ເລີ່ມເດືອນເມສານີ້ ຈະປັບໃໝເສຍຄ່າທຳນຽມທາງປີ 2019

369 28 ມ.ນ. 2019 ຂ່າວໜ້າ​ໜຶ່ງ

    ອີງ​ຕາມ​ແຈ້ງ​ການ​ຂອງ​ກະ­ຊວງ​ການ​ເງິນ ກ່ຽວ​ກັບ​ການ​ເສຍ​ຄ່າ​ທຳ­ນຽມ​ທາງ​ປີ 2019 ລົງ​ວັນ​ທີ 15 ກຸມ­ພາ 2019 ໃຫ້​ຮູ້​ວ່າ: ເພື່ອ​ເຮັດ​ໃຫ້­ການ​ເກັບ​ຄ່າ​ທຳ­ນຽມ​ທາງ​ປີ 2019 ໄດ້​ຖືກ​ຈັດ​ຕັ້ງ​ປະ­ຕິ­ບັດ​ທັນ​ຕາມ​ກຳ­ນົດ​ເວ­ລາ ແລະ ມີ​ຄວາມ​ເປັນ​ເອ­ກະ​ພາບ​ໃນ​ຂອບ​ເຂດ​ທົ່ວ​ປະ­ເທດ ກະ­ຊວງ​ການ​ເງິນ​ຈຶ່ງ​ໄດ້​ແຈ້ງ​ມາ​ຍັງ​ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ທີ່​ເປັນ​ເຈົ້າ​ຂອງ​ນຳ​ໃຊ້​ຍານ­ພາ­ຫະ­ນະ ໃນ​ຂອບ​ເຂດ​ທົ່ວ​ປະ­ເທດ​ຊາບ​ທົ່ວ​ເຖິງ​ກັນ​ດັ່ງ­ນີ້: ໄລ­ຍະ​ປົກ­ກະ­ຕິ​ຂອງ​ການ​ເສຍ​ຄ່າ​ທຳ­ນຽມ​ທາງ ແມ່ນ​ໄລ­ຍະ​ເວ­ລາ​ນັບ​ແຕ່​ເດືອນ​ມັງ­ກອນ​ຫາ​ເດືອນ​ມີ­ນາ​ຂອງ​ທຸກ​ປີ ເຊິ່ງ​ເປັນ​ໄລ­ຍະ​ທີ່​ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ຜູ້​ທີ່​ເປັນ​ເຈົ້າ​ຂອງ ຫຼື ນຳ​ໃຊ້​ຍານ­ພາ­ຫະ­ນະ​ມີ​ພັນ­ທະ​ເສຍ​ຄ່າ​ທຳ­ນຽມ​ທາງ​ປະ­ຈຳ​ປີ ຖ້າ​ບໍ່​ເສຍ​ຄ່າ​ທຳ­ນຽມ​ທາງ​ຕາມ​ເວ­ລາ​ດັ່ງ­ກ່າວ ທີ່​ໄດ້​ກຳ­ນົດ​ໄວ້​ຈະ​ຖືກ​ປັບ​ໃໝ​ຕາມ​ແຕ່​ລະ​ກໍ­ລະ­ນີ​ທີ່​ໄດ້​ກຳ­ນົດ​ໄວ້ ດັ່ງ­ນັ້ນ ຖື​ວ່າ­ການ​ເສຍ​ຄ່າ​ທຳ­ນຽມ​ທາງ​ປີ 2019 ຈະ​ໝົດ​ກຳ­ນົດ​ໃນ​ວັນ​ທີ 31 ມີ­ນາ 2019 ແລະ ເລີ່ມ​ວັນ​ທີ 1 ເມ­ສາ 2019 ເປັນ­ຕົ້ນ​ໄປ​ຈະ​ຖືກ​ປັບ­ໄໝ ດັ່ງ­ນັ້ນ ຜູ້​ທີ່​ບໍ່​ທັນ​ໄປ​ເສຍ​ຄ່າ​ທຳ­ນຽມ​ທາງ​ປີ 2019 ກໍ​ໃຫ້​ໄປ​ເສຍ​ຕາມ​ກຳ­ນົດ​ເວ­ລາ​ດັ່ງ­ກ່າວ ບໍ່​ດັ່ງ­ນັ້ນ​ກໍ​ຈະ​ຖືກ​ປັບ​ໃໝ.

    ສຳ­ລັບ​ການ​ເສຍ​ຄ່າ​ທຳ­ນຽມ​ທາງ ແມ່ນ​ມີ​ຄວາມ​ສະ­ດວກ​ສະ­ບາຍ​ໃນ​ປັດ­ຈຸ­ບັນ ກໍ​ຄື​ນັບ​ແຕ່​ປີ 2017 ເປັນ­ຕົ້ນ​ມາ ຖ້າ​ທຽບ­ໃສ່​ເມື່ອ​ກ່ອນ​ທີ່​ເນື່ອງ​ຈາກ​ທາງ​ການ ໄດ້​ຈັດ​ໃຫ້­ການ​ເສຍ​ຫຼາຍ​ຊ່ອງ​ທາງ​ເລືອກ ເປັນ­ຕົ້ນ ຈະ​ໄປ​ບໍ­ລິ­ການ​ເສຍ​ຢູ່​ບ່ອນ​ໃດ​ກໍ​ໄດ້​ຄື: ຊຳ­ລະ​ຜ່ານ​ລະ­ບົບ​ທະ­ນາ­ຄານ​ດ້ວຍ​ທາງ​ເລືອກ: ຊຳ­ລະ​ຜ່ານ​ລະ­ບົບ​ເຄົາ​ເຕີ​ຂອງ​ທະ­ນາ­ຄານ ຊຳ­ລະ​ຜ່ານ​ອອນ​ລາຍ BCEL One ຊຳ­ລະ​ຜ່ານ​ຕູ້​ເອ​ທີ​ເອັມ ຊຳ­ລະ​ຜ່ານ​ສະ­ຖານ­ທີ່​ຈຸດ​ໃຫ້​ບໍ­ລິ­ການ​ທີ່​ໄດ້​ຮັບ​ອະ­ນຸ­ຍາດ ເປັນ­ຕົ້ນ ສ່ວຍ​ສາ​ອາ­ກອນ​ເມືອງ ສູນ​ກວດ­ກາ​ເຕັກ­ນິກ​ລົດ​ທັງ​ພາກ​ລັດ ແລະ ເອ­ກະ​ຊົນ ແລະ ຊຳ­ລະ​ຜ່ານ​ທະ­ນາ­ຄານ​ຕົວ​ແທນ.

ຂ່າວທີ່ກ່ຽວຂ້ອງ