ເບິ່ງບ້ານເຂົາເອົາບົດຮຽນ 27/03/2019

317 27 ມ.ນ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ກ່ຽວ​ກັບ​ວິ­ທີ​ພໍ່​ແມ່ ຊ່ວຍ­ເຫຼືອ​ລູກ​ກຽມ​ສອບ­ເສັງ​ຢູ່ ບຣູ​ໄນ ດາ​ຣູ​ຊາ​ລາມ ເລື່ອງ​ໄທ ກັບ​ການ​ອະ­ນຸ​ຮັກ​ມໍ­ລະ­ດົກ​ພູມ​ປັນ­ຍາ ແລະ ຂ່າວ​ກ່ຽວ​ກັບ​ນະ­ໂຍ­ບາຍ​ສຳ­ລັບ​ຄົນ​ອາ­ຍຸ​ຍືນ​ຢູ່ ຟີ​ລິບ​ປິນ.

    ທີ່ ບຣູ​ໄນ: ມີ​ເລື່ອງ​ອ່າວ​ແປກ​ກ່ຽວ​ກັບ​ຂໍ້​ສະ­ເໜີ​ຂອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ ບຣູ​ໄນ ດາ​ຣູ​ຊາ​ລາມ ໃຫ້​ຜູ້​ເປັນ​ພໍ່​ແມ່ ຊ່ວຍ​ຜູ້​ເປັນ​ລູກ​ໃນ​ບັ້ນ​ສອບ­ເສັງ ຄຳ​ຮຽກ­ຮ້ອງ​ນີ້​ມີ​ຂຶ້ນ​ໃນ​ບັ້ນ​ສອບ­ເສັງ​ນັກ­ຮຽນ​ຂັ້ນ​ປະ­ຖົມ​ທົ່ວ​ປະ­ເທດ ໃນ​ເດືອນ​ຕຸ­ລາ​ປີ 2015 ໃນ​ຂໍ້​ສະ­ເໜີ​ທ່ານ​ລັດ­ຖະ­ມົນ­ຕີ​ໄດ້​ເຕືອນ​ຜູ້​ເປັນ​ພໍ່ ແມ່ ຂອງ​ເດັກ​ນັກ­ຮຽນ ໃຫ້​ເອົາ­ໃຈ­ໃສ່​ເລື່ອງ​ອາ­ຫານ​ການ​ກິນ ແລະ ການ​ພັກ­ຜ່ອນ​ຫຼັບ​ນອນ​ຂອງ​ພວກ​ລູກໆ ກ່ອນ​ຈະ​ເຂົ້າ​ສູ່​ສະ­ໜາມ​ສອບ­ເສັງ​ປະ­ຈຳ​ປີ​ຕົວ​ຈິງ ສ່ວນ​ທ່ານ ຢູ​ສະ​ຣີ ອັບ​ດູນ ກາ​ຟໍ ຜູ້​ຊ່ວຍ​ຫົວ­ໜ້າ​ກົມ​ໜຶ່ງ​ຂອງ​ກະ­ຊວງ​ສຶກ​ສາ ໄດ້​ໃຫ້​ລາຍ​ລະ­ອຽດ​ວ່າ ຜູ້​ເປັນ​ພໍ່ ແມ່ ສາ­ມາດ​ຊ່ວຍ​ລູກໆ​ຂອງ​ພວກ​ຕົນ​ໄດ້​ຫຼາຍ​ວິ­ທີ ໃນ​ການ​ກະ­ກຽມ​ການ​ສອບ­ເສັງ ເຊັ່ນ: ຊ່ວຍ​ໃຫ້​ກຳ­ລັງ​ໃຈ​ດ້ວຍ​ວິ­ທີ​ຍົກ​ຕົວ­ຢ່າງ​ຄວາມ​ຜິດ­ພາດ ຄວາມ​ບຸກ​ບືນ​ຜ່ານ​ຜ່າ​ອຸ­ປະ­ສັກ​ຂອງ​ຕົນ​ເອງ​ໃນ​ໄວ​ຮຽນ ເພື່ອ​ໃຫ້​ພວກ​ລູກໆ​ຫຼີກ​ລ້ຽງ​ຄວາມ​ຜິດ­ພາດ ຄວາມ​ປະ­ໝາດ​ເລີ່ນ​ເລີ້​ດັ່ງ­ກ່າວ ພໍ່ ແມ່ ແລະ ພວກ​ລູກໆ​ຕ້ອງ​ໝັ່ນ​ປຶກ­ສາ​ຫາ­ລື​ກັນ ແລກ­ປ່ຽນ​ບົດ­ຮຽນ​ກັນ​ໃນ​ໄລ­ຍະ​ນີ້ ພໍ່​ແມ່​ຕ້ອງ​ໃຫ້​ພວກ​ລູກໆ​ເຂົ້າ­ໃຈ​ແຕ່​ຫົວ­ທີ​ໂລດ​ວ່າ ເປັນ​ຫຍັງ ພໍ່ ແມ່ ຈຶ່ງ​ວາງ​ລະ­ບຽບ​ເຄັ່ງ​ຄັດ​ເລື່ອງ​ການ​ກິນ ການ​ພັກ­ຜ່ອນ ການ​ຄົ້ນ­ຄວ້າ​ຮ່່ຳ​ຮຽນ​ຂອງ​ລູກໆ​ໃນ​ໄລ­ຍະ​ກະ­ກຽມ​ການ​ສອບ­ເສັງ​ນີ້ ເພື່ອ​ໃຫ້​ຮູ້​ວ່າ ທັງ​ໝົດ​ແມ່ນ​ເພື່ອ​ຜົນ­ສຳ­ເລັດ​ຂອງ​ພວກ​ລຸກໆ​ເອງ ເມື່ອ​ເຂົ້າ­ໃຈ​ແນວ​ນີ້​ແລ້ວ ພວກ​ລູກໆ​ກໍ​ຈະ​ຮູ້​ເຖິງ​ຄວາມ​ຫວັງ​ດີ​ຂອງ ພໍ່ ແມ່ ແລະ ຈະ​ຕັ້ງ­ໃຈ​ຮ່ຳ­ຮຽນ ໂດຍ​ປາ­ສະ­ຈາກ​ຄວາມ​ຄຽດ.

    ທີ່ ປະ­ເທດ​ໄທ: ການ​ປົກ​ປັກ​ຮັກ­ສາ ແລະ ອະ­ນຸ​ຮັກ​ມໍ­ລະ­ດົກ​ທາງ​ພູມ​ປັນ­ຍາ ແມ່ນ​ບັນ­ຫາ​ທີ່​ທາງ​ການ​ໄທ​ໃຫ້​ຄວາມ​ສຳ­ຄັນ​ເປັນ​ຢ່າງ​ຍິ່ງ ແລະ ມີ​ຄວາມ​ລະ­ອຽດ​ເປັນ​ພິ­ເສດ ເຊັ່ນ: ໃນ​ປີ 2014 ກົມ​ສົ່ງ­ເສີມ​ວັດ­ທະ­ນະ­ທຳ ຂອງ​ຄະ­ນະ​ກຳ­ມະ­ການ​ວັດ­ທະ­ນະ­ທຳ​ແຫ່ງ​ຊາດ​ໄທ ໄດ້​ປະ­ກາດ​ຂຶ້ນ​ທະ­ບຽນ​ມໍ­ລະ­ດົກ​ພູມ​ປັນ­ຍາ​ດ້ານ​ວັດ­ທະ­ນະ­ທຳ ຈຳ­ນວນ 68 ລາຍ­ການ ກວມ​ເອົາ 7 ດ້ານ ໃນ​ນັ້ນ ດ້ານ​ສິ­ລະ​ປະ​ການ­ສະ­ແດງ ມີ 10 ເລື່ອງ ດ້ານ​ສິ­ລະ​ປະ​ຊ່າງ​ສີ­ມື 10 ເລື່ອງ ເຊັ່ນ: ການ​ຕ່ຳ​ຜ້າ­ແພ​ເມືອງ​ອຸ­ບົນ ຊ່າງ​ແກະ​ກະ​ໂຫຼກ​ຊໍ ຊ່າງ​ຕອກ​ເຈັ້ຍ ຊ່າງ​ຕີ​ຄຳ­ປິວ ໃນ​ດ້ານ​ວັນ­ນະ­ກຳ​ພື້ນ­ເມືອງ​ນັ້ນ ກໍ​ມີ ບົດ​ສູ່­ຂວັນ ສ້າງ​ເພງ​ແຫ່​ນາງ​ແມວ ບົດ​ເຊີ້ງ​ບຸນ​ບັ້ງ­ໄຟ ພູມ​ປັນ­ຍາ​ກີ­ລາ ກໍ​ມີ ກີ­ລາ​ເສືອ​ຂ້າມ​ຫ້ວຍ ງູ­ກິນ­ຫາງ ຊ່ວງ​ເຮືອ ຕີ​ຂອບ​ກະ­ດົ້ງ... ! ໃນ​ດ້ານ​ຄວາມ​ເຊື່ອ​ທາງ​ສັງ­ຄົມ ມີ 8 ເລື່ອງ ເຊັ່ນ: ການ​ວຽນ­ທຽນ ການ​ແຫ່​ຜ້າ​ຂຶ້ນ​ທາດ ການ​ແຕ່ງ­ດອງ ພິ­ທີ­ກຳ​ຂໍ​ຝົນ ງານ​ບຸນ​ທາງ​ສາ­ສະ­ໜາ​ພຸດ... ນອກ​ນັ້ນ ກໍ​ຍັງ​ມີ​ເລື່ອງ​ອາ­ຫານ​ການ​ກິນ ແລະ ພາ­ສາ ແຕ່​ປີ 2009 ຫາ​ປີ 2014 ທາງ​ການ​ໄທ ໄດ້​ຂຶ້ນ​ທະ­ບຽນ​ມໍ­ລະ­ດົກ​ພູມ​ປັນ­ຍາ​ແລ້ວ 2.018 ລາຍ­ການ ມີ 7 ດ້ານ.

    ທີ່ ຟີ​ລິບ​ປິນ: ຄົນ​ອາ­ຍຸ​ຍືນ​ເຖິງ 100 ປີ ຢູ່​ຟີ​ລິບ​ປິນ ນັ້ນ ໄດ້​ຮັບ​ນະ­ໂຍ­ບາຍ​ສະ­ໜັບ­ສະ­ໜູນ​ເປັນ​ພິ­ເສດ ພາຍ​ໃຕ້​ກົດ­ໝາຍ​ວ່າ​ດ້ວຍ​ຄົນ​ອາ­ຍຸ​ຍືນ​ຮອດ 100 ປີ ທີ່​ປະ­ກາດ​ໃຊ້​ໃນ​ປີ 2016 ໂດຍ​ຜູ້​ອາ­ຍຸ​ຍືນ​ແຕ່­ລະ­ຄົນ​ຈະ​ໄດ້​ຮັບ​ເງິນ ຈຳ­ນວນ 1 ແສນ​ເປ​ໂຊ (ປະ­ມານ 2.000 ໂດ​ລາ​ສະ­ຫະ­ລັດ) ນອກ­ຈາກ​ເງິນ​ຈາກ​ກະ­ຊວງ​ສະ­ຫວັດ­ດີ​ການ-ສັງ­ຄົມ ແລະ ການ​ພັດ­ທະ­ນາ​ແລ້ວ ຜູ້​ມີ​ອາ­ຍຸ 100 ປີ ຍັງ​ຈະ​ໄດ້​ຮັບ​ໜັງ­ສື​ຮັບ​ຮູ້ ແລະ ຊົມ­ເຊີຍ​ຈາກ​ທ່ານ​ປະ­ທາ­ນາ­ທິ­ບໍ­ດີ ແລະ ຈະ​ໄດ້​ຮັບ​ນະ­ໂຍ­ບາຍ​ເປັນ​ລາ­ງວັນ​ຈາກ​ເມືອງ ຫຼື ທ້ອງ­ຖິ່ນ ບ່ອນ​ຜູ້​ອາ­ຍຸ​ຍືນ​ອາ­ໄສ​ຢູ່​ອີກ​ດ້ວຍ.

ຂ່າວທີ່ກ່ຽວຂ້ອງ