ຂ່າວຫຼ້າສຸດ

​ມສ ວຽງ​ຈັນ​ ກຽມ​ເຂົ້າ​ຮ່ວມ​ດຶງເຊືອກ​ຊີງ​ແຊັມ​ອາ​ຊຽນ

288 27 ມ.ນ. 2019 ວົງຈອນກີລາ
​ມສ ວຽງ​ຈັນ​ ກຽມ​ເຂົ້າ​ຮ່ວມ​ດຶງເຊືອກ​ຊີງ​ແຊັມ​ອາ​ຊຽນ

   ທ່ານ ໄຕລັດ ພຸດ​ທະ​ວົງ ຮອງ​ປະທານ ແລະ ເລຂາທິການ​ສະຫະພັນ​ກີລາ​ດຶງເຊືອກ​ແຫ່ງ​ຊາດ​ລາວ​ໃຫ້​ຮູ້ເມື່ອ​ບໍ່​ດົນ​ມາ​ນີ້​ວ່າ:ອີງ​ຕາມ​ຄຳ​ເຊີນ​ຂອງ​ສະມາຄົມ​ກີລາ​ດຶງເຊືອກ​ແຫ່ງ​ປະເທດ​ໄທ ແລະ ສູນ​ສຶກ​ສາ​ຂັ້ນ​ພື້ນຖານ ແລະ ສະຖານີ​ໂທລະພາບ ກຽມ​ຈັດການ​ແຂ່ງຂັນ​ກີລາ​ດຶງເຊືອກ​ຊີງ​ແຊັມ​ອາ​ຊຽນ ຮຸ່ນ​ອາຍຸ​ບໍ່​ເກີນ 16 ປີ ທີ່​ປະເທດ​ໄທ ເພື່ອ​ເປັນ​ການ​ສົ່ງເສີມ​ນັກຮຽນ​ໃຫ້​ຫັນ​ມາ​ຫຼິ້ນ​ກີລາ​ດຶງເຊືອກ​ໃຫ້​ຖືກ​ຫຼັກ​ສາກົນ ທັງ​ເປັນ​ການ​ສົ່ງເສີມ​ຄວາມ​ສາມັກຄີ​ໃນ​ກຸ່ມ​ນັກຮຽນ​ອາ​ຊຽນ ພ້ອມ​ກັນ​ພັດທະນາ​ຄວາມ​ພ້ອມ​ໄປ​ສູ່​ທີມ​ຊາດ​ໃນ​ອະນາຄົດ.

    ສຳລັບ​ການ​ແຂ່ງຂັນ​ຄັ້ງ​ນີ້​ຈະ​ມີ 4 ປະເທດ​ເຂົ້າ​ຮ່ວມ​ເຊັ່ນ:ໄທ ເຈົ້າພາບ ມີ 13 ທີມ ​ມສ ວຽງ​ຈັນ ຕົວ​ແທນ​ຈາກ​ລາວ ຈະ​ສົ່ງ​ເຂົ້າ​ຮ່ວມ 2 ທີມ​ຍິງ-ຊາຍ ກຳປູເຈຍ 2 ທີມ ແລະ ມຽນ​ມາ 2 ທີມ​ຈະ​ຈັດ​ແຂ່ງຂັນ​ຢູ່ 2 ສະໜາມ​ຄື:ສະໜາມ​ທຳ​ອິດ ແຂ່ງຂັນ​ວັນ​ທີ 21-23 ພຶດສະພາ 2019 ຢູ່​ໂຮງຮຽນ​ມຸກດາ​ຫານ ແຂວງ​ມຸກດາ​ຫານ ປະເທດ​ໄທ ສ່ວນ​ສະໜາມ​ທີ​ສອງ ຈະ​ແຂ່ງຂັນ​ວັນ​ທີ 9-11 ສິງຫາ 2019 ຢູ່​ໂຮງຮຽນ​ພຸດ​ທະ​ໂສ​ທອນ ແຂວງ​ສະ​ເຊິງ​ເຊົາ ປະເທດ​ໄທ.

   ປັດຈຸບັນ​ທີມ ​ມສ ວຽງ​ຈັນ ໄດ້​ມີ​ການເຝິກແອບ​ມາ​ແຕ່​ເດືອນ​ມັງກອນ 2019 ເປັນຕົ້ນ​ມາ ແລະ ມີ​ຄວາມ​ພ້ອມ​ທາງ​ດ້ານ​ເຕັກນິກ ພະລະ​ກຳລັງ 90% ເຊິ່ງ​ພວກ​ເຮົາ​ຈະ​ສູ້​ຊົນ​ໃຫ້​ທີມ​ຍິງ-ຊາຍ​ຜ່ານ​ເຂົ້າ​ໄປ​ຫຼິ້ນ​ໃນ​ຮອບ​ຊີງ​ຊະນະ​ເລີດ​ໃຫ້​ໄດ້ ເນື່ອ​ຈາກ​ນັກກີລາ ​ມສ ວຽງ​ຈັນ ໄດ້​ມີ​ການ​ກະກຽມ​ຄວາມ​ພ້ອມ​ໃນ​ການ​ແຂ່ງຂັນ​ຄັ້ງ​ນີ້. 

ຂ່າວທີ່ກ່ຽວຂ້ອງ