ດານມາກ ສ້າງ 9 ເກາະທຽມ ຜະລິດພະລັງງານສະອາດປ້ອນເມືອງຫຼວງ

207 28 ມ.ນ. 2019 ຫົວຂໍ້ຂ່າວອື່ນໆ

    ດານ​ມາກ ເປັນ​ໜຶ່ງ​ໃນ​ປະ­ເທດ​ທີ່​ມີ​ຄວາມ​ກ້າວ­ໜ້າ​ທາງ​ດ້ານ​ພະ­ລັງ­ງານ​ໝູ­ນວຽນ ໂດຍ​ສະ­ເພາະ ພະ­ລັງ­ງານ​ລົມ​ທີ່​ເປັນ​ຫົວ­ໃຈ​ສຳ­ຄັນ ໃນ​ການ​ພັດ­ທະ­ນາ​ອຸດ­ສາ­ຫະ­ກຳ​ພະ­ລັງ­ງານ​ສະ­ອາດ ທີ່​ບໍ່​ສ້າງ​ມົນ​ພາ­ວະ​ທາງ​ອາ­ກາດ​ເມື່ອ​ໄວໆ​ນີ້ ລັດ­ຖະ­ບານ​ດານ​ມາກ ໄດ້​ປະ­ກາດ​ໂຄງ­ການ​ໃຫຍ່​ທີ່​ສະ­ທ້ອນ​ເຖິງ​ຄວາມ​ກ້າວ­ໜ້າ​ອີກ​ຂັ້ນ​ໃນ​ດ້ານ​ນີ້​ນັ້ນ​ຄື ໂຄງ­ການ​ຖົມ​ທະ­ເລ​ສ້າງ​ເກາະ​ທຽມ ຈຳ­ນວນ 9 ເກາະ ນອກ​ຊາຍ​ຝັ່ງ​ທີ່­ຢູ່​ຫ່າງ​ຈາກ​ເມືອງ​ໂຄ​ເປ​ເຮ​ເກນ ເມືອງ​ຫຼວງ​ໄປ​ທາງ​ທິດ­ໃຕ້​ປະ­ມານ 10 ກິ­ໂລ­ແມັດ ເພື່ອ​ຕິດ​ຕັ້ງ​ກົງ­ຫັນ​ລົມ (ພັດ​ລົມ​ໃຫຍ່) ແລະ ກໍ່­ສ້າງ​ໂຮງ­ງານ​ໄຟ­ຟ້າ​ພະ­ລັງ­ງານ ລົມ​ລວມ​ທັງ​ໂຮງ­ງານ​ໄຟ­ຟ້າ​ຈາກ​ຂີ້​ເຫຍື້ອ ກຳ­ນົດ​ເລີ່ມ​ການ​ກໍ່­ສ້າງ ໃນ​ປີ 2022 ຫຼື ອີກ 3 ປີ​ຂ້າງ​ໜ້າ ພາຍ​ໃຕ້​ຊື່​ໂຄງ­ການ “ໂຮລ໌ມມິ​ນີ” (Holmene) ທີ່​ແປ​ວ່າ ໝູ່​ເກາະ​ນ້ອຍໆ.

    ນີ້​ຄື​ໂຄງ­ການ​ທີ່​ໄດ້​ຊື່­ວ່າ​ເປັນ​ໂຄງ­ການ​ທີ່​ຈະ​ເກີດ​ການ​ເວນ​ຄືນ​ທີ່​ດິນ ແລະ ຖົມ​ທະ­ເລ​ທີ່​ມີ​ຂະ­ໜາດ​ໃຫຍ່​ທີ່​ສຸດ ໃນ​ປະ­ເທດ​ກຸ່ມ​ສະ​ແກນ​ດິ​ເນ​ເວຍ​ປົກ​ຄຸມ​ພື້ນ​ທີ່ ປະ­ມານ 3 ລ້ານ​ຕາ­ຕະ­ລາງ​ແມັດ ບໍ­ລິ­ສັດ ເຮີຣ໌​ເບິນ ພາວ​ເວີ ຜູ້​ອອກ​ແບບ​ໂຄງ­ການ ເປັນ​ບໍ­ລິ­ສັດ​ອອກ​ແບບ​ຂອງ​ດານ​ມາກ​ເອງ ສຳ­ນັກ­ງານ​ໃຫຍ່​ຕັ້ງ​ຢູ່​ໃນ​ເມືອງ​ໂຄ​ເປນ​ເຮ​ເກນ ແນວ​ຄິດ​ຫຼັກ​ແມ່ນ​ເນັ້ນ​ໄປ​ທີ່​ການ​ຮັກ­ສາ​ທຳ​ມະ​ຊາດ ແລະ ສິ່ງ­ແວ­ດລ້ອມ.

    ເທິງ​ເກາະ​ທຽມ 9 ເກາະ​ທີ່​ກຳ­ລັງ​ຈະ​ເກີດ​ຂຶ້ນ ນອກ­ຈາກ​ຈະ​ເປັນ​ທີ່​ຕັ້ງ​ຂອງ​ຟາມ​ກັງ​ຫັນ​ລົມ ແລະ ໂຮງ­ງານ​ຜະ­ລິດ​ກະ­ແສ​ໄຟ­ຟ້າ​ແລ້ວ ເກາະ​ທຽມ​ເຫຼົ່າ​ນີ້​ຍັງ​ຈະ​ຖືກ​ໃຊ້​ເປັນ​ສູນ​ພັດ­ທະ­ນາ​ເຕັກ​ໂນ​ໂລ​ຊີ ເປັນ​ສະ­ຖານ­ທີ່​ທ່ອງ​ທ່ຽວ ແລະ ເປັນ​ກຳ­ແພງ​ປ້ອງ​ກັນ​ນ້ຳ​ຖ້ວມ​ໃຫ້​ກັບ​ພື້ນ​ທີ່​ເມືອງ​ແຄມ​ຂອບ​ຊາຍ​ຝັ່ງ​ອີກ​ດ້ວຍ ດິນ​ຖົມ​ເກາະ​ປະ­ມານ 26 ລ້ານ​ແມັດ​ກ້ອນ ຈະ​ເປັນ​ດິນ​ທີ່​ໄດ້​ຈາກ​ໂຄງ­ການ​ຂຸດ​ອຸ​ໂມງ​ລົດ­ໄຟ​ໃຕ້​ດິນ ແລະ ການ​ຂຸດ​ດິນ​ເພື່ອ​ງານ​ກໍ່­ສ້າງ​ອາ­ຄານ​ສູງ.

    ນອກ​ເໜືອ​ຈາກ​ການ​ຜະ­ລິດ​ກະ­ແສ​ໄຟ­ຟ້າ​ຈາກ​ພະ­ລັງ­ງານ​ລົມ​ແລ້ວ ເທິງ​ເກາະ​ທຽມ​ເຫຼົ່າ​ນີ້ ຍັງ​ຈະ​ມີ​ໂຮງ­ງານ​ຜະ­ລິດ​ກະ­ແສ​ໄຟ­ຟ້າ​ຈາກ​ຂີ້​ເຫຍື້ອ ແລະ ນ້ຳ​ທີ່​ປ່ອຍ​ຖິ້ມ (biowaste & wastewater) ເຊິ່ງ​ຕ້ອງ​ໃຊ້​ເຕັກ​ໂນ​ໂລ​ຊີ​ຂັ້ນ​ສູງ​ຂອງ​ດານ​ມາກ ໃນ​ການ​ບຳ­ບັດ ແລະ ແປ​ປ່ຽນ​ຂີ້​ເຫຍື້ອ​ປະ­ເພດ​ຂອງ​ເສຍ​ຊີ­ວະ​ພາບ (ເຊັ່ນ: ສິ່ງ​ປະ­ຕິ­ກູນ​ຈາກ​ຄົນ ແລະ ສັດ ຂີ້​ເຫຍື້ອ​ປຽກ ເສດ​ຊາກ​ພືດ​ຜັກ ຯລຯ) ແລະ ນ້ຳ​ປ່ອຍ​ຖິ້ມ​ມາ​ເປັນ​ແກ໊​ສ​ຊີ­ວະ​ພາບ (biogas) ເພື່ອ​ຜະ­ລິດ​ກະ­ແສ​ໄຟ­ຟ້າ​ໃນ​ລຳ­ດັບ​ຕໍ່​ໄປ ທັ້ງ​ນີ້ ຄາດ​ວ່າ​ໂຮງ­ງານ​ໄຟ­ຟ້າ​ເທິງ​ເກາະ​ທຽມ (ລວມ​ທັງ​ພະ­ລັງ­ງານ​ລົມ ແລະ ພະ­ລັງ­ງານ​ຈາກ​ຂີ້​ເຫຍື້ອ) ຈະ​ສາ­ມາດ​ຜະ­ລິດ​ກະ­ແສ​ໄຟ­ຟ້າ ໄດ້​ປະ­ມານ 300.000 ເມ​ກະ​ວັດ ເຊິ່ງ​ທຽບ​ເທົ່າ 1 ໃນ 4 ຂອງ​ຄວາມ​ຕ້ອງ­ການ​ໃຊ້​ກະ­ແສ​ໄຟ­ຟ້າ​ໂດຍ​ລວມ​ຂອງ​ຊາວ​ເມືອງ​ໂຄ​ເປນ​ເຮ​ເກນ.

    ເກາະ​ທຽມ​ເຫຼົ່າ​ນີ້ ຍັງ​ຈະ​ຊ່ວຍ​ສ້າງ​ການ​ຈ້າງ​ງານ ປະ­ມານ 12.000 ຕຳ­ແໜ່ງ ແລະ ຈະ​ກໍ່­ໃຫ້­ເກີດ​ທຸ­ລະ​ກິດ​ໃໝ່ 380 ຄົນ ການ​ສຶກ​ສາ­ຜົນ​ກະ­ທົບ​ດ້ານ​ສິ່ງ­ແວ­ດລ້ອມ ຈະ​ເລີ່ມ​ຂຶ້ນ​ໃນ​ປີ​ນີ້ (2019) ເລີ່ມ​ກໍ່­ສ້າງ​ປີ 2022 ແລະ ຄາດ​ວ່າ​ຈະ​ແລ້ວ​ສຳ­ເລັດ​ສົມ­ບູນ ໃນ​ປີ 2040 ມູນ​ຄ່າ​ການ​ລົງ­ທຶນ 425 ລ້ານ​ເອີ​ໂຣ.

ຂ່າວທີ່ກ່ຽວຂ້ອງ