ວ່າ​ຈ້າງ​ບໍລິສັດ​ທີ່​ປຶກສາ​ໂຄງການ​ພັດທະນາ​ແຄມ​ຂອງ​ໄລຍະ II

347 26 ມ.ນ. 2019 ຂ່າວໜ້າ​ໜຶ່ງ
ວ່າ​ຈ້າງ​ບໍລິສັດ​ທີ່​ປຶກສາ​ໂຄງການ​ພັດທະນາ​ແຄມ​ຂອງ​ໄລຍະ II

     ພິທີ​ລົງ​ນາມ​ສັນຍາ​ວ່າ​ຈ້າງ​ບໍລິສັດ​ທີ່​ປຶກສາ​ໂຄງການ​ກໍ່ສ້າງ​ປ້ອງ​ກັນ​ຕະ​ຝັ່ງ​ເຈື່ອນ ແລະ ພັດທະນາ​ແຄມ​ຂອງ​ໄລຍະ II ຈັດ​ຂຶ້ນ​ວັນ​ທີ 22 ມີນາ 2019 ຢູ່​ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ (​ຍທຂ ນວ) ລະຫວ່າງ​ທ່ານ ເດດ​ສົງຄາມ ທຳ​ມະ​ວົງ ຫົວໜ້າ​ພະ​ແນກ ​ຍທຂ ນວ ແລະ ທ່ານ Moon Yong Ju ຜູ້ອຳນວຍການ​ບໍລິສັດ Saman Cooperation ສ ເກົາຫຼີ ມີ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ເຈົ້າເມືອງ-ຮອງ​ເຈົ້າເມືອງ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

   ໂຄງການ​ກໍ່ສ້າງ​ປ້ອງ​ກັນ​ຕະ​ຝັ່ງ​ເຈື່ອນ ແລະ ພັດທະນາ​ແຄມ​ຂອງ​ໄລຍະ II ເປັນ​ໂຄງການ​ບຸລິມະສິດ​ຂອງ​ລັດຖະບານ ກໍ​ຄື ນວ ເຊິ່ງ​ນອນ​ຢູ່​ໃນ​ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VIII ເປັນ 1 ໃນ 16 ໂຄງການ​ໃຫຍ່​ລະດັບ​ຊາດ ທີ່​ຕ້ອງ​ໄດ້​ປະຕິບັດ​ຕາມ​ມະຕິ​ກອງ​ປະຊຸມ​ໃຫຍ່​ອົງຄະ​ນະ​ພັກ ນວ ຄັ້ງ​ທີ VI ທີ່​ໄດ້​ຮັບຮອງ​ເອົາ​ໂຄງການ​ນີ້​ໄດ້​ຮັບ​ທຶນ​ກູ້​ຢືມ​ດອກ​ເບ້ຍ​ຕ່ຳ​ຈາກ​ອົງການ EDCF ສ ເກົາຫຼີ ມູນ​ຄ່າ 67,56 ລ້ານ​ໂດ​ລາ​ສະຫະລັດ ຫຼື ປະມານ 580,67 ຕື້​ກີບ ໃນ​ນີ້ ລັດຖະບານ​ລາວ​ສົມທົບ 9,95 ລ້ານ​ໂດ​ລາ​ສະຫະລັດ ຫຼື ປະມານ 85,51 ຕື້​ກີບ ເຊິ່ງ​ມີ​ໄລຍະ​ເວລາ​ຊຳລະ​ຄືນ 40 ປີ ແລະ ໄລຍະ​ເວລາ​ປອດ​ດອກ​ເບ້ຍ 15 ປີ ອັດຕາ​ດອກ​ເບ້ຍ 0,01% ຕໍ່​ປີ.

     ການ​ລົງ​ນາມ​ຄັ້ງ​ນີ້ ເພື່ອ​ວ່າ​ຈ້າງ​ເອົາ​ບໍລິສັດ​ທີ່​ປຶກສາ ໂດຍ​ບໍລິສັດ Saman Cooperation ແລະ ບໍລິສັດ KECC Cooperation ສ ເກົາຫຼີ ເປັນ​ຜູ້​ຈັດ​ຕັ້ງ​ປະຕິບັດ ໃນ​ນີ້ ຈະ​ສຶກ​ສາ ສຳ​ຫຼວດ ອອກ​ແບບ ແລະ ກຳນົດ​ເຕັກນິກ​ລະອຽດ​ໃນ​ການ​ກໍ່ສ້າງ​ລະບົບ​ໂຄງ​ສ້າງ​ປ້ອງ​ກັນ​ຕະ​ຝັ່ງ​ເຈື່ອນ ຍາວ 8,36 ກິໂລແມັດ ກໍ່ສ້າງ​ສວນ​ສາທາລະນະ​ລຽບ​ແຄມ​ຂອງ​ເນື້ອທີ່ 4 ເຮັກຕາ ກໍ່ສ້າງ​ເສັ້ນທາງ​ລຽບ​ຕາມ​ແຄມ​ຂອງ​ຍາວ 4,4 ກິໂລແມັດ ໂດຍ​ຈະ​ໃຊ້​ເວລາ​ສຳ​ຫຼວດ 12 ເດືອນ ມູນ​ຄ່າ​ວ່າ​ຈ້າງ​ບໍລິສັດ​ທີ່​ປຶກສາ 4.668.000 ໂດ​ລາ​ສະຫະລັດ ຫຼື ປະມານ 40,08 ຕື້​ກີບ ຈາກ​ນັ້ນ ຈະ​ດຳເນີນ​ການ​ຄັດ​ເລືອກ​ເອົາ​ບໍລິສັດ​ຮັບ​ເໝົາ​ກໍ່ສ້າງ ເຊິ່ງ​ຄາດ​ວ່າ​ຈະ​ສາມາດ​ເລີ່ມ​ຕົ້ນ​ການ​ກໍ່ສ້າງ​ໃນ​ປີ 2020.

ຂ່າວທີ່ກ່ຽວຂ້ອງ