ເສດຖີ​ເງິນ​ລ້ານ​ຈະ​ມີ​ເກີນ 20 ລ້ານ​ຄົນ​ໃນ​ປີ 2019

262 25 ມ.ນ. 2019 ຂ່າວຕ່າງປະເທດ
ເສດຖີ​ເງິນ​ລ້ານ​ຈະ​ມີ​ເກີນ 20 ລ້ານ​ຄົນ​ໃນ​ປີ 2019

     ການ​ຄົ້ນຄວ້າ​ທີ່​ໃສ່​ຊື່ວ່າ "The Wealth Report" ໂດຍ​ແມ່ນ​ອົງການ Naef Prestige ແລະ Knight Frank ນຳ​ອອກ​ມາ​ເປີດເຜີຍ​ຢູ່​ທີ່​ເຊີ​ແນວ (ປະເທດ​ສະ​ວິດ) ເມື່ອ​ວັນ​ທີ 19 ມີນາ​ທີ່​ຜ່ານ​ມາ ໃຫ້​ຮູ້​ວ່າ ຈະ​ເປັນ​ເທື່ອ​ທຳ​ອິດ  ທີ່​ມີ​ປະລິມານ​ເສດຖີ​ເງິນ​ລ້ານ (ເງິນ​ໂດ​ລາ​ສະຫະລັດ) ບັນລຸ​ເກີນ​ແດນ 20 ລ້ານ​ຄົນ ໃນ​ປີ 2019 ທ່າມກາງ​ທີ່​ຄວາມ​ເຕີບ​ໂຕ​ເສດຖະກິດ​ທົ່ວ​ໂລກ​ຫຼຸດ​ຖອຍ ເບິ່ງ​ຄື​ວ່າ​ບໍ່​ໄດ້​ເປັນ​ຜົນ​ກະທົບ​ຕໍ່​ຊັບ​ສິນ ຂອງ​ພວກ​ຄົນ​ຮັ່ງມີ​ໃນ​ໂລກ​ນັ້ນ​ແຕ່​ຢ່າງໃດ.

    ໃນ​ນັ້ນ ຈຳນວນ​ເສດຖີ​ເງິນ​ລ້ານ​ຢູ່​ໃນ​ເຂດ​ອາ​ເມ​ຣິ​ກາ​ເໜືອ ຈະ​ຢູ່​ທີ່ 6,6 ລ້ານ​ຄົນ ຢູ່​ທະວີບ​ເອີ​ຣົບ​ມີ​ປະມານ 5,9 ລ້ານ​ຄົນ ໃນ​ຂະນະ​ທີ່ຢູ່​ທະວີບອາຊີ ມີ 5,8 ລ້ານ​ຄົນ. ດັ່ງນັ້ນ ຍອດ​ປະລິມານ​ເສດຖີ​ເງິນ​ລ້ານ​ຢູ່​ໃນ 3 ທະວີບ​ດັ່ງກ່າວ ກວມ​ເອົາ​ເກືອບ 92% ຂອງ​ຈຳນວນ​ເສດຖີ​ເງິນ​ລ້ານ​ທັງ​ໝົດ​ທີ່​ມີ​ຢູ່​ໃນ​ໂລກ.

    ເຖິງ​ວ່າຄວາມ​ຫວັງ​ກ່ຽວ​ກັບ​ຄວາມ​ເຕີບ​ໂຕ​ທາງ​ດ້ານ​ເສດຖະກິດ  ໃນ​ປີ 2019 ບໍ່​ມີ​ຄວາມ​ໝັ້ນ​ໃຈ​ພໍ​ປານໃດ​ກໍ​ຕາມ ແຕ່​ການ​ຄົ້ນຄວ້າ​ດັ່ງກ່າວ ກໍ​ໃຫ້ການ​ຄາດ​ຄະເນ​ວ່າ ປະລິມານ​ເສດຖີ​ເງິນ​ລ້ານ ຍັງ​ຈະ​ສືບຕໍ່​ເພີ່ມ​ຂຶ້ນ.

    ໃນ​ນັ້ນ ພວກ​ເສດຖີ​ໃໝ່​ເກືອບ 43.000 ຄົນ ຈະ​ມີ​ມູນ​ຄ່າ​ຊັບ​ສິນ​ເກີນ​ແດນ 30 ລ້ານ​ໂດ​ລາ​ສະຫະລັດ ພາຍ​ໃນ 5 ປີ​ຕໍ່ໜ້າ ແລະ ເມື່ອ​ເປັນ​ດັ່ງນັ້ນ ມີ​ເສດຖີ​ຫຼາຍ​ພັນ​ຄົນ ໃກ້​ຈະ​ເຂົ້າ​ຮ່ວມ​ຢູ່​ໃນ​ສະໂມສອນ​ຂອງ​ບັນດາ​ຄົນ​ລ້ຳ​ລວຍ.

ຂ່າວທີ່ກ່ຽວຂ້ອງ