ເຊີນ​ທ່ຽວ​ຊົມ​ງານ​ວາງສະແດງ​ສິນຄ້າ​ເຟີ​ນິ​ເຈີ​ວຽງ​ຈັນ

151 26 ມ.ນ. 2019 ຂ່າວໜ້າ​ໜຶ່ງ
ເຊີນ​ທ່ຽວ​ຊົມ​ງານ​ວາງສະແດງ​ສິນຄ້າ​ເຟີ​ນິ​ເຈີ​ວຽງ​ຈັນ

   ພິທີ​ເປີດ​ງານ​ວາງສະແດງ​ສິນຄ້າ​ເຟີ​ນິ​ເຈີ​ວຽງ​ຈັນ ຄັ້ງ​ທີ 4 ຂອງ​ສະມາຄົມ​ເຟີ​ນິ​ເຈີ​ລາວ ຈັດ​ຂຶ້ນ​ວັນ​ທີ 25 ມີນາ 2019 ທີ່​ສູນ​ການ​ຄ້າ​ລາວ-ໄອ​ເຕັກ ນະຄອນຫຼວງ​ວຽງ​ຈັນ ມີ​ທ່ານ ພັນ​ທອງ ພິດ​ທຸມມາ ຮອງ​ລັດຖະມົນຕີ ກະຊວງ​ອຸດສາຫະກຳ ແລະ ການ​ຄ້າ ທ່ານ ເບີ​ລິນ ເພັດ​ຈັນທະ​ຣາດ ຫົວໜ້າ​ພະ​ແນກ​ອຸດສາຫະກຳ ແລະ ການ​ຄ້າ ນະຄອນຫຼວງ​ວຽງ​ຈັນ ທ່ານ ກອງ​ມາລາ ພົມມາ​ໄລ ຮອງ​ປະທານ​ສະມາຄົມ​ເຟີ​ນິ​ເຈີ​ລາວ ພ້ອມ​ດ້ວຍ​ຄະນະ​ຮັບຜິດຊອບ​ຈັດ​ງານ ຜູ້​ປະກອບ​ການ​ຫົວໜ່ວຍ​ທຸລະ​ກິດ ແລະ ແຂກ​ຖືກ​ເຊີນ​ເຂົ້າ​ຮ່ວມ.

   ທ່ານ ຄຳ​ປຸ່ນ ເຈົ້າ​ພະ​ສີ​ຮົມ​ຂາວ ຮອງ​ປະທານ​ສະ​ມະ​ຄົມ​ເຟີ​ນິ​ເຈີ​ລາວ ກ່າວ​ວ່າ: ເພື່ອ​ເປັນ​ການຈັດຕັ້ງ​ປະຕິບັດ ແລະ ຜັນ​ຂະຫຍາຍ​ຕາມ​ເນື້ອ​ໃນ​ຈິດໃຈ​ຂອງ​ຂັ້ນ​ເທິງ​ວາງ​ອອກ​ໃຫ້​ປາກົດ​ຜົນ​ເປັນ​ຈິງ ທັງ​ເປັນ​ການ​ອະນຸ​ຮັກ ຮັກສາ​ປ່າໄມ້ ການ​ນຳ​ໃຊ້​ໄມ້​ໃຫ້​ເກີດ​ປະໂຫຍດ​ສູງ​ສຸດ ແລະ ມີ​ໄມ້​ໄວ້​ໃຊ້​ຢ່າງ​ຍືນ​ຍົງ​ດ້ວຍ​ການ​ປຸງ​ແຕ່ງ​ໃຫ້​ເປັນ​ຜະລິດ​ຕະ​ພັນ​ສຳເລັດ​ຮູບ​ມາ​ຈາກ​ໄມ້ ຫວາຍ ແລະ ໄມ້ປ່ອງ ໃຫ້​ຫຼາກ​ຫຼາຍ​ຜະລິດ​ຕະ​ພັນ ຕາມ​ທີ່​ສັງຄົມ​ປັດຈຸບັນ​ຕ້ອງການ ແລະ ເປັນ​ທີ່​ນິຍົມ​ກັນ​ຢ່າງ​ກວ້າງຂວາງ ດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະໄໝ ແລະ ທັງ​ເປັນ​ການ​ສ້າງ​ມູນ​ຄ່າ​ເພີ່ມ​ໃຫ້​ກັບ​ຜະລິດ​ຕະ​ພັນ​ເຟີ​ນິ​ເຈີ​ໄມ້​ລາວ​ກາຍເປັນ​ສິນຄ້າ​ທີ່​ມີ​ຄຸນ​ນະ​ພາບ ແລະ ລາຄາ​ສູງ ຖືກ​ກັບ​ຄວາມ​ຕ້ອງການ​ຂອງ​ລູກ​ຄ້າ ແລະ ຕະຫຼາດ ເຮັດ​ໃຫ້​ສາມາດ​ສົ່ງ​ອອກ​ໄປ​ຕ່າງປະເທດ​ໄດ້ ເປັນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ກັບ​ປະຊາຊົນ​ບັນດາເຜົ່າ ຕ້ານ​ໄພ​ວ່າງ​ງານ ແລະ ຊ່ວຍ​ໃຫ້​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ໃນ​ອະນາຄົດ ເພື່ອ​ສົ່ງເສີມ ແລະ ສ້າງ​ຄວາມ​ເຂັ້ມແຂງ​ໃຫ້​ກັບ​ນາຍ​ຊ່າງ​ໄມ້​ຂອງ​ລາວ ແລະ ຫົວໜ່ວຍ​ທຸລະ​ກິດ​ເຟີ​ນິ​ເຈີ​ໃຫ້​ຂະຫຍາຍຕົວ ແລະ ສາມາດ​ເຂົ້າ​ສູ່​ຕະຫຼາດ​ພາກ​ພື້ນ ແລະ ສາກົນ​ໄດ້.

   ງານ​ວາງສະແດງ​ສິນຄ້າ​ເຟີ​ນິ​ເຈີ​ຄັ້ງ​ນີ້​ໄດ້​ຈັດ​ຂຶ້ນ​ວັນ​ທີ 23-31 ມີນາ 2019 ມີ​ຫ້ອງ​ວາງສະແດງ​ຂາຍ​ສິນຄ້າ​ທັງ​ໝົດ 180 ຫ້ອງ ມາ​ຈາກ 75 ຫົວໜ່ວຍ​ທຸລະ​ກິດ ໃນ​ນັ້ນ ມີ​ຫົວໜ່ວຍ​ທີ່​ເປັນ​ໂອ​ດ໋ອບ 20 ຫົວໜ່ວຍ ມາ​ຈາກ​ຕ່າງ​ແຂວງ 17 ຫົວໜ່ວຍ 20 ຫ້ອງ ຈາກ 10 ແຂວງ​ໃນ​ຂອບ​ເຂດ​ທົ່ວ​ປະເທດ ຄາດ​ຄະເນ​ຈະ​ມີ​ມູນ​ຄ່າ​ການ​ຊື້-ຂາຍ​ໃນ​ງານ​ປະມານ 20 ຕື້​ກີບ ແລະ ຄາດ​ວ່າ​ຈະ​ມີ​ການ​ຊື້-ຂາຍ​ໄດ້ 80% ເປັນ​ມູນ​ຄ່າ 16 ຕື້​ກີບ ແລະ ຄາດ​ວ່າ​ຈະ​ມີ​ຜູ້​ເຂົ້າ​ຮ່ວມ​ທ່ຽວ​ຊົມ​ງານ​ປະມານ 250.000 ຄົນ.

   ນອກ​ນີ້ ເພື່ອ​ເຮັດ​ໃຫ້​ມີ​ຫຼາຍ​ສີສັນ ແລະ ຄຶກຄື້ນ​ມ່ວນຊື່ນ ສ້າງ​ຄວາມ​ປະ​ທັບ​ໃຈ​ໃຫ້​ແກ່​ຜູ້​ມາ​ຊື້-ຂາຍ​ສິນຄ້າ ແລະ ຜູ້​ມາ​ທ່ຽວ​ຊົມ​ຄັ້ງ​ນີ້ ຄະນະ​ກຳມະການ​ຈັດ​ງານ​ໄດ້​ຈັດ​ໃຫ້​ມີ​ຫຼາຍ​ກິດຈະກຳ​ເຊັ່ນ: ການ​ຄັດ​ເລືອກ​ຄວາມ​ສາມາດ​ພິເສດ​ຂອງ​ເດັກນ້ອຍ ສຳ​ມະ​ນາ​ອົບຮົມ​ການ​ຂຽນ​ແຜນ​ທຸລະ​ກິດ​ເພື່ອ​ເຂົ້າ​ຫາ​ແຫຼ່ງ​ທຶນ SME ແລະ ຊົມ​ການ ສະແດງ​ຮ້ອງເພງ​ຈາກ​ນັກ​ຮ້ອງ​ທີ່​ມີ​ຊື່​ສຽງ​ທັງ​ພາຍ​ໃນ ແລະ ຕ່າງປະເທດ​ອີກ​ດ້ວຍ ດັ່ງນັ້ນ ຂໍ​ເຊີນຊວນ​ປະຊາຊົນ​ລາວ​ບັນດາເຜົ່າ ໂດຍ​ສະເພາະ​ຊາວ​ນະຄອນຫຼວງ​ວຽງ​ຈັນ ເຂົ້າ​ທ່ຽວ​ຊົມ​ງານ​ຕາມ​ວັນ​ເວລາ​ດັ່ງກ່າວ​ນັບ​ແຕ່ 10-22:00 ໂມງ ເຊິ່ງ​ພາຍ​ໃນ​ງານ​ມີ​ສິນຄ້າ​ທີ່​ຜະລິດ​ຈາກ​ນາຍ​ຊ່າງ​ລາວ​ທີ່​ມີ​ຄວາມ​ງົດ​ງາມ ແລະ ເປັນ​ເອກະລັກ​ສະເພາະ​ໄວ້​ຄອຍ​ບໍລິການ​ໃຫ້​ລູກ​ຄ້າ​ໄດ້​ຊື້​ໄປ​ຊົມໃຊ້.     

ຂ່າວທີ່ກ່ຽວຂ້ອງ