ໃຫ້ບໍລິການ eVisa ແກ່ນັກທ່ອງທ່ຽວເຂົ້າປະເທດ

478 27 ມ.ນ. 2019 ຂ່າວໜ້າ​ໜຶ່ງ

    ອີງ​ຕາມ​ໜັງ­ສື​ແຈ້ງ​ການ​ຂອງ​ກະ­ຊວງ​ການ​ຕ່າງ­ປະ­ເທດ ສະ­ບັບ​ເລກ​ທີ 722/ຫກ.ກກສ ລົງ​ວັນ​ທີ 5 ມີ­ນາ 2019 ໃຫ້​ຊາບ​ວ່າ ລັດ­ຖະ­ບານ​ລາວ ໄດ້​ອະ­ນຸ­ມັດ​ໃຫ້​ກະ­ຊວງ​ການ​ຕ່າງ­ປະ­ເທດ ດຳ­ເນີນ​ໂຄງ­ການ​ອອກ​ວີ​ຊາ​ແບບ​ອອນ​ລາຍ (eVisa) ເຊິ່ງ​ຈະ​ເລີ່ມ​ຈັດ​ຕັ້ງ​ປະ­ຕິ­ບັດ ແລະ ເປີດ​ໃຫ້​ບໍ­ລິ­ການ​ແກ່​ນັກ​ທ່ອງ​ທ່ຽວ​ເປັນ​ທາງ​ການ ໃນ​ເດືອນ​ມິ­ຖຸ­ນາ 2019 ເປັນ­ຕົ້ນ​ໄປ.

    ການ​ບໍ­ລິ­ການ eVisa ເປັນ​ການ­ຈັດ­ຕັ້ງ​ນະ­ໂຍ­ບາຍ​ຂອງ​ລັດ­ຖະ­ບານ ຕາມ​ທິດ​ຫັນ​ເປັນ​ທັນ​ສະ­ໄໝ ເຊິ່ງ​ເປັນ​ທາງ​ເລືອກ​ໜຶ່ງ​ທີ່​ມີ​ຄວາມ​ສະ­ດວກ ແລະ ວ່ອງ­ໄວ ສຳ­ລັບ​ນັກ​ທ່ອງ​ທ່ຽວ​ທີ່​ມີ​ຈຸດ­ປະ­ສົງ​ຂໍ​ວີ​ຊາ​ເຂົ້າ ສປປ ລາວ ພ້ອມ​ທັງ​ຈະ​ເປັນ​ປັດ​ໄຈ​ໜຶ່ງ​ທີ່​ສຳ­ຄັນ​ສຳ­ລັບ​ການ​ຊຸກ­ຍູ້ ແລະ ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ລາວ​ຫຼາຍ​ຂຶ້ນ.

    ປັດ­ຈຸ­ບັນ​ກົມ​ກົງ­ສຸນ​ກະ­ຊວງ​ການ​ຕ່າງ­ປະ­ເທດ ໃນ​ຖາ­ນະ​ເຮັດ​ໜ້າ­ທີ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ອອກ eVisa ໄດ້​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ກະ­ກຽມ​ຢ່າງ­ຮອບ­ດ້ານ ເພື່ອ​ເຮັດ​ໃຫ້​ໂຄງ­ການ​ດັ່ງ­ກ່າວ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ມີ​ປະ​ສິດ­ທິ​ຜົນ ແລະ ທັນ​ເວ­ລາ ໃນ​ນີ້ ໜຶ່ງ​ໃນ​ວຽກ​ງານ​ບຸ­ລິ­ມະ­ສິດ​ແມ່ນ​ການ​ສົ່ງ­ເສີມ ແລະ ປະ­ຊາ­ສຳ­ພັນ​ການ​ອອກ eVisa ໃຫ້​ນັກ​ທ່ອງ​ທ່ຽວ ສາ­ມາດ​ເຂົ້າ​ເຖິງ​ຂໍ້​ມູນ​ການ​ບໍ­ລິ­ການ​ໄດ້​ຢ່າງ​ສະ­ດວກ ວ່ອງ­ໄວ ແລະ ເປັນ​ທີ່​ຮັບ​ຮູ້​ຢ່າງ​ກວ້າງ­ຂວາງ​ໃນ​ສາ­ກົນ.

ຂ່າວທີ່ກ່ຽວຂ້ອງ