ຈົ່ງພ້ອມກັນປົກປັກຮັກສາ ແລະ ຄຸ້ມຄອງວັດຖຸບູຮານ

335 28 ມ.ນ. 2019 ຂ່າວໜ້າ​ໜຶ່ງ
ຈົ່ງພ້ອມກັນປົກປັກຮັກສາ ແລະ ຄຸ້ມຄອງວັດຖຸບູຮານ

    ກົມ​ມໍ­ລະ­ດົກ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ຈັດ​ກອງ​ປະ­ຊຸມ​ປຶກ­ສາ​ຫາ­ລື ວຽກ​ງານ​ຄຸ້ມ​ຄອງ​ວັດ­ຖຸ­ບູ­ຮານ ແລະ ໂຄ­ສະ­ນາ​ເຜີຍ­ແຜ່​ປູກ​ຈິດ​ສຳ­ນຶກ ກ່ຽວ​ກັບ​ການ​ອະ­ນຸ​ຮັກ​ມໍ­ລະ­ດົກ​ວັດ­ທະ­ນະ­ທຳ ຂຶ້ນ​ວັນ​ທີ 27 ມີ­ນາ 2019 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ບົວ​ເງິນ ຊາ​ພູ​ວົງ ຮອງ​ລັດ­ຖະ­ມົນ­ຕີ ກະ­ຊວງ ຖວທ ມີ​ຫົວ­ໜ້າ​ກົມ ຮອງ​ກົມ ພະ­ແນກ­ການ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ພ້ອມ​ກັນ​ທົບ​ທວນ​ສະ­ພາບ​ກ່ຽວ​ກັບ​ການ​ຄຸ້ມ​ຄອງ​ມໍ­ລະ­ດົກ​ແຫ່ງ​ຊາດ ໃນ​ໄລ­ຍະ​ຜ່ານ​ມາ​ຍົກ​ໃຫ້​ເຫັນ​ດ້ານ​ຕັ້ງ­ໜ້າ ດ້ານ​ຫຍໍ້­ທໍ້ ແລະ ສິ່ງ​ທ້າ​ທາຍ​ໃນ​ຍຸກ​ແຫ່ງ​ການ​ເປີດ​ກວ້າງ ການ​ຮ່ວມ​ມື​ເສດ­ຖະ­ກິດ​ສາ­ກົນ ເພື່ອ​ເພີ່ມ​ທະ​ວີ­ສະ­ຕິ​ຄວາມ​ເປັນ​ເຈົ້າ​ການ ຕໍ່​ການ​ປົກ​ປັກ​ຮັກ­ສາ​ມໍ­ລະ­ດົກ​ລວມ​ຂອງ​ວົງ​ຄະ­ນາ​ຍາດ​ແຫ່ງ​ຊາດ ພ້ອມ​ທັງ​ຈະ​ໄດ້​ເຊື່ອມ​ຊຶມ​ນິ­ຕິ​ກຳ​ແຫ່ງ​ຊາດ ໃນ​ຂົງ­ເຂດ​ມໍ­ລະ­ດົກ​ວັດ­ທະ­ນະ­ທຳ ກົດ­ໝາຍ​ມໍ­ລະ­ດົກ​ແຫ່ງ​ຊາດ ແລະ ກົດ­ໝາຍ​ອື່ນໆ​ທີ່​ກ່ຽວ­ຂ້ອງ ລວມ​ທັງ​ຈະ​ໄດ້​ພ້ອມ​ກັນ​ປຶກ­ສາ​ຫາ­ລື​ບາງ​ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ ການ​ບຸ­ກລຸກ​ແຫຼ່ງ​ບູ­ຮານ​ວິ­ທະ­ຍາ ການ​ລັກ­ລອບ-ຄ້າ­ຂາຍ​ວັດ­ຖຸ­ບູ­ຮານ ຂະ​ບວນ​ການ​ສຳ​ຫຼວດ​ຊອກ​ຄົ້ນ​ວັດ­ຖຸ­ບູ­ຮານ-ວັດ­ຖຸ​ມີ­ຄ່າ ທີ່​ມີ­ຄ່າ​ທີ່​ບໍ່​ແມ່ນ​ອົງ­ການ​ວິ­ຊາ​ສະ­ເພາະ​ກ່ຽວ­ຂ້ອງ ແລະ ບັນ­ຫາ​ສຳ­ຄັນ​ອື່ນໆ.

    ທ່ານ ບົວ​ເງິນ ຊາ​ພູ​ວົງ ໄດ້​ກ່າວ​ວ່າ: ໄລ­ຍະ​ຜ່ານ​ມາ ການ​ນຳ​ກະ­ຊວງ ຖວ​ທ ກໍ​ຄື​ກົມ​ມໍ­ລະ­ດົກ ໄດ້​ເອົາ­ໃຈ­ໃສ່​ວຽກ​ງານ​ຄຸ້ມ​ຄອງ​ມໍ­ລະ­ດົກ​ເປັນ​ຢ່າງ​ດີ ໂດຍ​ສະ­ເພາະ​ພະ​ແນກ ຖວທ ໄດ້​ເອົາ­ໃຈ­ໃສ່​ເສີມ​ຂະ­ຫຍາຍ​ໃນ​ການ​ປົກ​ປັກ​ຮັກ­ສາ ສົ່ງ­ເສີມ​ນຳ​ໃຊ້​ຄຸນ­ຄ່າ​ຂອງ​ມໍ­ລະ­ດົກ ຕາມ​ທິດ​ຍືນ​ຍົງ​ດ້ວຍ​ຮູບ​ການ­ຈັດ­ຕັ້ງ​ຜັນ​ຂະ­ຫຍາຍ​ກົດ­ໝາຍ​ມໍ­ລະ­ດົກ​ນິ­ຕິ​ກຳ​ທີ່​ກ່ຽວ­ຂ້ອງ​ຈຳ­ນວນ​ໜຶ່ງ ຜົນ­ງານ​ທີ່​ພົ້ນ​ເດັ່ນ​ແມ່ນ​ປະ­ກາດ​ແຂວງ​ຫຼວງ​ພະ​ບາງ ແລະ ວັດ​ພູ​ຈຳ­ປາ​ສັກ ເປັນ​ມໍ­ລະ­ດົກ​ໂລກ ພິ­ເສດ​ແມ່ນ​ສຽງ​ແຄນ​ລາວ ອົງ­ການ​ອຸຍ​ເນັດ​ສະ​ໂກ ໄດ້​ຮັບ​ເປັນ​ມໍ­ລະ­ດົກ​ຂອງ​ລາວ ແລະ ຍັງ​ມີ​ການ​ກະ­ກຽມ​ຍື່ນ​ເອ­ກະ­ສານ ເພື່ອ​ຮັບ­ຮອງ​ເອົາ​ທົ່ງ​ໄຫ​ຫີນ​ຊຽງ​ຂວາງ ແລະ ຫີນ​ໜາມ​ໜໍ່​ຂຶ້ນ​ເປັນ​ມໍ­ລະ­ດົກ​ໂລກ ແລະ ພວມ​ຫ້າງ​ຫາ​ກະ­ກຽມ​ນຳ​ສະ­ເໜີ​ລຳ­ວົງ​ລາວ ວັດ­ທະ­ນະ­ທຳ​ອື່ນໆ​ຕື່ມ​ອີກ ສະ­ເພາະ​ສະ­ຖານ­ທີ່​ມໍ­ລະ­ດົກ​ທີ່​ຂຶ້ນ​ບັນ­ຊີ ນວ ມີ​ຈຳ­ນວນ 16 ແຫ່ງ ສະ­ຖານ­ທີ່​ເຫຼົ່າ­ນັ້ນ ກາຍ­ເປັນ​ແຫຼ່ງ​ທ່ອງ​ທ່ຽວ​ນຳ​ຜົນ​ປະ­ໂຫຍດ​ທາງ​ດ້ານ​ເສດ­ຖະ­ກິດ ສ້າງ​ລາຍ​ຮັບ​ເຂົ້າ​ປະ­ເທດ ເພື່ອ​ສືບ­ຕໍ່​ປົກ​ປັກ​ຮັກ­ສາ​ມໍ­ລະ­ດົກ​ຂອງ​ຊາດ ກໍ​ຄື​ການ​ຄຸ້ມ​ຄອງ​ວັດ­ຖຸ­ບູ­ຮານ​ແບບ​ຍືນ​ຍົງ ຮຽກ­ຮ້ອງ​ທຸກ​ພາກ­ສ່ວນ ຕ້ອງ​ພ້ອມ​ກັນ​ເປັນ​ເຈົ້າ​ການ ໃນ​ການ​ປົກ​ປັກ​ຮັກ­ສາ.

ຂ່າວທີ່ກ່ຽວຂ້ອງ