ລາວ-ຈີນ ຮ່ວມມືເຜີຍແຜ່ຂໍ້ມູນຜ່ານສອງລະບົບ

254 28 ມ.ນ. 2019 ຂ່າວໜ້າ​ໜຶ່ງ
ລາວ-ຈີນ ຮ່ວມມືເຜີຍແຜ່ຂໍ້ມູນຜ່ານສອງລະບົບ

    ໜັງ­ສື­ພິມ​ວຽງ​ຈັນ​ທາມ (Vientiane Times) ໄດ້​ເຊັນ​ບົດ​ບັນ­ທຶກ​ຮ່ວມ​ກັບ​ສະ­ມາ­ຄົມ​ສົ່ງ­ເສີມ​ເສດ­ຖະ­ກິດ​ການ​ຄ້າ​ລາວ-ຈີນ ເພື່ອ​ພັດ­ທະ­ນາ​ສອງ​ລະ­ບົບ​ການ​ສົ່ງ​ຂໍ້​ມູນ​ຂ່າວ­ສານ​ຈາກ​ລາວ​ໄປ​ຈີນ ເປັນ​ພາ­ສາ​ຈີນ ຂຶ້ນ​ວັນ​ທີ 25 ມີ­ນາ 2019 ທີ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ຮ່ວມ​ລົງ​ນາມ​ລະ­ຫວ່າງ​ທ່ານ ທອງ​ຫຼໍ່ ດວງ​ສະ­ຫວັນ ຫົວ­ໜ້າ​ບັນ­ນາ­ທິ­ການ​ໜັງ­ສື­ພິມ​ພາ­ສາ​ຕ່າງ­ປະ­ເທດ ແລະ ທ່ານ ອາ­ລັນ ຢາງ ປະ­ທານ​ສະ­ມາ­ຄົມ​ສົ່ງ­ເສີມ​ເສດ­ຖະ­ກິດ​ການ​ຄ້າ​ລາວ-ຈີນ ປະ­ຈຳ​ລາວ ມີ​ທ່ານ ບຸນ​ເລື່ອນ ບຸບ­ຜາ ຫົວ­ໜ້າ​ກົມ​ຮ່ວມ​ມື​ສາ­ກົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ດາວ​ວອນ ພະ­ຈັນ​ທະ​ວົງ ຮອງ​ປະ­ທານ​ສະ­ພາ​ອຸດ­ສາ­ຫະ­ກຳ ແລະ ການ​ຄ້າ​ແຫ່ງ​ຊາດ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທອງ​ຫຼໍ່ ດວງ​ສະ­ຫວັນ ໄດ້​ກ່າວ​ວ່າ: ການ​ເຊັນ​ສັນ­ຍາ​ຄັ້ງ​ນີ້ ເປັນ​ການ​ຮ່ວມ​ມື​ລະ­ຫວ່າງ​ໜັງ­ສື­ພິມ​ວຽງ​ຈັນ​ທາມ ແລະ ສະ­ມາ­ຄົມ​ສົ່ງ­ເສີມ​ເສດ­ຖະ­ກິດ​ການ​ຄ້າ​ລາວ-ຈີນ ເພື່ອ​ຮ່ວມ​ກັນ​ນຳ​ຂໍ້​ມູນ​ຂ່າວ­ສານ​ຂອງ​ໜັງ­ສື­ພິມ​ວຽງ​ຈັນ​ທາມ ທີ່​ແປ​ເປັນ​ພາ­ສາ​ຈີນ ເຜີຍ­ແຜ່​ຜ່ານ​ສອງ​ລະ­ບົບ​ຄື: ເວັບ​ເວີຍ​ປໍ (Weibo) ແລະ ລະ­ບົບ​ວີ​ແຊັດ (Wechat) ເຊິ່ງ​ທັງ​ສອງ​ລະ­ບົບ​ຈະ​ນຳ​ຂໍ້​ມູນ​ຂ່າວ­ສານ​ຂອງ​ໜັງ­ສື­ພິມ​ດັ່ງ­ກ່າວ ໄປ​ເຜີຍ­ແຜ່​ໃຫ້​ປະ­ຊາ­ຊົນ​ຈີນ ແນ­ໃສ່​ໃຫ້​ປະ­ຊາ­ຊົນ​ຈີນ​ໄດ້​ຮັບ​ຮູ້​ຂໍ້​ມູນ​ຂ່າວ­ສານ​ຂອງ​ລາວ​ຫຼາຍ​ຂຶ້ນ ສົ່ງ­ເສີມ​ການ­ທ່ອງ­ທ່ຽວ​ລາວ-ຈີນ ການ​ລົງ­ທຶນ ແລະ ການ​ຮ່ວມ​ມື​ລາວ-ຈີນ​ໃຫ້​ນັບ​ມື້​ຫຼາຍ​ຂຶ້ນ ແລະ ຫວັງ​ວ່າ­ການ​ຮ່ວມ​ມື​ຄັ້ງ​ນີ້ ຈະ​ເປັນ​ການ​ຮ່ວມ​ມື​ທີ່​ສຳ­ຄັນ ໃນ​ການ​ສະ­ໜອງ​ຂໍ້​ມູນ​ຂ່າວ­ສານ ເພື່ອ​ດຶງ​ດູດ​ນັກ​ທ່ອງ​ທ່ຽວ​ຈີນ​ມາ​ທ່ຽວ​ລາວ​ຫຼາຍ​ຂຶ້ນ ຫຼັງ​ຈາກ​ໂຄງ­ການ​ທາງ​ລົດ­ໄຟ​ລາວ-ຈີນ ເປີດ​ນຳ​ໃຊ້​ປີ 2022.

ຂ່າວທີ່ກ່ຽວຂ້ອງ