ຍົກ​ສູງ​ຄວາມ​ສາມາດ ໃຫ້​ຄູ​ເຝິກ-ກຳມະການ​ຕັດສິນ ເຕະບານ​ຂັ້ນ​ພື້ນຖານ

260 26 ມ.ນ. 2019 ວົງຈອນກີລາ
ຍົກ​ສູງ​ຄວາມ​ສາມາດ ໃຫ້​ຄູ​ເຝິກ-ກຳມະການ​ຕັດສິນ ເຕະບານ​ຂັ້ນ​ພື້ນຖານ

   ພິ​ທິ​ເປີດ​ເຝິກອົບຮົມ​ຮົມ ເພື່ອ​ຍົກ​ລະດັບ​ຄູ​ເຝິກ​ເຕະບານ​ຂັ້ນ​ພື້ນຖານ ແລະ ເຝິກອົບຮົມ​ກຳ​ມະ ການ​ຕັດສິນ​ເຕະບານ ຂັ້ນ​ພື້ນຖານ ຈັດ​ຂຶ້ນ​ໃນ​ວັນ​ຈັນ 25 ມີນາ 2019 ຢູ່​ສູນ​ໄອ​ຊີ​ທີ ພະ​ແນກ​ສຶກ​ສາ​ທິ​ການ ແລະ ກີລາ ເມືອງ​ຊຳ​ເຫນືອ ແຂວງ​ຫົວພັນ ໂດຍ​ມີ ທ່ານ ຫຼຽນ​ສັນຕິ ໂຫຼຍ​ຮັກ ຮອງ​ຫົວ    ໜ້າ​ຂະແໜງ​ກີລາ​ລະດັບ​ສູງ​ແຂວງ​ຫົວພັນ ທ່ານ ສົມ​ສັກ ແກ້ວ​ດາລາ ຮັກສາ​ການ​ຫົວໜ້າ​ພະ​ແນກ​ເຕັກນິກ-ວິທະຍາ ສະຫະພັນ​ເຕະບານ​ແຫ່ງ​ຊາດ​ລາວ (​ສຕລ) ທ່ານ ສີ​ປະເສີດ ສິນ​ບັນດິດ ຫົວຫນ້າ​ພະ​ແນກ​ກຳມະການ​ຕັດສິນ ​ສຕລ  ພ້ອມ​ດ້ວຍ​ພະນັກງານ​ວິຊາ​ການ​ທີ່​ກຽວ​ຂ້ອງ ນັກ​ສຳ​ມະກອນ ທີ່​ມາ​ຈາກ​ບັນດາ 10 ຕົວ​ເມືອງ​ອ້ອມ​ຂ້າງ​ແຂວງ​ຫົວພັນ ແລະ ບັນດາ​ໂຮງຮຽນ​ອ້ອມ​ຂ້າງ​ແຂວງ​ຫົວພັນ.

   ການ​ເຝິກອົບຮົມ​ຄູ​ເຝິກ​ເຕະບານ​ຂັ້ນ​ພື້ນຖານ ຄັ້ງ​ນີ້ ກໍ​ເພື່ອ​ເສີມ​ສ້າງ​ພັດທະນາ​ຄູ​ເຝິກ​ສືບ​ທອດ ກີລາ​ເຕະບານ​ໃຫ້​ໄດ້​ທົ່ວ​ທຸກ​ເຂດ​ທີ່​ຫ່າງ​ໄກ​ສອກຫຼີກ ແລະ ດ້ອຍ​ໂອກາດ ເພື່ອ​ນຳ​ໃຊ້​ການ​ເຝິກ​ສອນ​ທັກ​ສະ​ກີລາ​ເຕະບານ​ຂັ້ນ​ພື້ນຖານ ໃຫ້​ຖືກຕ້ອງ​ຕາມ​ຂັ້ນ​ຕອນ ແລະ ມີ​ຄວາມ​ຄ່ອງ​ແຄ້ວ ເພື່ອ​ປັບປຸງ ແລະ ພັດທະນາ​ຄູ​ເຝິກ ໃຫ້​ມີ​ຄວາມ​ຮູ້​ຄວາມ​ສາມາດ​ໃນ​ການ​ເຂົ້າ​ຮ່ວມ​ການ​ອົບຮົມ​ຄູ​ເຝິກ​ລະດັບ​ພາກ​ພື້ນ ຂອງ​ອາຊີ​ຕາມ​ລຳດັບ ໃນ​ອະນາຄົດ.

   ສ່ວນ​ການ​ເຝິກອົບຮົມ​ກຳມະການ​ຕັດສິນ​ເຕະບານ​ຂັ້ນ​ພື້ນຖານ ເພື່ອ​ພັດທະນາ​ກຳມະການ​ຕັດ ສິນ​ໃໝ່ ໃຫ້​ຂະຫຍາຍຕົວ​ຄຽງ​ຄູ່​ກັບ​ການ​ພັດທະນາ​ນັກກີລາ​ເຕະບານ​ໃຫ້​ຫຼາຍ​ຂຶ້ນ ທັງ​ເປັນ​ການ​ສ້າງ​ກຳມະການ​ຮຸ່ນ​ສືບ​ທອດ​ເພື່ອ​ທົດ​ແທນ ແລະ ຍົກ​ລະດັບ​ໃຫ້​ສູງ​ຂຶ້ນ​ໃນ​ອະນາຄົດ ເພາະ​ປັດຈຸບັນ​ກຳມະການ​ທີ່​ຮັບ​ໃຊ້​ໃນ​ວົງ​ການ​ເຕະບານ​ມີ​ຈຳກັດ ສ້າງ​ໂອກາດ​ໃຫ້​ກຳມະການ​ໃໝ່​ມີ​ການ​ພັດທະນາ ແລະ ຮຽນ​ຮູ້​ກ່ຽວ​ກັບ​ກະຕິ​ກາ​ແຂ່ງຂັນ ແລະ ຮູ້​ນຳ​ໃຊ້​ກະຕິ​ກາ​ໃຫ້​ຖືກຕ້ອງ ແລະ ເໝາະ​ສົມ​ກັບ​ການ​ແຂ່ງຂັນ​ໃນ​ແຕ່​ລະ​ນັດ

    ການ​ເຝິກອົບຮົມ​ຄັ້ງ​ນີ້ ແມ່ນ​ຈະ​ໄດ້​ດຳເນີນ​ນັບ​ຕັ້ງແຕ່​ວັນ​ທີ 25-27 ມີນາ 2019 ເຊິ່ງ​ໃຊ້​ເວລາ 3 ວັນ ໂດຍ​ນັກ​ສຳ​ມະກອນ​ແມ່ນ​ໄດ້​ຮຽນ​ຮູ້​ທາງ​ດ້ານ​ທິດ​ສະ​ດີ ແລະ ການ​ປະຕິບັດ​ຕົວ​ຈິງ.

ຂ່າວທີ່ກ່ຽວຂ້ອງ