ໄຂສຳນັກງານສະຖານກົງສຸນກິດຕິມະສັກ ສ ສະໂລວັກ ປະຈຳລາວ

339 25 ມ.ນ. 2019 ຂ່າວໜ້າ​ໜຶ່ງ
ໄຂສຳນັກງານສະຖານກົງສຸນກິດຕິມະສັກ ສ ສະໂລວັກ ປະຈຳລາວ

    ພິ­ທີ​ໄຂ​ນຳ​ໃຊ້​ສຳ­ນັກ­ງານ​ສະ­ຖານ​ກົງ­ສຸນ​ກິດ​ຕິ​ມະ​ສັກ ສ ສະ​ໂລ​ວັກ ປະ­ຈຳ ສປປ ລາວ ຈັດ​ຂຶ້ນ​ວັນ​ທີ 21 ມີ­ນາ 2019 ຢູ່​ສຳ­ນັກ­ງານ​ດັ່ງ­ກ່າວ ບ້ານ​ຂຸນ​ຕາ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ກອງ​ແກ້ວ ໄຊ​ສົງ­ຄາມ ເຈົ້າ­ແຂວງ​ບໍ​ລິ​ຄຳ​ໄຊ ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ທ່ານ ສະ​ຕາ​ນິ​ສະ​ລອບ ໂອ​ເປຍ​ລາ ເອກ​ອັກ​ຄະ​ລັດ​ຖະ​ທູດ ສ ສະ​ໂລ​ວັກ ປະ­ຈຳ ສປປ ລາວ ເຊິ່ງ​ມີ​ສຳ­ນັກ­ງານ​ຕັ້ງ​ຢູ່​ບາງ­ກອກ ຣາ​ຊະ​ອາ­ນາ­ຈັກ​ໄທ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ວົງ​ນຳ ວົງ​ວິ­ໄລ ກົງ­ສຸນ​ກິດ​ຕິ​ມະ​ສັກ ສ ສະ​ໂລ​ວັກ ປະ­ຈຳ ສປປ ລາວ ເປັນ​ປະ­ທານ​ບໍ­ລິ­ສັດ ຂຸນ​ຕາ​ປ້າຍ​ໂຄ­ສະ­ນາ ຈຳ­ກັດ​ຜູ້​ດຽວ ກ່າວ​ວ່າ: ການ​ໄຂ​ນຳ​ໃຊ້​ສຳ­ນັກ­ງານ​ສະ­ຖານ​ກົງ­ສຸນ​ກິດ​ຕິ​ມະ​ສັກ​ຄັ້ງ​ນີ້ ເປັນ​ຂີດ​ໝາຍ​ອັນ​ດີ​ໃຫ້­ການ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ລະ­ຫວ່າງ ສປປ ລາວ ແລະ ສ ສະ​ໂລ​ວັກ ໃນ​ຕົ້ນ​ປີ 2018 ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ແລະ ລັດ­ຖະ­ມົນ­ຕີ​ກະ­ຊວງ​ການ​ເງິນ​ຂອງ ສ ສະ​ໂລ​ວັກ ໄດ້​ນຳ­ພາ​ຄະ­ນະ​ຜູ້​ແທນ ແລະ ນັກ­ທຸ­ລະ­ກິດ ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ນະ­ຄອນ­ຫຼວງ​ວຽງ​ຈັນ ແລະ ແຂວງ​ຫຼວງ​ພະ​ບາງ ສປປ ລາວ ເຊິ່ງ​ການ​ມາ​ຢ້ຽມ­ຢາມ​ຄັ້ງ​ນັ້ນ ບໍ­ລິ­ສັດ ຂຸນ​ຕາ​ປ້າຍ​ໂຄ­ສະ­ນາ ຈຳ­ກັດ​ຜູ້​ດຽວ ຮ່ວມ​ກັບ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ ອະ­ດີດ​ນັກ​ສຶກ​ສາ​ຈາກ ສ ສະ​ໂລ​ວັກ ແລະ ສ ເຊັກ ໄດ້​ຮັບ​ກຽດ​ຈັດ​ງານ​ລ້ຽງ​ຕ້ອນ­ຮັບ​ຢ່າງ​ອົບ​ອຸ່ນ.

    ກ່ອນ​ໜ້າ​ນີ້ ນັກ­ຮຽນ​ລາວ​ຫຼາຍ 100 ຄົນ ໄດ້​ຮັບ​ທຶນ​ການ​ສຶກ​ສາ​ຈາກ ສ ສະ​ໂລ​ວັກ ເຊິ່ງ​ເມື່ອ​ກ່ອນ​ເປັນ​ສາ­ທາ­ລະ­ນະ​ລັດ​ສັງ­ຄົມ​ນິ­ຍົມ​ເຊັກ​ໂກ­ສະ​ໂລ​ວາ​ກີ ພວກ​ເຮົາ​ໄດ້​ໝູນ​ໃຊ້​ໂອ­ກາດ​ດັ່ງ­ກ່າວ ເຂົ້າ​ຮຽນ​ໃນ​ມະ­ຫາ­ວິ­ທະ­ຍາ­ໄລ ແລະ ສະ​ຖາ​ບັນ​ການ​ເຝິກ­ອົບ­ຮົມ​ວິ­ຊາ​ຊີບ ພາຍ­ຫຼັງ​ສຳ­ເລັດ​ການ​ສຶກ​ສາ ກໍ​ໄດ້​ກັບ​ຄືນ​ປະ­ເທດ ແລະ ໄດ້​ມີ​ວຽກ​ເຮັດ​ງານ​ທຳ​ໃນ​ຂະ­ແໜງ­ການ​ຕ່າງໆ​ທັງ​ພາກ​ລັດ ແລະ ເອ­ກະ​ຊົນ ບາງ​ທ່ານ​ມີ​ຕຳ­ແໜ່ງ​ໃນ​ອົງ­ການ​ລັດ­ຖະ­ບານ ແລະ ສະ­ພາ​ແຫ່ງ​ຊາດ ສະ­ເພາະ​ຂ້າ­ພະ­ເຈົ້າ​ໄດ້​ໃຊ້​ຄວາມ​ຮູ້ ແລະ ປະ­ສົບ​ການ​ທີ່​ໄດ້​ຮຽນ​ມາ​ຈາກ​ສະ​ໂລ​ວັກ ໝູນ​ໃຊ້​ໃນ​ວຽກ​ງານ​ຕົວ​ຈິງ ແລະ ການ​ດຳ­ເນີນ​ທຸ­ລະ​ກິດ​ຂອງ​ຕົນ​ເອງ​ຢ່າງ​ມີ​ຜົນ­ສຳ­ເລັດ​ເປັນ​ກ້າວໆ ປັດ­ຈຸ­ບັນ ບໍ­ລິ­ສັດ ຂຸນ​ຕາ​ປ້າຍ​ໂຄ­ສະ­ນາ ຈຳ­ກັດ​ຜູ້​ດຽວ ເປັນ​ໜຶ່ງ​ໃນ​ບໍ­ລິ­ສັດ​ໂຄ­ສະ­ນາ​ທີ່​ມີ​ຊື່​ສຽງ​ໃນ ສປປ ລາວ ແລະ ເປັນ​ບໍ­ລິ­ສັດ​ທຳ​ອິດ​ທີ່​ໄດ້​ໃບ​ຮັບ­ຮອງ​ຄຸນ​ນະ​ພາບ ISO 9002-2008 ແລະ ໄດ້​ຍົກ​ລະ­ດັບ​ເປັນ ISO 9001-2015.

    ການ​ໄດ້​ຮັບ​ການ​ແຕ່ງ­ຕັ້ງ​ເປັນ​ກົງ­ສຸນ​ກິດ​ຕິ​ມະ​ສັກ ສ ສະ​ໂລ​ວັກ ປະ­ຈຳ ສປປ ລາວ ແມ່ນ​ເປັນ​ກຽດ​ສັກ​ສີ ແລະ ພິ­ເສດ​ສຳ­ລັບ​ຂ້າ­ພະ­ເຈົ້າ ແລະ ຂໍ​ໃຫ້​ສັນ­ຍາ​ວ່າ​ຈະ​ປະ­ຕິ­ບັດ​ໜ້າ­ທີ່​ຢ່າງ​ສຸດ​ຄວາມ​ສາ­ມາດ ເພື່ອ​ເພີ່ມ​ທະ­ວີ​ເຮັດ​ໃຫ້­ການ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ຕ່າງ​ຝ່າຍ​ຕ່າງ​ມີ​ຜົນ​ປະ­ໂຫຍດ​ໃຫ້​ເປັນ​ຈິງ ລະ­ຫວ່າງ​ປະ­ຊາ­ຊົນ ລາວ-ສະ​ໂລ​ວັກ ແລະ ຜົນ​ປະ­ໂຫຍດ​ຂອງ 2 ປະ­ເທດ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ