ເບິ່ງບ້ານເຂົາເອົາບົດຮຽນ 28/03/2019

322 28 ມ.ນ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ຂ່າວ​ກ່ຽວ​ກັບ​ການ​ເສີບ​ແກງ​ຫູ​ສະ­ຫຼາມ ຕາມ​ງານ​ລ້ຽງ​ທາງ​ການ​ຢູ່​ເກາະ​ຮົງ​ກົງ ແລະ ປິດ​ທ້າຍ​ກັບ​ຂ່າວ​ກ່ຽວ​ກັບ​ມາດ​ຕະ­ການ​ຂອງ​ອິນ​ໂດຍ​ເນ​ເຊຍ ເພື່ອ​ຊ່ວຍ­ເຫຼືອ​ພົນ­ລະ­ເມືອງ​ຂອງ​ຕົນ​ຢູ່​ຕ່າງ­ປະ­ເທດ.

    ທີ່ ຮົງ​ກົງ: ໃນ​ປັດ­ຈຸ­ບັນ​ກະ­ແສ​ຕ້ານ​ການ​ທໍ­ລະ­ມານ​ສັດ ກໍ​ຄື ຄວາມ​ພະ­ຍາ­ຍາມ​ອະ­ນຸ​ຮັກ​ພັນ​ສັດ​ກຳ­ລັງ​ເປັນ​ກະ­ແສ​ມາ​ແຮງ​ໃນ​ທົ່ວ​ໂລກ ຕົວ­ຢ່າງ​ໜຶ່ງ ກໍ​ຄື ທາງ​ການ​ຂອງ​ຮົງ​ກົງ ເຂດ​ປົກ­ຄອງ​ພິ­ເສດ​ຂອງ ສປ ຈີນ ໄດ້​ປະ­ກາດ​ຢຸດ​ເສີບ​ແກງ​ຫູ​ສະ­ຫຼາມ ເຊິ່ງ​ຖື​ວ່າ​ເປັນ​ອາ­ຫານ​ເລີດ​ລົດ ແລະ ມີ​ລາ­ຄາ​ສູງ ຕະ­ຫຼອດ​ການ​ໃນ​ເກາະ​ແຫ່ງ​ນີ້ ຄຳ​ປະ­ກາດ​ດັ່ງ­ກ່າວ​ມີ​ຂຶ້ນ​ພາຍ­ຫຼັງ​ກຸ່ມ​ອະ­ນຸ​ຮັກ​ສິ່ງ­ແວ­ດລ້ອມ ແລະ ພັນ​ສັດ ໄດ້​ເຄື່ອນ​ໄຫວ​ຮຽກ­ຮ້ອງ​ໃຫ້​ຢຸດ​ເສີບ​ແກງ​ຫູ​ສະ­ຫຼາມ​ຕາມ​ງານ​ລ້ຽງ​ຕ່າງໆ ນອກ­ຈາກ​ຫູ​ສະ­ຫຼາມ​ແລ້ວ ກຸ່ມ​ອະ­ນຸ​ຮັກ​ຍັງ​ຮຽກ­ຮ້ອງ​ໃຫ້​ຢຸດ​ເສີບ​ອາ­ຫານ ປາ­ທູ​ນາ​ບຼູ​ຟິນ ຍ້ອນ​ຢ້ານ​ວ່າ​ມັນ​ຈະ​ສູນ­ພັນ ໃນ​ເບື້ອງ​ຕົ້ນ​ການ​ຢຸດ​ເສີບ​ແກງ​ຫູ​ສະ­ຫຼາມ​ນີ້ ຈະ​ປະ­ຕິ­ບັດ​ກັນ​ຕາມ​ງານ​ລ້ຽງ​ທີ່​ເປັນ​ທາງ​ການ ເພື່ອ​ເປັນ​ຕົວ­ຢ່າງ​ທີ່​ດີ​ສຳ­ລັບ​ສັງ­ຄົມ​ທົ່ວ​ໄປ ຢູ່ ຮົງ​ກົງ ການ​ຄ້າ​ຫູ​ສະ­ຫຼາມ​ນັ້ນ​ບໍ່​ຖື​ວ່າ​ຜິດ​ກົດ­ໝາຍ ຍົກ­ເວັ້ນ​ສະ­ຫຼາມ 3 ສາຍ​ພັນ ຄື: ພັນ​ບາ​ສະ​ຄິນ ສະ­ຫຼາມ​ຂາວ ແລະ ສະ­ຫຼາມ​ວານ​ຮົງ​ກົງ ເປັນ​ຕະ­ຫຼາດ​ໃຫຍ່​ແຫ່ງ​ໜຶ່ງ​ຂອງ​ໂລກ ທີ່​ມີ​ການ​ຄ້າ-ຂາຍ​ຫູ​ສະ­ຫຼາມ ສະ­ຖິ­ຕິ​ຂອງ​ຄະ­ນະ​ກຳ­ມະ­ການ​ສົນ­ທິ­ສັນ­ຍາ​ສາ­ກົນ ວ່າ​ດ້ວຍ​ການ​ຫ້າມ​ຄ້າ​ສັດ­ປ່າ ແລະ ພືດ​ປ່າ​ທີ່​ໃກ້​ຈະ​ສູນ­ພັນ ຊີ້​ອອກ​ວ່າ ໃນ​ແຕ່​ລະ​ປີ ປາ​ສະ­ຫຼາມ​ກວ່າ 70 ລ້ານ​ໂຕ ຖືກ​ຂ້າ​ພຽງ​ເພື່ອ​ເອົາ​ຫູ (ທີ່​ຈິງ​ແມ່ນ​ຄີ) ຂອງ​ພວກ​ມັນ​ມາ​ປຸງ​ເປັນ​ອາ­ຫານ.

    ທີ່ ອິນ​ໂດ​ເນ​ເຊຍ: ເມື່ອ​ສອງ​ປີ​ກ່ອນ​ໜ້າ​ນີ້ ລັດ­ຖະ­ບານ​ອິນ​ໂດ​ເນ​ເຊຍ ໄດ້​ສ້າງ​ລະ­ບົບ​ແອ​ພີ​ເຄ​ຊັນ ຫຼື ແອັບ (APP) ມື​ຖື​ເພີ່ມ​ຊ່ວຍ​ປ້ອງ​ກັນ​ຄວາມ​ປອດ​ໄພ​ໃຫ້​ພົນ­ລະ­ເມືອງ​ອິນ​ໂດ​ເນ​ເຊຍ ທີ່​ເດີນ­ທາງ​ໄປ​ຕ່າງ­ປະ­ເທດ ແອັບ​ທີ່​ວ່າ​ນີ້ ສ້າງ​ຂຶ້ນ​ໂດຍ​ກະ­ຊວງ​ການ​ຕ່າງ­ປະ­ເທດ ເພື່ອ​ໃຫ້​ຄຳ​ແນະ­ນຳ ແລະ ຂໍ້​ມູນ​ອັນ​ຈຳ­ເປັນ​ສຳ­ລັບ​ພົນ­ລະ­ເມືອງ​ທີ່​ເດີນ­ທາງ​ໄປ​ຕ່າງ­ປະ­ເທດ​ຊົ່ວ­ຄາວ ຫຼື ເປັນ​ເວ­ລາ​ດົນ ຜ່ານ​ລະ­ບົບ​ດັ່ງ­ກ່າວ ທາງ​ກະ­ຊວງ​ການ​ຕ່າງ­ປະ­ເທດ ສາ­ມາດ​ຮູ້​ໄດ້​ຈຸດ­ໝາຍ​ປາຍ­ທາງ​ຂອງ​ຄົນ​ອິນ​ໂດ​ເນ​ເຊຍ ທີ່​ພວມ​ເຄື່ອນ​ໄຫວ​ຢູ່​ຈຸດ​ຕ່າງໆ​ໃນ​ທົ່ວ​ໂລກ ແອັບ​ນີ້​ເປັນ​ສ່ວນ​ປະ­ກອບ​ໜຶ່ງ​ຂອງ​ຖານ​ຂໍ້​ມູນ ອີ​ໂປຼ​ເຕັກ​ເຊິນ (eprotection) ຂອງ​ກະ­ຊວງ​ຕ່າງ­ປະ­ເທດ ທີ່​ສັງ​ລວມ​ຂໍ້​ມູນ​ກ່ຽວ​ກັບ​ຊາວ​ອິນ​ໂດ​ເນ​ເຊຍ ຢູ່​ຕ່າງ­ປະ­ເທດ​ທັງ​ໝົດ ແອັບ ເພື່ອ​ຄວາມ​ປອດ​ໄພ​ນີ້ ສະ­ໜອງ​ຂໍ້​ມູນ​ທີ່​ເປັນ​ປະ­ໂຫຍດ​ຮອບ­ດ້ານ ກ່ຽວ​ກັບ​ປະ­ເທດ​ຕ່າງໆ​ທີ່​ຄົນ​ອິນ​ໂດ​ເນ​ເຊຍ​ຕ້ອງ­ການ​ຮູ້ ພ້ອມ​ທັງ​ຂໍ້​ມູນ​ກ່ຽວ​ກັບ​ສະ­ຖານ­ທູດ ສະ­ຖານ­ກົງ­ສູນ​ອິນ​ໂດ​ເນ​ເຊຍ ທີ່­ຢູ່​ໃກ້​ທີ່​ສຸດ ແລະ ບອກ​ແຈ້ງ​ເສັ້ນ­ທາງ​ເພື່ອ​ໄປ​ຫາ​ສະ­ຖານ­ທີ່​ດັ່ງ­ກ່າວ ແອັບ​ນີ້​ຍັງ​ມີ​ປຸ່ມ​ສຸກ​ເສີນ​ສະ­ເພາະ ເພື່ອ​ຮັບ​ລາຍ​ງານ​ຈາກ​ພົນ­ລະ­ເມືອງ​ທີ່​ພວມ​ປະ­ສົບ​ກັບ​ບັນ­ຫາ​ຈົນ­ຕາ­ແຈ ຫຼື ສຸກ​ເສີນ ເພື່ອ​ທາງ​ການ​ຈະ​ໄດ້​ໃຫ້­ການ​ຊ່ວຍ­ເຫຼືອ​ຢ່າງ​ທັນ​ການ ປຸ່ມ​ສຸກ​ເສີນ​ຂຶ້ນ ກັບ​ລະ­ບົບ​ໂທລະ­ສັບ​ສາຍ​ດ່ວນ​ຂອງ​ທາງ​ກະ­ຊວງ ແລະ ສະ­ຖານ­ທູດ-ສະ­ຖານ­ກົງ­ສູນ​ທີ່­ຢູ່​ໃກ້ໆ​ກັບ​ຜູ້​ຕ້ອງ­ການ​ຄວາມ​ຊ່ວຍ­ເຫຼືອ​ສຸກ​ເສີນ ແອັບ​ນີ້​ໄດ້​ຮັບ​ການ​ສ້າງ​ຂຶ້ນ​ໂດຍ​ການ​ຮ່ວມ​ມື​ລະ­ຫວ່າງ​ກະ­ຊວງ​ການ​ຕ່າງ­ປະ­ເທດ ບັນ­ດາ​ສຳ­ນັກ­ງານ​ທ່ອງ​ທ່ຽວ ບັນ­ດາ​ບໍ­ລິ­ສັດ​ປະ­ກັນ​ໄພ ໜ່ວຍ​ງານ​ປົກ​ປ້ອງ​ແຮງ​ງານ ເຄື່ອນ​ຍ້າຍ ແລະ ຊາວ​ອິນ​ໂດ​ເນ​ເຊຍ ທີ່​ອາ­ໄສ​ຢູ່​ຕ່າງ­ປະ­ເທດ.

ຂ່າວທີ່ກ່ຽວຂ້ອງ