ແຟງ​ລັງ ​ເປັນ​ປະ​ເທດ​ທີ່​ມີ​ຄວາມ​ຜາ​ສຸກ​ທີ່​ສຸດ​ໃນ​ໂລກ

141 25 ມ.ນ. 2019 ຂ່າວຕ່າງປະເທດ
ແຟງ​ລັງ ​ເປັນ​ປະ​ເທດ​ທີ່​ມີ​ຄວາມ​ຜາ​ສຸກ​ທີ່​ສຸດ​ໃນ​ໂລກ

     ການ​ຈັດ​ອັນ​ດັບ​ຂອງ “ບົດ​ລາຍ​ງານ​ກ່ຽວ​ກັບ​ຄວາມ​ຜາ​ສຸກ​ໃນ​ໂລກ” ຊຶ່ງ​ສະຫະ​ປະຊາ​ຊາດ (​ສປຊ) ນຳ​ອອກ​ມາ​ເປີດເຜີຍ ເນື່ອງ​ໃນ​ໂອກາດ​ວັນ​ຄວາມສຸກ​ສາກົນ ເມື່ອ​ວັນ​ທີ 20 ມີນາ​ນັ້ນ ລະບຸ​ວ່າ ແຟງ​ລັງ ຖືກ​ຈັດ​ຢູ່​ໃນ​ອັນ​ດັບ​ປະເທດ​ທີ່​ມີ​ຄວາມ​ຜາ​ສຸກ​ທີ່​ສຸດ​ໃນ​ໂລກ ເປັນ​ປີ​ທີ​ສອງ​ຕິດຕໍ່​ກັນ ໃນ​ຂະນະ​ທີ່ ຊູ​ດານ​ໃຕ້ ເປັນ​ປະເທດ​ທີ່​ມີ “ຄວາມ​ຜາ​ສຸກ​ດ້ອຍ​ທີ່​ສຸດ​ໃນ​ໂລກ.”

    ບົດ​ລາຍ​ງານ​ດັ່ງກ່າວ ໃຫ້​ຮູ້​ວ່າ ແຟງ​ລັງ ຊຶ່ງ​ຕັ້ງ​ຢູ່​ໃນ​ເຂດ​ເອີ​ຣົບ​ເໜືອ ມີ​ປະຊາກອນ 5,5 ຄົນ ເປັນ​ທີ່​ຮູ້​ກັນ​ວ່າ​ເປັນ​ປະເທດ​ທີ່​ຮັກ​ທຳ​ມະ​ຊາດ​ນັ້ນ ຖືກ​ຈັດ​ຢູ່​ໃນ​ອັນ​ດັບ​ຕົ້ນ​ຂອງ​ບັນດາ​ປະເທດ​ທີ່​ມີ​ຄວາມ​ຜາ​ສຸກ​ທີ່​ສຸດ​ໃນ​ໂລກ. ປະເທດ​ອື່ນໆ ເຊັ່ນ ໂຮນ​ລັງ ສະ​ວິດ ກາ​ນາ​ດາ ນູ​ແວນ​ເຊ​ລັງ ແລະ ໂອ​ຕະ​ຣິດ ຕ່າງ​ກໍ​ລອດ​ເຂົ້າ​ໄປ​ຢູ່​ໃນ​ໝວດ 10 ປະເທດ​ອັນ​ດັບ​ຕົ້ນ ໃນ​ການ​ຈັດ​ອັນ​ດັບ​ເທື່ອ​ນີ້.

    ອັງກິດ ໄດ້​ເພີ່ມ​ຂຶ້ນ​ອີກ 4 ຂັ້ນ ຢູ່​ໃນ​ການ​ຈັດ​ອັນ​ດັບ​ດັ່ງກ່າວ ໂດຍ​ຂຶ້ນ​ໄປ​ຄອງ​ອັນ​ດັບ​ທີ 15 ໃນ​ຂະນະ​ທີ່ ສ ອາ​ເມ​ຣິ​ກາ ຕົກລົງ 1 ຂັ້ນ ຖືກ​ຈັດ​ຢູ່​ໃນ​ອັນ​ດັບ​ທີ 19. ໃນ​ຂະນະ​ດຽວ​ກັນ ຊູ​ດານ​ໃຕ້  ຖືກ​ຈັດ​ຢູ່​ໃນ​ອັນ​ສຸດ​ທ້າຍ​ໃນ​ຕາຕະລາງ​ຈັດ​ອັນ​ດັບ ຊຶ່ງ​ບົດ​ລາຍ​ງານ​ຂອງ ​ສປຊ ເມື່ອ​ບໍ່​ດົນ​ມາ​ນີ້ ໃຫ້​ຮູ້​ວ່າ 60% ຂອງ​ຈຳນວນ​ປະຊາກອນ ຊູ​ດານ​ໃຕ້ ປະ​ເຊີນ​ກັບ​ສະພາບ​ຂາດແຄນ​ສະບຽງ​ອາຫານ ຫຼັງ​ເກີດ​ສົງຄາມ​ພາຍ​ໃນ​ປະເທດ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ ປະມານ 400.000 ຄົນ. ປະເທດ​ອື່ນໆ​ທີ່​ຖືກ​ສົງຄາມ​ທຳລາຍ ເຊັ່ນ ເຢ​ແມນ ອາ​ຟະ​ກາ​ນິດ​ສະຖານ ສາທາລະນະ​ລັດ ອາ​ຟະ​ຣິກ​ກາ​ກາງ ຕ່າງ​ກໍ​ຖືກ​ຈັດ​ຢູ່​ໃນ​ໝວດ​ປະເທດ​ທີ່​ມີ​ຄວາມ​ຜາ​ສຸກ​ດ້ອຍ​ທີ່​ສຸດ​ໃນ​ໂລກ.

    ​ສປຊ ເຮັດ​ບົດ​ລາຍ​ງານ​ດັ່ງກ່າວ ມາ​ຕັ້ງແຕ່​ປີ 2012 ໂດຍ​ເປັນ​ການ​ຈັດ​ອັນ​ດັບ 156 ປະເທດ ຕາມ​ມາດຖານ​ຕ່າງໆ ເຊັ່ນ ອາຍຸ​ຍືນ ລາຍ​ຮັບ ຈຸດປະສົງ​ການ​ດຳລົງ​ຊີວິດ ບັນຫາ​ການ​ສໍ້​ລາດ​ບັງ​ຫຼວງ ແລະ ປັດ​ໄຈ​ອື່ນໆ ໃນ​ການ​ຕີ​ລາຄາ​ຄຸນ​ນະ​ພາບ​ຊີວິດ.

ຂ່າວທີ່ກ່ຽວຂ້ອງ