ຂ່າວຫຼ້າສຸດ

ຜັນຂະຫຍາຍກອງປະຊຸມໂຕະມົນເພື່ອປະຕິບັດ ປພຍ

473 27 ມ.ນ. 2019 ຂ່າວໜ້າ​ໜຶ່ງ
ຜັນຂະຫຍາຍກອງປະຊຸມໂຕະມົນເພື່ອປະຕິບັດ ປພຍ

    ກອງ​ປະ­ຊຸມ​ເຜີນ​ແຜ່​ການ­ຈັດ­ຕັ້ງ​ຜັນ​ຂະ­ຫຍາຍ​ກອງ​ປະ­ຊຸມ​ໂຕະ­ມົນ ປີ 2018 ແລະ ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (ປພຍ) ຢູ່​ລາວ ຈັດ​ຂຶ້ນ​ວັນ​ທີ 25 ມີ­ນາ 2019 ທີ່​ສູນ​ການ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ (ຫຼັກ 5) ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ມີ​ບັນ­ດາ​ຜູ້­ຕາງ­ໜ້າ​ຈາກ​ກະ­ຊວງ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ເຜີຍ­ແຜ່​ຜົນ​ຂອງ​ກອງ​ປະ­ຊຸມ​ໂຕະ­ມົນ ປະ­ຈຳ​ປີ 2018 ແລະ ກະ­ກຽມ​ກອງ​ປະ­ຊຸມ​ໂຕະ­ມົນ 2019 ພ້ອມ​ກັບ​ເຜີຍ­ແຜ່​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ ປພຍ ຢູ່​ລາວ ໂດຍ​ສະ­ເພາະ ການ​ຜັນ​ຂະ­ຫຍາຍ​ບັນ­ດາ​ເອ­ກະ­ສານ​ສຳ­ຄັນ​ຂອງ ປພຍ ລວມ​ທັງ​ແຜນ​ປະ­ຕິ­ບັດ​ງານ​ແຫ່ງ​ຊາດ ແລະ ແຜນ​ປະ­ຕິ­ບັດ​ວຽກ​ງານ​ສື່­ສານ ໂຄ­ສະ­ນາ ແລະ ເຜີຍ­ແຜ່​ເພື່ອ​ຈັດ​ຕັ້ງ​ປະ­ຕິ­ບັດ​ວາ­ລະ​ປີ 2030 ແນ­ໃສ່​ການ​ສ້າງ​ຄວາມ​ຮູ້ ແລະ ຄວາມ​ເຂົ້າ­ໃຈ​ແກ່​ອົງ​ການ­ຈັດ­ຕັ້ງ​ທັງ​ສູນ​ກາງ-ທ້ອງ­ຖິ່ນ ຕະ­ຫຼອດ​ຮອດ​ປະ­ຊາ­ຊົນ​ໃນ​ຂອບ​ເຂດ​ທົ່ວ​ປະ­ເທດ ແລະ ການ​ເຊື່ອມ​ສານ​ບັນ­ດາ​ຕົວ​ຊີ້​ບອກ ປພຍ ຢູ່​ລາວ ໃຫ້​ສອດ­ຄ່ອງ​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ໃນ​ແຕ່​ລະ​ໄລ­ຍະ.

    ທ່ານ​ຮອງ​ລັດ­ຖະ­ມົນ­ຕີ​ໄດ້​ກ່າວ​ວ່າ: ວຽກ​ງານ​ຂະ​ບວນ​ການ​ໂຕະ­ມົນ ແລະ ບົດ­ບາດ​ການ​ມີ​ສ່ວນ​ຮ່ວມ​ຂອງ​ທຸກ​ຂະ­ແໜງ­ການ​ລັດ ຕິດ​ພັນ​ກັບ​ຂອບ​ການ​ຮ່ວມ​ມື​ລະ­ຫວ່າງ​ລັດ­ຖະ­ບານ ແລະ ບັນ­ດາ​ຄູ່​ຮ່ວມ​ພັດ­ທະ­ນາ​ບົນ​ພື້ນ­ຖານ​ການ​ມີ​ສ່ວນ​ຮ່ວມ​ຂອງ​ທຸກ​ຄົນ ປັບ­ປຸງ​ຊີ­ວິດ​ການ​ເປັນ​ຢູ່ ແລະ ຄວາມ​ສາ­ມາດ​ໃນ​ການ​ປັບ​ຕົວ​ຂອງ​ປະ­ຊາ­ຊົນ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ການ​ປົກ­ຄອງ ການ​ຄຸ້ມ​ຄອງ​ລັດ​ດ້ວຍ​ກົດ­ໝາຍ ແລະ ການ​ມີ​ສ່ວນ​ຮ່ວມ​ໃນ​ການ​ປະ­ກອບ­ສ່ວນ ສ້າງ​ແນວ­ທາງ​ນະ­ໂຍ­ບາຍ​ການ​ພັດ­ທະ­ນາ​ຂອງ​ປະ­ເທດ ໃຫ້​ເປັນ​ການ​ພັດ­ທະ­ນາ​ແບບ​ຍືນ​ຍົງ​ເປັນ​ກ້າວໆ.

ຂ່າວທີ່ກ່ຽວຂ້ອງ