ຂ່າວຫຼ້າສຸດ

ຣອນ​ນີ ກັບ​ຂຶ້ນ​ເປັນ​ມື 1 ຂອງ​ໂລກ​ໃນ​ຮອບ 9 ປີ

285 27 ມ.ນ. 2019 ວົງຈອນກີລາ
ຣອນ​ນີ ກັບ​ຂຶ້ນ​ເປັນ​ມື 1 ຂອງ​ໂລກ​ໃນ​ຮອບ 9 ປີ

     ຣອນ​ນີ ໂອ​ຊຸນ​ລີ​ແວນ ນັກ​ສະນຸກ​ເກີ​ຊາວ​ອັງກິດ ອາຍຸ 43 ປີ ອະດີດ​ແຊັມ​ໂລກ 5 ສະໄໝ ກັບ​ມາ​ເປັນ​ມື 1 ຂອງ​ໂລກ​ອີກ​ຄັ້ງ ນັບ​ແຕ່​ປີ 2010 ຫຼັງ​ຈາກ​ຄວ້າ​ແຊັມ​ລາຍການ Tour Cham pionship 2019 ທີ່​ປະເທດ​ເວວ ໃນ​ວັນ​ທີ 24 ມີນາ 2019   ລາຍການ​ນີ້​ເປັນ​ລາຍການ​ໃໝ່​ໃນ​ປະຕິທິນ​ສະນຸກ​ເກີ​ໂລກ ຊີງ​ເງິນ​ລາງວັນ​ລວມ 375.000 ປອນ ຫຼື ປະມານ 4,24 ຕື້​ກີບ ໂດຍ​ຄັດ​ເອົາ​ນັກ​ສະນຸກ​ເກີ​ທີ່​ມີ​ການ​ສະ​ສົມ​ເງິນ​ລາງວັນ​ສູງ​ສຸດ 1 ໃນ 8 ຂອງ​ໂລກ​ໃນ​ລະດູ​ການ​ນີ້.

    ຄູ່​ຊີງ​ຊະນະ​ເລີດ​ເປັນ​ການ​ພົບ​ກັນ​ລະຫວ່າງ​ຣອນ​ນີ ໂອ​ຊຸນ​ລີ​ແວນ ມື 2 ຂອງ​ລາຍການ​ຈາກ​ອັງກິດ​ພົບ​ກັບ​ນຽວ​ໂຣ​ເບີ​ສັນ​ມື 4 ຂອງ​ລາຍການ​ຈາກ​ອົດ​ສະ​ຕຣາ​ລີ ຄູ່​ນີ້​ພົບ​ກັນ 3 ຄັ້ງ​ກ່ອນ​ໜ້າ​ນີ້​ເປັນ​ຣອນ​ນີ​ທີ່​ເອົາ​ຊະນະ​ໄດ້​ທັງ 3 ຄັ້ງ ມາ​ໃນ​ຄັ້ງ​ນີ້ ຣອນ​ນີ​ຍັງ​ເປັນ​ຝ່າຍ​ເຮັດ​ໄດ້​ດີ​ກວ່າ ການ​ແຂ່ງຂັນ​ພາກ​ທີ​ໜຶ່ງ ຣອນ​ນີ​ຄອງ​ຄວາມ​ໄດ້​ປຽບ​ກ່ອນ 5-3 ເຟມ ແຕ່​ມາ​ພາກ​ທີ 2 ນຽວ ໂຣ​ເບີ​ສັນ ຫຼິ້ນ​ດີ​ຂຶ້ນ​ໄລ່​ຕີ​ສະເໝີ 8-8 ເຟມ ມາ​ຕັດສິນ​ພາກ​ທີ​ສາມ ເປັນ​ຣອນ​ນີ​ກັບ​ມາ​ຫຼິ້ນ​ໄດ້​ດີ​ຄືນ​ເອົາ​ຊະນະ 13-11 ເຟມ ຄວ້າ​ແຊັມ​ສະນຸກ​ເກີ​ສະ​ສົມ​ຄະແນນ​ໂລກ​ເປັນ​ລາຍການ​ທີ 36 ຕະຫຼອດ​ອາຊີບ​ເທົ່າ​ກັບ​ສະຖິຕິ​ສູງ​ສຸດ​ຂອງ ສະຕີ​ເຟັນ ເຮັນ​ຣີ ອະດີດ​ນັກ​ສະນຸກ​ເກີ​ຊື່​ດັງ​ຊາວ​ສະ​ກັອດ​ແລນ ແລະ ເປັນ​ການ​ຄວ້າ​ແຊັມ 2 ລາຍການ​ຕິດຕໍ່​ກັນ​ຕໍ່​ຈາກ ລາຍການ The Player Championship 2019 ທີ່​ອັງກິດ ທີ່​ຊະນະ ນຽວ ໂຣ​ເບີດ​ສັນ 10-4 ເຟຣມ.

    ຈາກ​ໄຊຊະນະ​ດັ່ງກ່າວ​ເຮັດ​ໃຫ້ ຣອນ​ນີ ໄດ້​ຄະແນນ ແລະ ເງິນ​ລາງວັນ​ອີກ 150.000 ປອນ ຫຼື ປະມານ 1,69 ຕື້​ກີບ ແຊງ ມາກ ເຊວ​ບີ ເພື່ອນ​ຮ່ວມ​ຊາດ ກັບ​ຂຶ້ນ​ເປັນ​ມື 1 ຂອງ​ໂລກ​ອີກ​ຄັ້ງ​ໃນ​ຮອບ 9 ປີ ຜົນງານ​ຂອງ ຣອນ​ນີ ໃນ​ປີ​ນີ້​ສຸດ​ເດັ່ນ ແຂ່ງ 10 ລາຍການ ເຂົ້າ​ຊີງ 7 ລາຍການ ຄວ້າ​ແຊັມ​ໄດ້ 5 ລາຍການ ລົງ​ແຂ່ງ​ໄປ 43 ນັດ ຊະນະ​ໄປ 38 ນັດ.

ຂ່າວທີ່ກ່ຽວຂ້ອງ