ຂ່າວຫຼ້າສຸດ

ຍີ່ປຸ່ນ ໃຫ້ການຊ່ວຍເຫຼືອສ້າງອາຄານຮຽນ 5 ແຂວງ

341 27 ມ.ນ. 2019 ຂ່າວໜ້າ​ໜຶ່ງ
ຍີ່ປຸ່ນ ໃຫ້ການຊ່ວຍເຫຼືອສ້າງອາຄານຮຽນ 5 ແຂວງ

    ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ລັດ­ຖະ­ບານ ແລະ ປະ­ຊາ­ຊົນ​ຍີ່­ປຸ່ນ ໃນ​ໂຄງ­ການ​ກໍ່­ສ້າງ​ໂຮງ­ຮຽນ​ອະ­ນຸ­ບານ ປະ­ຖົມ ແລະ ມັດ​ຖະ​ຍົມ​ຕອນ​ຕົ້ນ ນະ­ຄອນ­ຫຼວງ​ວຽງ​ຈັນ ແຂວງ​ຫຼວງ​ນ້ຳ​ທາ ຫົວ­ພັນ ວຽງ​ຈັນ ແລະ ແຂວງ​ເຊ​ກອງ ລວມ​ທັງ​ໝົດ​ມີ 6 ໂຄງ­ການ ໂຮງ­ຮຽນ​ທີ່­ຢູ່​ພາຍ​ໃຕ້ GDP ມູນ​ຄ່າ​ການ​ຊ່ວຍ­ເຫຼືອ​ປະ­ມານ 548.000 ໂດ​ລາ​ສະ­ຫະ­ລັດ ປະ­ມານ 4 ຕື້​ກວ່າ​ກີບ.

    ພິ­ທີ​ເຊັນ​ສັນ­ຍາ​ໂຄງ­ການ​ເສີມ​ສ້າງ​ຄວາມ​ໝັ້ນ­ຄົງ​ຂອງ​ມະ­ນຸດ ໃນ​ຂັ້ນ​ຮາກ​ຖານ ຂອງ​ໂຄງ­ການ​ກໍ່­ສ້າງ​ໂຮງ­ຮຽນ​ຈຳ­ນວນ​ດັ່ງ­ກ່າວ ຈັດ​ຂຶ້ນ​ວັນ​ທີ 25 ມີ­ນາ 2019 ທີ່​ກະ­ຊວງ​ສຶກ​ສາ​ທິ​ການ ແລະ ກິ­ລາ ຮ່ວມ​ລົງ​ນາມ​ລະ­ຫວ່າງ​ທ່ານ ທາ​ເຄ​ຊິ ຮິ​ກິ​ຮາ​ຣະ ເອກ​ອັກ​ຄະ​ລັດ​ຖະ​ທູດ​ຍີ່­ປຸ່ນ ປະ­ຈຳ ສປປ ລາວ ແລະ ບັນ­ດາ​ທ່ານ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ກ່ຽວ­ຂ້ອງ ໂດຍ​ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ດ້ວຍ​ຕາງ­ໜ້າ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ທາ​ເຄ​ຊິ ຮິ​ກິ​ຮາ​ຣະ ກ່າວ​ວ່າ: ທັງ 6 ໂຄງ­ການ ປະ­ກອບ​ມີ ໂຮງ­ຮຽນ ມຕ 3 ໂຄງ­ການ ໂຮງ­ຮຽນ​ປະ­ຖົມ 2 ໂຄງ­ການ ແລະ ໂຮງ­ຮຽນ​ອະ­ນຸ­ບານ 1 ໂຄງ­ການ ເຊິ່ງ​ໂຮງ­ຮຽນ​ເຫຼົ່າ​ນີ້ ມີ​ສະ­ພາບ​ຊຸດ­ໂຊມ ມີ​ຈຳ­ນວນ​ນັກ­ຮຽນ ແລະ ເດັກ­ນ້ອຍ​ເພີ່ມ​ຂຶ້ນ​ເລື້ອຍໆ ເຮັດ​ໃຫ້​ຫ້ອງ​ຮຽນ​ບໍ່​ພຽງ­ພໍ ສະ­ພາບ​ແວດ​ລ້ອມ​ການ​ສຶກ​ສາ ບໍ່​ໄດ້​ຮັບ​ການ​ປັບ­ປຸງ​ເທົ່າ​ທີ່​ຄວນ ໂຄງ­ການ​ນີ້​ແມ່ນ​ການ​ສ້າງ​ອາ­ຄານ​ຮຽນ​ທີ່​ຫ້ອງ​ຮຽນ 4-6 ຫ້ອງ ແລະ ຫ້ອງ​ນ້ຳ ເພື່ອ​ປັບ­ປຸງ​ສະ­ພາບ​ແວດ​ລ້ອມ​ການ​ສຶກ​ສາ​ໃຫ້​ແກ່​ໂຮງ­ຮຽນ ເຊິ່ງ​ຜ່ານ​ໂຄງ­ການ​ນີ້ ສະ­ພາບ​ແວດ​ລ້ອມ​ການ​ສຶກ​ສາ​ຂອງ​ເດັກ­ນ້ອຍ 52 ຄົນ ແລະ ນັກ­ຮຽນ​ປະ­ມານ 1.500 ຄົນ ຈະ​ໄດ້​ຮັບ​ການ​ປັບ­ປຸງ​ດີ​ຂຶ້ນ ທັງ​ນີ້ ຈະ​ເປັນ​ການ​ສ້າງ​ອະ­ນາ­ຄົດ​ທີ່​ສົດ­ໃສ​ໃຫ້​ແກ່​ນັກ­ຮຽນ​ທຸກ​ຄົນ ພ້ອມ​ດຽວ​ກັນ​ນັ້ນ ກໍ​ເປັນ​ການ​ປະ­ກອບ­ສ່ວນ​ເຂົ້າ​ໃນ​ເສດ­ຖະ­ກິດ-ສັງ­ຄົມ​ຂອງ​ທ້ອງ­ຖິ່ນ ສຳ­ລັບ​ໂຄງ­ການ​ນີ້ ຈະ​ຈັດ​ຕັ້ງ​ປະ­ຕິ­ບັດ ແລະ ດຳ­ເນີນ​ໂຄງ­ການ​ຢ່າງ​ລະ­ອຽດ​ວ່ອງ­ໄວ.

    ພາຍ​ໃຕ້​ໂຄງ­ການ​ດັ່ງ­ກ່າວ ລັດ­ຖະ­ບານ​ຍີ່­ປຸ່ນ​ໄດ້​ໃຫ້­ການ​ຊ່ວຍ­ເຫຼືອ ໃນ​ຂະ­ແໜງ­ການ​ສຶກ​ສາ​ເຖິງ 300 ໂຄງ­ການ ໃນ­ຕໍ່­ໜ້າ​ລັດ­ຖະ­ບານ​ຍີ່­ປຸ່ນ ຈະ​ຜັນ​ຂະ­ຫຍາຍ​ການ​ສະ­ໜັບ­ສະ­ໜູນ​ຕ່າງໆ ໂດຍ​ສະ­ເພາະ​ວຽກ​ງານ​ຂະ­ແໜງ­ການ​ສຶກ​ສາ ໃຫ້​ມີ​ປະ­ສິດ­ທິ­ພາບ ແລະ ວ່ອງ­ໄວ.

ຂ່າວທີ່ກ່ຽວຂ້ອງ