫ້​ຊ່ອງ​ວ່າງ​ຄວາມ​ແຕກ​ໂຕນ​ກັນ ລະ­ຫວ່າງ​ຕົວ​ເມືອງ​ກັບ​ຊົນ­ນະ­ບົດ​ນັບ​ມື້​ຫຼຸດ​ລົງ.

    ມາ​ຮອດ​ປັດ­ຈຸ­ບັນ​ນີ້ ໂຄງ­ການ​ພັດ­ທະ­ນາ​ໄຟ­ຟ້າ ສາ­ມາດ​ສັງ​ລວມ​ວຽກ​ງານ​ການ​ຈັດ​ສັນ-ຍົກ­ຍ້າຍ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໄດ້​ທັງ​ໝົດ 200 ກວ່າ​ບ້ານ ມີ 12 ພັນ​ກວ່າ​ຄອບ­ຄົວ​ໃນ​ທົ່ວ​ປະ­ເທດ ມີ​ປະ­ມານ 60 ພັນ​ກວ່າ​ຄົນ ແລະ ນຳ​ໃຊ້​ທຶນ​ເຂົ້າ​ໃນ​ການ​ຈັດ​ສັນ-ຍົກ­ຍ້າຍ​ປະ­ມານ 500 ລ້ານ​ກວ່າ​ໂດ​ລາ​ສະ­ຫະ­ລັດ ໃນ​ນີ້ ໂຄງ­ການ​ທີ່​ໄດ້​ຖືກ​ໂຄງ­ການ​ຈັດ​ສັນ-ຍົກ­ຍ້າຍ ແລະ ຍັບ​ຍ້າຍ​ຫຼາຍ​ກວ່າ​ໝູ່ ແມ່ນ​ໂຄງ­ການ​ເຂື່ອນ​ໄຟ­ຟ້າ​ນ້ຳ​ທາ 1 ໄດ້​ກວມ​ເອົາ 2 ແຂວງ​ຄື: ຫຼວງ​ນ້ຳ​ທາ ແລະ ບໍ່​ແກ້ວ ມີ 37 ບ້ານ 2.098 ຄອບ­ຄົວ ນຳ​ໃຊ້​ທຶນ​ກວ່າ 67 ລ້ານ​ກວ່າ​ໂດ​ລາ​ສະ­ຫະ­ລັດ ໂຄງ­ການ​ເຂື່ອນ​ໄຟ­ຟ້າ​ນ້ຳ​ເທີນ 2 ມີ 16 ບ້ານ 1.310 ຄອບ­ຄົວ ນຳ​ໃຊ້​ທຶນ​ເຖິງ 45 ລ້ານ​ໂດ​ລາ​ສະ­ຫະ­ລັດ ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ແຂວງ​ໄຊ​ຍະ​ບູ​ລີ ກວມ​ເອົາ 2 ແຂວງ​ຄື: ແຂວງ​ໄຊ​ຍະ​ບູ​ລີ ແລະ ຫຼວງ​ພະ​ບາງ​ມີ 15 ບ້ານ 899 ຄອບ­ຄົວ ນຳ​ໃຊ້​ທຶນ 21 ລ້ານ​ໂດ​ລາ​ສະ­ຫະ­ລັດ ໂຄງ­ການ​ເຂື່ອນ​ໄຟ­ຟ້າ​ເທີນ​ຫີນ​ບູນ ກວມ​ເອົາ​ແຂວງ​ບໍ​ລິ​ຄຳ​ໄຊ ແລະ ແຂວງ​ຄຳ​ມ່ວນ​ມີ 12 ບ້ານ 841 ຄອບ­ຄົວ ນຳ​ໃຊ້​ທຶນ 38 ລ້ານ​ກວ່າ​ໂດ​ລາ​ສະ­ຫະ­ລັດ ແລະ ໂຄງ­ການ​ອື່ນໆ.

    ລັດ­ຖະ­ບານ ແລະ ອົງ­ການ​ປົກ­ຄອງ​ແຕ່​ລະ​ຂັ້ນ ຍາມ​ໃດ​ກໍ​ຊົມ­ເຊີຍ​ນ້ຳ­ໃຈ​ເສຍ­ສະ­ຫຼະ ແລະ ຄວາມ​ຕັດ­ສິນ​ໃຈ​ຂອງ​ປະ­ຊາ­ຊົນ​ບັນ­ດາ­ເຜົ່າ​ໃນ​ແຕ່​ລະ​ທ້ອງ­ຖິ່ນ ໂດຍ​ສະ­ເພາະ​ບໍ­ລິ­ເວນ​ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ​ຕ່າງໆ ໄດ້​ໃຫ້­ການ​ສະ­ໜັບ­ສະ­ໜູນ​ຕໍ່​ການ​ພັດ­ທະ­ນາ​ໂຄງ­ການ ໃຫ້​ຄວາມ​ຮ່ວມ​ມື​ໃນ​ການ​ຍົກ­ຍ້າຍ​ບ້ານ​ເກີດ​ເມືອງ​ນອນ​ຂອງ​ຕົນ ບ່ອນ​ທີ່​ເຄີຍ​ດຳ­ລົງ​ຊີ­ວິດ​ມາ​ແຕ່​ບັນ­ພະ­ບຸ­ລຸດ ເພື່ອ​ໃຫ້​ໂຄງ­ການ​ພັດ­ທະ­ນາ​ມີ​ຄວາມ​ສະ­ດວກ ແລະ ມີ​ຜົນ­ສຳ­ເລັດ.

    ສະ­ນັ້ນ ການ​ຈັດ​ກອງ​ປະ­ຊຸມ​ຄັ້ງ​ນີ້ ຈະ​ເປັນ​ໂອ­ກາດ​ທີ່​ດີ​ໃຫ້​ແກ່​ຜູ້​ມີ​ສ່ວນ​ຮ່ວມ​ຈາກ​ທຸກ​ພາກ­ສ່ວນ ໂດຍ​ສະ­ເພາະ​ພາກ​ລັດ ໃນ​ຖາ­ນະ​ຜູ້​ຄຸ້ມ​ຄອງ​ມະ­ຫາ​ພາກ ແລະ ຜູ້​ພັດ­ທະ­ນາ​ໂຄງ­ການ ໄດ້​ສ້າງ​ຄວາມ​ເຂົ້າ­ໃຈ​ຮ່ວມ​ກັນ​ຢ່າງ​ເປັນ​ເອ­ກະ​ພາບ ກ່ຽວ​ກັບ​ບັນ­ຫາ​ພື້ນ­ຖານ​ທີ່​ເປັນ​ອັນ​ລວມ​ທີ່​ນອນ​ຢູ່​ໃນ​ນະ­ໂຍ­ບາຍ​ລະ­ບຽບ ກົດ­ໝາຍ ແລະ ນິ­ຕິ​ກຳ​ກ່ຽວ­ຂ້ອງ ຈະ​ໄດ້​ແລກ­ປ່ຽນ​ເຊິ່ງ​ກັນ ແລະ ກັນ ຈາກ​ພຶດ­ຕິ​ກຳ​ໃນ​ການ​ປະ­ຕິ­ບັດ​ຕົວ​ຈິງ ຕິດ​ພັນ​ກັບ​ການ​ຮຽນ​ຮູ້​ແນວ​ຄວາມ​ຄິດ​ອັນ​ໃໝ່ ເພື່ອນ​ນຳ­ໄປ​ຈັດ​ສັນ-ຍົກ­ຍ້າຍ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ບັນ­ດາ­ເຜົ່າ​ໃຫ້​ດີ​ຂຶ້ນ​ຫຼັງ​ການ​ຍົກ­ຍ້າຍ ເຊິ່ງ​ປັດ­ຈຸ­ບັນ ສປປ ລາວ ມີ​ເຂື່ອນ​ຜະ­ລິດ​ພະ­ລັງ­ງານ​ໄຟ­ຟ້າ​ທັງ​ໝົດ 61 ແຫ່ງ ມີ​ກຳ­ລັງ​ການ​ຕິດ​ຕັ້ງ 7.207 ກວ່າ​ເມ​ກາ​ວັດ ແລະ ສາ­ມາດ​ຜະ­ລິດ​ພະ­ລັງ­ງານ​ໄຟ­ຟ້າ​ໄດ້ 37.300 ກິ​ໂລ​ວັດ​ໂມງ.

ຂ່າວທີ່ກ່ຽວຂ້ອງ