ມີຜູ້ເສຍຊີວິດຍ້ອນພະຍາດໝາກແດງ 1 ກໍລະນີ

316 25 ມ.ນ. 2019 ຂ່າວໜ້າ​ໜຶ່ງ

    ກະ­ຊວງ​ສາ­ທາ­ລະ­ນະ​ສຸກ ຈັດ​ກອງ​ປະ­ຊຸມ​ແນະ­ນຳ​ເຜີຍ­ແຜ່​ຂໍ້​ມູນ​ຂ່າວ­ສານ​ກ່ຽວ​ກັບ​ພະ­ຍາດ­ໝາກ­ແດງ ຂຶ້ນ​ວັນ​ທີ 21 ມີ­ນາ 2019 ຢູ່​ກະ­ຊວງ​ດັ່ງ­ກ່າວ ໂດຍ​ມີ​ທ່ານ ສີ​ບຸນ​ໂຮມ ອັກ​ຄະ​ວົງ ຮອງ​ຫົວ­ໜ້າ​ກົມ​ຄວບ​ຄຸມ­ພະ​ຍາດ​ຕິດ­ຕໍ່ ມີ​ຫົວ­ໜ້າ​ກົມ​ອະ­ນາ­ໄມ ແລະ ສົ່ງ­ເສີມ​ສຸ­ຂະ­ພາບ ມີ​ບັນ­ດາ​ທ່ານ​ຫົວ­ໜ້າ​ສູນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ຊີ້​ແຈງ ແລະ ຂໍ​ຄວາມ​ຮ່ວມ​ມື​ກັບ​ບັນ­ດາ​ສື່​ມວນ​ຊົນ ໃນ​ການ​ເຜີຍ­ແຜ່​ຂໍ້​ມູນ​ຂ່າວ­ສານ ເພື່ອ​ສຸ­ຂະ­ພາບ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ຢ່າງ​ກວ້າງ­ຂວາງ ແລະ ຕໍ່​ເນື່ອງ​ກ່ຽວ​ກັບ​ພະ­ຍາດ­ໝາກ­ແດງ ເພື່ອ​ໃຫ້​ປະ­ຊາ­ຊົນ​ກຸ່ມ​ເປົ້າ​ໝາຍ​ສາ­ມາດ​ໄດ້​ຮັບ​ຮູ້-ເຂົ້າ­ໃຈ ແລະ ສາ­ມາດ​ດູ​ແລ​ຮັກ­ສາ​ສຸ­ຂະ­ພາບ ແລະ ການ​ປ້ອງ​ກັນ​ພະ­ຍາດ​ຂອງ​ເຂົາ­ເຈົ້າ​ຄອບ­ຄົວ ແລະ ຊຸມ​ຊົນ.

    ທ່ານ ສີ​ບຸນ​ໂຮມ ອັກ​ຄະ​ວົງ ກ່າວ​ວ່າ: ປັດ­ຈຸ­ບັນ​ພະ­ຍາດ­ໝາກ­ແດງ ໄດ້​ກາຍ­ເປັນ​ສິ່ງ​ທ້າ​ທາຍ​ຕໍ່​ສຸ­ຂະ­ພາບ​ຂອງ​ຊຸມ​ຊົນ ສ້າງ​ຄວາມ​ກັງ­ວົນ​ໃຫ້​ລັດ­ຖະ­ບານ​ປະ­ເທດ​ຕ່າງໆ​ໃນ​ໂລກ ສປປ ລາວ ກໍ​ເປັນ​ໜື່ງ​ໃນ​ບັນ­ດາ​ປະ­ເທດ​ທີ່​ປະ​ເຊີນ​ໜ້າ​ກັບ​ການ​ເກີດ​ຂອງ​ພະ­ຍາດ​ດັ່ງ­ກ່າວ ເຊິ່ງ​ໄລ­ຍະ​ຜ່ານ​ມາ​ມີ​ການ​ລາຍ​ງານ​ຂອງ​ພະ­ຍາດ­ໝາກ­ແດງ​ຢູ່​ຈາກ​ບາງ​ແຂວງ​ເທົ່າ​ນັ້ນ ແຕ່​ປັດ­ຈຸ­ບັນ​ນັບ​ແຕ່​ວັນ​ທີ 1 ມັງ­ກອນ-19 ມີ­ນາ 2019 ມີ​ລາຍ​ງານ​ຈຳ­ນວນ​ກໍ­ລະ­ນີ​ພະ­ຍາດ­ໝາກ­ແດງ 322 ກໍ­ລະ­ນີ ເສຍ​ຊີ­ວິດ 1 ກໍ­ລະ­ນີ ສະ­ເພາະ​ນະ­ຄອນ­ຫຼວງ​ວຽງ​ຈັນ ມີ 303 ກໍ­ລະ­ນີ ເສຍ​ຊີ­ວິດ 1 ກໍ­ລະ­ນີ ເກີດ​ຢູ່ 6 ເມືອງ ແຂວງ​ວຽງ​ຈັນ ມີ 17 ກໍ­ລະ­ນີ ແຂວງ​ຄຳ​ມ່ວນ 2 ກໍ­ລະ­ນີ.

    ກອງ​ປະ­ຊຸມ​ຄັ້ງ​ນີ້ ຍັງ​ໄດ້​ເຜີຍ­ແຜ່​ແນະ­ນຳ ປຶກ­ສາ​ຫາ­ລື​ກັນ ຂໍ​ຄວາມ​ຮ່ວມ​ມື​ກັບ​ສື່​ມວນ​ຊົນ ໃນ​ການ​ເຜີຍ­ແຜ່​ຂໍ້​ມູນ​ຂ່າວ­ສານ​ກ່ຽວ​ກັບ​ພະ­ຍາດ​ດັ່ງ­ກ່າວ​ໃຫ້​ສັງ­ຄົມ ໂດຍ​ສະ­ເພາະ ບັນ­ດາ​ຊົນ­ເຜົ່າ​ໃນ​ເຂດ​ຫ່າງ​ໄກ​ສອກ­ຫຼີກ ທີ່​ຍັງ​ຂາດ​ການ​ເຂົ້າ​ເຖິງ​ຂໍ້​ມູນ​ຂ່າວ­ສານ ແລະ ຄວາມ​ເຂົ້າ­ໃຈ​ທີ່​ບໍ່​ຖືກ­ຕ້ອງ​ກັບ​ພະ­ຍາດ​ດັ່ງ­ກ່າວ ໃຫ້​ຮັບ​ຮູ້​ເຂົ້າ­ໃຈ ເຮັດ​ໃຫ້​ພະ­ຍາດ​ດັ່ງ­ກ່າວ​ຫຼຸດ​ລົງ ແລະ ໝົດ​ໄປ​ໃນ ສປປ ລາວ.

ຂ່າວທີ່ກ່ຽວຂ້ອງ