ເປີດບໍລິສັດບຳລຸງຮັກສາທຸກສາຍການບິນທີ່ເຂົ້າລາວ

286 28 ມ.ນ. 2019 ຂ່າວໜ້າ​ໜຶ່ງ
ເປີດບໍລິສັດບຳລຸງຮັກສາທຸກສາຍການບິນທີ່ເຂົ້າລາວ

    ພິ­ທີ​ເປີດ​ໃຫ້​ບໍ­ລິ­ການ​ຂອງ​ບໍ­ລິ­ສັດ ເຄ​ຊີ ອາ​ເວ​ຊັ່ນ ເຊີ​ວິດສ໌ ຈຳ­ກັດ ຈັດ​ຂຶ້ນ​ວັນ​ທີ 25 ມີ­ນາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ມີ​ທ່ານ​ນາງ ວິ­ໄລ​ຄຳ ໂພ​ສາ​ລາດ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ບັນ­ດາ​ຫົວ­ໜ້າ​ກົມ​ກ່ຽວ­ຂ້ອງ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ປັດ­ຈຸ­ບັນ ສາຍ​ການ­ບິນ​ຂອງ​ຕ່າງ­ປະ­ເທດ ໄດ້​ເຂົ້າ​ມາ​ໃຊ້​ບໍ­ລິ­ການ​ຢູ່​ສະ­ໜາມ​ບິນ​ສາ­ກົນ​ຂອງ​ລາວ​ເຮົາ​ເພີ່ມ​ຂຶ້ນ ຈຶ່ງ​ເຮັດ​ໃຫ້​ກົມ​ການ­ບິນ​ພົນ​ລະ​ເຮືອນ ໄດ້​ພິ­ຈາ­ລະ­ນາ​ເລື່ອງ​ຄວາມ​ປອດ​ໄພ​ການ­ບິນ​ເປັນ​ກໍ­ລະ­ນີ​ພິ­ເສດ ໂດຍ​ຄົ້ນ­ຄວ້າ​ໃຫ້​ມີ​ບໍ­ລິ­ສັດ​ໃດ​ໜຶ່ງ ເປັນ​ຜູ້​ໃຫ້​ບໍ­ລິ­ການ​ດ້ານ​ບຳ­ລຸງ​ຮັກ­ສາ ສ້ອມ­ແປງ​ເຮືອ­ບິນ ແລະ ອຸ­ປະ­ກອນ​ຮັບ​ໃຊ້​ພາກ​ພື້ນ​ດິນ ເພື່ອ​ໃຫ້​ສອດ­ຄ່ອງ​ກັບ​ມາດ­ຕະ­ຖານ​ການ­ບິນ​ສາ­ກົນ ໃນ​ນັ້ນ ບໍ­ລິ­ສັດ ເຄ​ຊີ ອາ​ເວ​ຊັ່ນ ເຊີ​ວິດສ໌ ຈຳ­ກັດ ເຊິ່ງ​ເປັນ​ບໍ­ລິ­ສັດ​ດຽວ​ໃນ​ລາວ ທີ່​ມີ​ຄວາມ​ພ້ອມ​ໃນ​ທຸກ​ດ້ານ ໄດ້​ຮັບ​ຄວາມ​ໄວ້​ວາງ­ໃຈ​ຈາກ​ພາກ­ສ່ວນ​ກ່ຽວ­ຂ້ອງ ໃຫ້​ເປັນ​ຜູ້​ບໍ­ລິ­ການ ແລະ ເບິ່ງ­ແຍງ​ທຸກ​ສາຍ​ການ­ບິນ​ທີ່​ບິນ​ເຂົ້າ​ມາ​ລາວ.

    ທ່ານ ວັນ­ເພັງ ຈັນ­ທະ​ພອນ ຫົວ­ໜ້າ​ກົມ​ການ­ບິນ​ພົນ​ລະ​ເຮືອນ ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ກ່າວ​ວ່າ: ວຽກ​ງານ​ຂົນ­ສົ່ງ​ທາງ​ອາ­ກາດ ເປັນ​ວຽກ​ໜຶ່ງ​ທີ່​ສຳ­ຄັນ ໃນ​ການ​ສ້າງ​ລາຍ​ຮັບ ແລະ ເປັນ​ໃບ​ໜ້າ​ຂອງ​ປະ­ເທດ​ເຮົາ ປັດ­ຈຸ­ບັນ​ມີ​ເສັ້ນ­ທາງ​ບິນ​ຈາກ​ຕ່າງ­ປະ­ເທດ ເຂົ້າ​ມາ​ສະ­ໜາມ​ບິນ​ສາ­ກົນ​ວັດ​ໄຕ​ທັງ​ໝົດ 19 ສາຍ​ການ­ບິນ ອີງ­ໃສ່​ສະ­ຕິ​ຖິ​ຂົນ­ສົ່ງ​ໃນ​ສະ­ໜາມ​ບິນ​ສາ­ກົນ​ວັດ​ໄຕ​ສະ­ເລ່ຍ 12% ຕໍ່​ປີ ໂດຍ​ປີ 2018 ມີ​ຄົນ​ເຂົ້າ-ອອກ​ສາຍ​ຕ່າງ­ປະ­ເທດ 1,6 ລ້ານ​ກວ່າ​ຄົນ ຄາດ​ວ່າ 2025 ຈະ​ເພີ່ມ​ຂຶ້ນ 2,8 ລ້ານ​ຄົນ ສະ­ນັ້ນ ເພື່ອ​ຮອງ​ຮັບ​ການ​ຂົນ­ສົ່ງ​ທາງ​ອາ­ກາດ​ທີ່​ເພີ່ມ​ຂຶ້ນ​ໃນ​ອະ­ນາ­ຄົດ ໃຫ້​ມີ​ຄວາມ​ປອດ​ໄພ​ສູງ​ສຸດ ແລະ ອີງ​ຕາມ​ການ​ສະ­ເໜີ​ຂອງ​ບໍ­ລິ­ສັດ​ພວກ​ເຮົາ ກໍ່​ໄດ້​ພິ­ຈາ­ລະ­ນາ​ຢ່າງ​ຮີບ​ດ່ວນ ແລະ ເຫັນ​ວ່າ​ມີ​ຄວາມ​ຈຳ­ເປັນ​ແທ້ ຈະ​ຕ້ອງ​ມີ​ບໍ­ລິ­ສັດ​ເພື່ອ​ບໍ­ລິ­ການ​ໃຫ້​ສາຍ​ການ­ບິນ​ຕ່າງ­ປະ­ເທດ ທີ່​ມາ​ໃຊ້​ບໍ­ລິ­ການ​ສະ­ໜາມ​ບິນ​ຂອງ​ພວກ​ເຮົາ ເພາະ​ທີ່​ຜ່ານ​ມາ​ມີ​ພຽງ​ບໍ­ລິ­ສັດ​ຂອງ​ສາຍ​ການ­ບິນ​ເອງ ທີ່​ໃຫ້​ບໍ­ລິ­ການ​ລະ­ຫວ່າງ​ສາຍ​ການ­ບິນ​ດ້ວຍ​ກັນ ເຊິ່ງ​ບໍ່​ໄດ້​ຮັບ​ອະ­ນຸ­ຍາດ​ຈາກ​ກົມ​ການ­ບິນ​ພົນ​ລະ​ເຮືອນ ແລະ ພວກ​ເຮົາ​ບໍ່​ສາ­ມາດ​ຮັບ­ປະ­ກັນ​ເຖິງ​ຄວາມ​ປອດ​ໄພ​ຂອງ​ສາຍ​ການ­ບິນ​ໄດ້ ຈຶ່ງ​ຕ້ອງ​ມີ​ບໍ­ລິ­ສັດ​ເພື່ອ​ໃຫ້​ບໍ­ລິ­ການ ແລະ ໃຫ້​ສອດ­ຄ່ອງ​ຕາມ​ລະ­ບຽບ​ການ​ຂອງ​ການ­ບິນ​ສາ­ກົນ.

    ທ່ານ​ນາງ ຄັດ​ທະ​ຈັນ ຈັນ­ທະ​ບູ​ລີ ປະ­ທານ​ບໍ­ລິ­ສັດ ເຄ​ຊີ ອາ​ເວ​ຊັ່ນ ເຊີ​ວິດສ໌ ຈຳ­ກັດ (KCAS) ໃຫ້​ຮູ້​ຕື່ມ​ວ່າ: ບໍ­ລິ­ສັດ​ພວກ​ເຮົາ​ສ້າງ­ຕັ້ງ​ຂຶ້ນ​ວັນ​ທີ 13 ກໍ­ລະ­ກົດ 2018 ເຊິ່ງ​ເປັນ​ບໍ­ລິ­ສັດ​ດຽວ​ໃນ​ລາວ ທີ່​ມີ​ຄວາມ​ພ້ອມ​ດ້ານ​ການ​ບຳ­ລຸງ​ຮັກ­ສາ ສ້ອມ­ແປງ​ເຮືອ­ບິນ ແລະ ອຸ­ປະ­ກອນ​ຮັບ​ໃຊ້​ພາກ​ພື້ນ​ດິນ ເຊິ່ງ​ມີ​ຊ່ຽວ­ຊານ​ທັງ​ພາຍ​ໃນ ແລະ ຕ່າງ­ປະ­ເທດ ທີ່​ມີ​ປະ­ສົບ​ການ​ຫຼາຍ​ກວ່າ 10 ປີ ທີ່​ຖືກ​ຮັບ­ຮອງ​ໂດຍ​ກົມ​ການ­ບິນ​ພົນ​ລະ​ເຮືອນ ສ່ວນ​ບັນ­ດາ​ເຄື່ອງ­ມື ແລະ ອຸ­ປະ­ກອນ​ຮັບ​ໃຊ້​ໃນ​ການ​ປະ­ຕິ­ບັດ​ງານ ໄດ້​ຮັບ​ການ​ກວດ­ກາ​ມາດ­ຕະ­ຖານ​ຈາກ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນອກ​ນີ້​ຍັງ​ໄດ້​ຮັບ​ຄວາມ​ໄວ້​ວາງ­ໃຈ​ຈາກ​ລັດ​ວິ​ສາ​ຫະ​ກິດ​ການ­ບິນ​ລາວ ໃນ​ການ​ຮ່ວມ​ມື​ກັນ​ດ້ານ​ການ​ບຳ­ລຸງ​ຮັກ­ສາ​ສ້ອມ­ແປງ​ເຮືອ­ບິນ ແລະ ຈະ​ໄດ້​ເບິ່ງ­ແຍງ​ທຸກ​ສາຍ​ການ­ບິນ​ທີ່​ບິນ​ເຂົ້າ​ມາ​ລາວ​ນຳ​ອີກ.

ຂ່າວທີ່ກ່ຽວຂ້ອງ