ຂ່າວຫຼ້າສຸດ

ສະຫາຍ​ເລຂາທິການ​ໃຫຍ່ ເນັ້ນ​ໃຫ້​ກຳລັງ ​ປກຊ-​ປກສ ເພີ່ມ​ທະວີ​ຄວາມ​ຮັບຜິດຊອບ​ການເມືອງ

331 26 ມ.ນ. 2019 ຂ່າວໜ້າ​ໜຶ່ງ
ສະຫາຍ​ເລຂາທິການ​ໃຫຍ່ ເນັ້ນ​ໃຫ້​ກຳລັງ ​ປກຊ-​ປກສ ເພີ່ມ​ທະວີ​ຄວາມ​ຮັບຜິດຊອບ​ການເມືອງ

    ກະຊວງ​ປ້ອງ​ກັນ​ປະເທດ ຈັດ​ພິທີ​ໂຮມ​ຊຸມນຸມ​ລະນຶກ​ວັນ​ສ້າງຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮອບ 64 ປີ ແລະ ວັນ​ເສຍ​ອົງຄະ​ເສຍ​ຊີວິດ​ແຫ່ງ​ຊາດ​ຄົບຮອບ 73 ປີ ຂຶ້ນ​ວັນ​ທີ 25 ມີນາ 2019 ທີ່​ກະຊວງ​ດັ່ງກ່າວ ໃຫ້​ກຽດ​ເຂົ້າ​ຮ່ວມ​ຂອງ​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປະທານ​ປະເທດ ສະຫາຍ ພົນ​ເອກ ຈັນ​ສະ​ໜອນ ຈັນ​ຍາ​ລາດ ກຳມະການ​ກົມ​ການເມືອງ​ສູນ​ກາງ​ພັກ ລັດຖະມົນຕີ​ກະຊວງ​ປ້ອງ​ກັນ​ປະເທດ ຕະຫຼອດ​ຮອດ​ຄະນະ​ນຳ​ກະຊວງ ພະນັກງານ​ປະຕິວັດ​ອາວຸໂສ​ບຳນານ ແລະ ພະນັກງານ​ຫຼັກ​ແຫຼ່ງ​ຂອງ​ກຳລັງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ.

    ໃນ​ພິທີ ສະຫາຍ ພົນ​ຕີ ທອງ​ລອຍ ສິລິ​ວົງ ກຳມະການ​ສູນ​ກາງ​ພັກ ຮອງ​ລັດຖະມົນຕີ​ກະຊວງ​ປ້ອງ​ກັນ​ປະເທດ ຫົວໜ້າ​ກົມ​ໃຫຍ່​ການເມືອງ​ກອງທັບ ໄດ້​ມີ​ຄຳ​ເຫັນ​ວ່າ: ຊາດ​ລາວ​ແມ່ນ​ຊາດ​ໜຶ່ງ​ທີ່​ມີ​ປະຫວັດສາດ​ອັນ​ຍາວ​ນານ ມີ​ມູນເຊື້ອ​ຮັກ​ຊາດ​ອັນ​ດູດດື່ມ ແລະ ພິລະ​ອາດ​ຫານ​ໃນ​ການ​ຕໍ່ສູ້​ຕີ​ເອົາ​ຊະນະ​ສັດຕູ​ຜູ້​ຮຸກ​ຮານ ມີ​ມູນເຊື້ອ​ໃນ​ການ​ປົກ​ປັກ​ຮັກສາ ແລະ ສ້າງສາ​ປະເທດ​ຊາດ ເຊິ່ງ​ຕະຫຼອດ​ໄລຍະ 64 ປີ ທີ່​ພັກ​ໄດ້​ນຳພາ​ການ​ປະຕິວັດ​ຊາດ​ປະຊາທິປະໄຕ ນຳພາ​ປົກ​ປັກ​ຮັກສາ ແລະ ສ້າງ​ລະບອບ​ໃໝ່ ພັກ​ເຮົາ​ເວລາ​ໃດ​ກໍ​ຢຶດ​ໝັ້ນ​ລັດທິ​ມາກ-ເລ​ນິນ​ເປັນ​ພື້ນຖານ​ແນວ​ຄິດ​ທິດ​ສະ​ດີ ຢຶດ​ຖື​ຫຼັກ​ໝັ້ນ​ຂອງ​ຊົນ​ຊັ້ນ​ກຳມະກອນ​ຢ່າງ​ສະເໝີ​ຕົ້ນ​ສະເໝີ​ປາຍ ຍາມ​ໃດ​ກໍ​ສົມ​ທັບ​ແໜ້ນ​ລະຫວ່າງ​ລັດທິ​ຮັກ​ຊາດ​ອັນ​ແທ້​ຈິງ ກັບ​ລັດທິ​ສາກົນ​ອັນ​ຜ່ອງ​ໃສ ຈົງ​ຮັກ​ພັກດີ​ຕໍ່​ອຸດົມ​ການ​ປະຕິວັດ ແລະ ຜົນ​ປະໂຫຍດ​ຂອງ​ປະຊາຊົນ​ລາວ​ບັນດາເຜົ່າ​ຖື​ເອົາ​ຄວາມ​ສາມັກຄີ​ພາຍ​ໃນ​ເປັນ​ຫຼັກ​ແຫຼ່ງ ເຕົ້າໂຮມ​ຄວາມ​ສາມັກຄີ​ເປັນ​ປຶກ​ແຜ່ນ​ພາຍ​ໃນ​ຊາດ ເຊີດ​ຊູ​ຄວາມ​ເປັນ​ແບບຢ່າງ​ນຳ​ໜ້າ ຮັກສາ​ໄດ້​ຄຸນ​ທາດ​ການເມືອງ ຄຸນສົມບັດ​ສິນ​ທຳ​ປະຕິວັດ​ອັນ​ຜ່ອງ​ໃສ ພັກ​ເຮົາ​ໄດ້​ຮັບ​ຄວາມ​ນັບຖື ຄວາມ​ເຊື່ອ​ໝັ້ນ​ຈາກ​ປະຊາຊົນ​ລາວ​ບັນດາເຜົ່າ​ຕະຫຼອດ​ມາ ດັ່ງນັ້ນ ພັກ​ເຮົາ​ສົມ​ແລ້ວ​ທີ່​ເປັນ​ກອງ​ເສນາ​ທິ​ການ​ທາງ​ການເມືອງ​ທີ່​ສ່ອງ​ໃສ ເປັນ​ກອງ​ນຳ​ໜ້າທີ່​ແໜ້ນ​ແກ່ນ ເປັນ​ຕົວ​ແທນ​ທີ່​ຈົງ​ຮັກ​ພັກດີ​ຕໍ່​ສິດຜົນປະໂຫຍດ​ຂອງ​ຊົນ​ຊັ້ນ​ກຳມະກອນ ຊາວ​ຜູ້​ອອກແຮງ​ງານ​ທີ່​ຮັກ​ຊາດ ແລະ ຂອງ​ຊາດ​ລາວ​ທັງ​ໝົດ ເປັນ​ແກນ​ນຳ​ໃນ​ລະບົບ​ການເມືອງ​ແຫ່ງ​ລະບອບ​ປະຊາທິປະໄຕ​ປະຊາຊົນ​ອັນ​ເຂັ້ມແຂງ ແລະ ມີ​ຄວາມ​ສາມາດ​ປະຕິບັດ​ບົດບາດນຳ​ພາ​ຕໍ່​ທົ່ວ​ສັງຄົມ ນຳພາ​ປະເທດ​ຊາດ​ກ້າວ​ໄປ​ສູ່​ຄວາມ​ຈະເລີນ​ຮຸ່ງເຮືອງ.

    ນອກຈາກ​ນີ້ ສະຫາຍ​ຍັງ​ໄດ້​ເນັ້ນ​ໃຫ້​ເຂົ້າໃຈ​ວ່າ ຈຸດ​ອ່ອນ ຂໍ້ຄົງຄ້າງ​ທີ່​ກຳລັງ​ເປັນ​ສິ່ງ​ທ້າ​ທາຍ​ຕໍ່​ພັກ​ເຮົາ​ໃນ​ຊຸມ​ປີ​ຕໍ່ ໜ້າ​ແມ່ນ​ຄວາມທຸກ​ຍາກ​ຂອງ​ປະຊາຊົນ ແລະ ຄວາມ​ແຕກ​ໂຕນ​ໃນ​ສັງຄົມ ການ​ເຊື່ອມ​ຖອຍ​ດ້ານ​ຄຸນ​ທາດ​ການເມືອງ​ຂອງ​ພະນັກງານ-ສະມາຊິກ​ພັກ​ຈຳນວນ​ໜຶ່ງ ບັນຫາ​ໜີ້​ສິນ​ສາທາລະນະ ບັນຫາ​ຫຍໍ້ທໍ້​ໃນ​ສັງຄົມ ແລະ ການ​ສໍ້​ລາດ​ບັງ​ຫຼວງ ເຊິ່ງ​ບັນຫາ​ເຫຼົ່ານັ້ນ​ກຳລັງ​ເປັນ​ຊ່ອງ​ວ່າງ​ໃຫຍ່​ໃຫ້​ອິດ​ທິ​ກຳລັງ​ປໍ​ລະ​ປັກ​ສວຍ​ໃຊ້ ເພື່ອ​ໂຄສະນາ​ທັບ​ຖົມ​ໂຈມ​ຕີ​ພັກ ແລະ ລັດ​ໃນ​ລະບອບ​ໃໝ່ ສ້າງ​ຄວາມ​ສັບສົນ​ໃນ​ສັງຄົມ ແລະ ຈະ​ເປັນ​ຜົນ​ຮ້າຍ​ຕໍ່​ພາລະກິດ​ປ່ຽນແປງ​ໃໝ່​ຂອງ​ພັກ​ເຮົາ ດັ່ງນັ້ນ ພວກ​ເຮົາ​ຕ້ອງ​ຢືນ​ຢູ່​ບົນ​ທັດສະນະ​ພາວະ​ວິໄສ​ໃນ​ການ​ເບິ່ງ​ບັນຫາ ເພີ່ມ​ທະວີ​ຄວາມ​ຮັບຜິດຊອບ​ການເມືອງ ຕັດສິນ​ໃຈ​ແກ້​ໄຂ​ບັນຫາ​ຢ່າງ​ຈິງ​ຈັງ ຕ້ອງ​ສືບຕໍ່​ປົກ​ປັກ​ຮັກສາ ແລະ ເສີມ​ຂະຫຍາຍ​ມູນເຊື້ອ​ອັນ​ດີງາມ​ຂອງ​ກຳລັງ​ປະກອບ​ອາວຸດ ຕັ້ງໜ້າ​ປັບປຸງ​ກຳລັງ​ໃນ​ທຸກ​ດ້ານ​ໃຫ້​ໜັກ​ແໜ້ນ​ເຂັ້ມແຂງ ເອົາໃຈໃສ່​ຕໍ່​ການ​ປັບປຸງ​ລະບອບ​ຄຸ້ມ​ຄອງ-ບັນຊາ ປັບປຸງ​ກຳລັງ​ປະເພດ​ຕ່າງໆ ໂດຍ​ຖື​ເອົາ​ຄຸນ​ນະ​ພາບ​ເປັນຕົ້ນ​ຕໍ ພ້ອມ​ນັ້ນ ກໍ​ຕ້ອງ​ເອົາໃຈໃສ່​ປັບປຸງ​ການ​ຊ່ວຍເຫຼືອ​ກຳລັງ​ທ້ອງຖິ່ນ​ຢູ່​ຂັ້ນ​ຮາກ​ຖານ​ໃນ​ການ​ປັບປຸງ​ລະບົບ​ບັນຊາ ອົບຮົມ ຫັດ​ແອບ ເພື່ອ​ໃຫ້​ເຂົາເຈົ້າ​ເຮັດ​ຫຼ້ອນ​ໜ້າທີ່​ປົກ​ປັກ​ຮັກສາ​ທ້ອງຖິ່ນ​ຂອງ​ຕົນ ແລະ ຕ້ອງ​ເອົາໃຈໃສ່​ວຽກ​ງານ​ສຶກ​ສາ​ປ້ອງ​ກັນ​ຊາດ​ໃຫ້​ກວ້າງຂວາງ ມີ​ຄຸນ​ນະ​ພາບ ເພື່ອ​ເປັນ​ກຳລັງ​ສຳຮອງ​ກໍລະນີ​ເກີດ​ມີ​ສະພາບ ແລະ ອື່ນໆ.

ຂ່າວທີ່ກ່ຽວຂ້ອງ