ສິດສະເໝີພາບ ຍິງ-ຊາຍ

279 27 ມ.ນ. 2019 ຫົວຂໍ້ຂ່າວອື່ນໆ

    ມີ​ມິດ​ຮັກ​ເພື່ອນ​ຜູ້​ອ່ານ​ເຈົ້າ​ປະ­ຈຳ ຄໍ​ລຳ​ສັງ­ຄົມ​ກົດ­ໝາຍ​ຂອງ​ໜັງ­ສື­ພິມ​ວຽງ​ຈັນ​ໃໝ່​ພວກ​ເຮົາ​ທ່ານ​ໜຶ່ງ ຜູ້​ບໍ່​ປະ­ສົງ​ເອີ່ຍ​ນາມ ຝາກ​ຖາມ​ສ່ອງ​ແສງ​ເຂົ້າ​ມາ​ກ່ຽວ​ກັບ​ສິດ​ສະ­ເໜີ​ພາບ ຍິງ-ຊາຍ ຕໍ່­ໜ້າ​ກົດ­ໝາຍ​ນີ້ ມີ​ສິດ​ສະ­ເໝີ­ພາບ​ຕໍ່­ໜ້າ​ກົດ­ໝາຍ​ແທ້​ບໍ່ ຫຼື ເປັນ​ພຽງ​ທິດ​ສະ​ດີ (ນິ­ຕິ​ໄນ) ແຕ່​ໃນ​ພາກ​ປະ­ຕິ­ບັດ​ຕົວ​ຈິງ (ພຶດ­ຕິ­ໄນ) ຜັດ​ບໍ່​ແມ່ນ​ແນວ​ນັ້ນ ເຊິ່ງ​ເພິ່ນ​ຝາກ​ຖາມ​ເຂົ້າ​ມາ 3 ບັນ­ຫາ​ຄື:

    ຄຳ​ຖາມ​ທີ​ໜຶ່ງ: ເປັນ​ຫຍັງ​ຜົວ​ມີ​ຊູ້​ຈຶ່ງ​ມີ​ຫຼາຍ ແລະ ເປັນ​ເລື່ອງ​ປົກ­ກະ­ຕິ ແຕ່​ຖ້າ​ເມຍ​ມີ​ຊູ້​ຜັດ­ວ່າ​ເປັນ​ເລື່ອງ​ໃຫຍ່ ສັງ­ຄົມ​ຮັບ​ບໍ່​ໄດ້ ?.

    ຕອບ: ຊິ​ຜົວ​ມີ​ຊູ້ ຫຼື ເມຍ​ມີ​ຊູ້ ກໍ​ມີ​ຄວາມ​ຜິດ​ຄື​ກັນ ເພາະ​ການ​ມີ​ຊູ້​ຄື​ການ​ທຳ​ມິດ­ສາ­ຈານ​ມີ​ໂທດ​ຕາມ​ມາດ­ຕາ 126 ຂອງ​ກົດ­ໝາຍ​ວ່າ​ດ້ວຍ​ອາ­ຍາ​ທີ່​ວ່າ: ບຸກ­ຄົນ​ຜູ້​ໃດ​ທີ່​ມີ​ເມຍ ຫຼື ຜົວ ຫາກ​ໄດ້​ເສບ​ສົມ​ກັບ​ຜູ້​ອື່ນ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່ 3 ເດືອນ​ຫາ 1 ປີ ຫຼື ດັດ​ສ້າງ​ໂດຍ​ບໍ່​ຕັດ​ອິດ­ສະ­ຫຼະ­ພາບ ແລະ ຈະ​ຖືກ​ປັບ​ໃໝ ແຕ່ 500.000 ກີບ​ຫາ 5.000.000 ກີບ ຂະ­ນະ​ທີ່​ຄູ່​ທຳ​ມິດ​ສະ​ຈານ (ຊູ້) ກໍ​ຈະ​ຖືກ​ລົງ­ໂທດ​ໃນ​ສະ­ຖານ​ດຽວ​ກັນ ແຕ່​ຜົວ​ມີ​ຊູ້​ຈຶ່ງ​ມີ​ຫຼາຍ ແລະ ເປັນ​ເລື່ອງ​ປົກ­ກະ­ຕິ ສ່ວນ​ເມຍ​ມີ​ຊູ້​ຜັດ­ວ່າ​ເປັນ​ເລື່ອງ​ໃຫຍ່ ສັງ­ຄົມ​ຮັບ​ບໍ່​ໄດ້ ຍ້ອນ​ບູ­ຮານ​ກ່າວ​ໄວ້: “ຊາຍ 10 ຊູ້​ຄອງ​ເມືອງ​ເພິ່ນ​ບໍ່​ວ່າ ຍິງ 1 ຊູ້​ຄອງ​ບ້ານ​ເພິ່ນ​ບໍ່​ເອົາ”.

    ຄຳ​ຖາມ​ທີ​ສອງ: ເປັນ​ຫຍັງ​ມາດ­ຕາ 8 ຂອງ​ກົດ­ໝາຍ​ຄອບ­ຄົວ​ຈຶ່ງ​ວ່າ ຍິງ-ຊາຍ ບໍ່​ທັນ​ໄດ້​ແຕ່ງ­ດອງ ແຕ່​ໄດ້​ຮ່ວມ​ປະ­ເວ­ນີ​ກັນ​ກ່ອນ ຖ້າ​ຝ່າຍ​ຊາຍ​ບໍ່​ເອົາ​ຝ່າຍ​ຍິງ ຈະ​ຖືກ​ປັບ​ໃໝ ແຕ່​ຖ້າ​ຝ່າຍ​ຍິງ​ບໍ່​ເອົາ​ຝ່າຍ​ຊາຍ ຈະ​ບໍ່​ເສຍ​ເງິນ​ຄ່າ​ປັບ​ໃໝ (ຖື​ວ່າ​ຈາວ​ກັນ) ?.

    ຕອບ: ກໍ­ລະ­ນີ​ນີ້​ຫຼາຍ​ຄົນ​ອາດ​ຈະ​ເວົ້າ​ວ່າ ຝ່າຍ​ຊາຍ​ເປັນ​ຝ່າຍ​ເສຍ­ປຽບ​ຝ່າຍ​ຍິງ ແຕ່​ຄວາມ​ສະ­ເໝີ­ພາບ​ລະ­ຫວ່າງ ຍິງ-ຊາຍ ກັບ​ຄວາມ​ເປັນ​ຈິງ​ທາງ​ດ້ານ​ສະ­ລີ­ລະ​ຮ່າງ­ກາຍ ກໍ​ຕ້ອງ​ຈຳ­ແນກ​ໃຫ້​ອອກ​ຢ່າງ​ຈະ­ແຈ້ງ ເພາະ​ຖ້າ​ກົດ­ໝາຍ​ຫາກ​ລະ­ບຸ​ວ່າ ຝ່າຍ​ໃດ​ປ່ຽນ​ໃຈ​ບໍ່​ເອົາ​ຈະ​ເປັນ​ຝ່າຍ​ຍິງ ຫຼື ຝ່າຍ​ຊາຍ ກໍ​ຕ້ອງ​ຖືກ​ປັບ​ໃໝ​ຄື​ກັນ​ກໍ​ບໍ່​ໄດ້ ເພາະ​ສະ­ລີ­ລະ​ຮ່າງ­ກາຍ​ຝ່າຍ​ຍິງ​ເປັນ​ຝ່າຍ​ເສຍ­ປຽບ​ຝ່າຍ​ຊາຍ ຖ້າ​ມີ​ການ​ຮ່ວມ​ເພດ​ກ່ອນ​ແຕ່ງ­ດອງ​ກັນ​ຂຶ້ນ ຝ່າຍ​ຍິງ​ມີ​ຄວາມ​ສ່ຽງ​ຈະ​ຖື­ພາ​ຄາ​ທ້ອງ (ລູກ​ບໍ່​ມີ​ພໍ່) ສ່ວນ​ຝ່າຍ​ຊາຍ​ບໍ່​ສາ­ມາດ​ຖື­ພາ​ໄດ້.

    ຄຳ​ຖາມ​ທີ​ສາມ: ເປັນ​ຫຍັງ​ຜູ້​ຊາຍ​ຈຶ່ງ​ຕ້ອງ​ເປັນ​ຝ່າຍ​ຈ່າຍ​ຄ່າ​ດອງ​ໃຫ້​ຜູ້­ຍິງ ສ່ວນ​ຢູ່​ປະ­ເທດ​ອິນ​ເດຍ​ຜູ້­ຍິງ​ຄື​ເປັນ​ຝ່າຍ​ຫາ​ເງິນ​ໄປ​ແຕ່ງ​ເອົາ​ຜູ້​ຊາຍ ?.

    ຕອບ: ກໍ​ຍ້ອນ​ວ່າ​ກ່ອນ​ມີ​ກົດ­ໝາຍ​ຄອບ­ຄົວ ລາວ​ເຮົາ​ເຄີຍ​ມີ​ຮີດ­ຄອງ​ປະ­ເພ­ນີ​ແຕ່​ບູ­ຮານ​ນະ​ການ​ມາ​ວ່າ ໃຫ້​ຜູ້​ຊາຍ​ເຊິ່ງ​ເປັນ​ເພດ​ທີ່​ແຂງ­ແຮງ ໃຫ້­ຫາ​ເງິນ​ໄປ​ແຕ່ງ​ເອົາ​ຜູ້­ຍິງ​ທີ່​ເປັນ​ເພດ​ອ່ອນ­ແອ​ກວ່າ ແລະ ມາ​ຮອດ​ປັດ­ຈຸ­ບັນ ເມື່ອ​ສ້າງ​ກົດ­ໝາຍ​ຄອບ­ຄົວ (ມາດ­ຕາ 6 ເນີ​ໄປ​ຫາ​ອ່ານ​ຕື່ມ) ຂຶ້ນ​ມາ ເພິ່ນ​ກໍ​ຖື​ເອົາ​ຮີດ­ຄອງ​ປະ­ເພ­ນີ​ດັ່ງ­ກ່າວ​ເປັນ​ບ່ອນ​ອີງ ສ່ວນ​ປະ­ເທດ​ອິນ​ເດຍ ເຂົາ​ມີ​ຮີດ­ຄອງ​ແນວ​ນັ້ນ​ແຕ່​ໃດ​ມາ ພໍ​ຕອນ​ນີ້ ເຂົາ​ກໍ​ສ້າງ​ກົດ­ໝາຍ​ໂດຍ​ອີງ​ຕາມ​ຮີດ​ເກົ່າ​ຄອງ​ເດີມ​ຂອງ​ເຂົາ​ເຊັ່ນ​ກັນ.

    ແນວ­ໃດ​ກໍ​ຕາມ ກົດ­ໝາຍ​ພື້ນ­ຖານ (ກົດ­ໝາຍ​ແມ່) ໂດຍ​ລວມ​ແລ້ວ ກໍ​ຍັງ​ຢືນ­ຢັນ​ຄວາມ​ເທົ່າ​ທຽມ​ກັນ​ຂອງ​ເພດ ຍິງ-ຊາຍ ເຊິ່ງ​ໃນ​ລັດ​ຖະ​ທຳ​ມະ­ນູນ ແຫ່ງ ສປປ ລາວ ສະ­ບັບ​ປັບ­ປຸງ​ໃໝ່​ຄັ້ງ​ທີ​ສອງ ປີ 2015 ມາດ­ຕາ 35 ກໍ​ໄດ້​ລະ­ບຸ​ໄວ້​ຢ່າງ​ຈະ​ແຈ້ງ­ວ່າ: ພົນ­ລະ­ເມືອງ​ລາວ​ໂດຍ​ບໍ່​ຈຳ­ແນກ ຍິງ-ຊາຍ ຖາ­ນະ​ທາງ​ດ້ານ​ສັງ­ຄົມ ລະ­ດັບ​ການ​ສຶກ​ສາ ຄວາມ​ເຊື່ອ​ຖື ແລະ ຊົນ­ເຜົ່າ ລ້ວນ​ແຕ່​ມີ​ຄວາມ​ສະ­ເໝີ­ພາບ​ຕໍ່­ໜ້າ​ກົດ­ໝາຍ.

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ