ຂ່າວຫຼ້າສຸດ

ການ​ແຂ່ງຂັນ​ເປ​ຕັງ ຊີງ​ຂັນ​ປະທານ​ສະພາ ກຽມ​ຈັດ​ທ້າຍ​ເດືອນ​ນີ້

302 25 ມ.ນ. 2019 ວົງຈອນກີລາ
ການ​ແຂ່ງຂັນ​ເປ​ຕັງ ຊີງ​ຂັນ​ປະທານ​ສະພາ ກຽມ​ຈັດ​ທ້າຍ​ເດືອນ​ນີ້

    ທ່ານ ເດດ​ສຸວັນ ມະ​ໄລ​ທອງ ປະທານ​ສະຫະພັນ​ກີລາ​ເປ​ຕັງ​ແຂວງ​ສາລະ​ວັນ ໄດ້​ຖະແຫຼງ​ຂ່າວ​ຕໍ່​ສື່​ມວນ​ຊົນ ເມື່ອ​ວັນ​ທີ 19 ມີນາ ຜ່ານ​ມາ ວ່າ: ໃນ​ການ​ກະກຽມ​ເປັນ​ເຈົ້າພາບ ຈັດການ​ແຂ່ງຂັນ​ກີລາ​ເປ​ຕັງ ຊີງ​ຂັນ​ປະທານ​ສະພາ​ແຫ່ງ​ຊາດ ຄັ້ງ​ທີ IX ໃນ​ທ້າຍ​ເດືອນ​ມີນາ 2019 ນີ້ ນັບ​ມາ​ຮອດ​ປັດຈຸບັນ ພວກ​ເຮົາ​ມີ​ຄວາມ​ພ້ອມ​ແລ້ວ​ເກືອບ 90% ໂດຍ​ສະຖານທີ່​ຈັດການ​ແຂ່ງຂັນ​ແມ່ນ​ໄດ້​ກຳນົດ​ເອົາ​ສະໜາມ​ກີລາ​ເປ​ຕັງ ວິທະຍາໄລ​ຄູ​ສາລະ​ວັນ ທີ່​ມີ​ເຖິງ 37 ຂອດ ພ້ອມ​ນັ້ນ ສະຖານທີ່​ພັກ​ຂອງ​ຄະນະ​ນຳ ແລະ ນັກກີລາ ກໍ​ມີ​ໄວ້​ຮອງ​ຮັບ​ຢ່າງ​ພຽງພໍ ໂດຍ​ຄາດ​ວ່າ​ຈະ​ມີ​ນັກກີລາ​ຈາກ​ບັນດາ​ກະຊວງ ແຂວງ ແລະ 1 ນະຄອນຫຼວງ​ວຽງ​ຈັນ ເຂົ້າ​ຮ່ວມ​ຫຼາຍ​ຮ້ອຍ​ຄົນ ການ​ແຂ່ງຂັນ​ຄັ້ງ​ນີ້ ຈະ​ມີ​ການ​ຊີງ​ເອົາ​ຫຼຽນ ແລະ ຂັນ​ແຫ່ງ​ກຽດຕິຍົດ  ທັງ​ໜົດ 7 ລາຍການ​ຄື: ດ່ຽວ​ຍິງ-ຊາຍ ຄູ່​ຍິງ-ຊາຍ ທີມ​ຍິງ-ຊາຍ ແລະ ຮຸ່ນ​ກິດ​ຕິ​ມະ​ສັກ ອາຍຸ 45 ປີ​ຂຶ້ນ​ໄປ.

     ການ​ແຂ່ງຂັນ​ກີລາ​ເປ​ຕັງ​ຄັ້ງ​ນີ້ ແມ່ນ​ງານ​ກີລາ​ລະດັບ​ຊາດ ສະແດງ​ອອກ​ເຖິງ​ອະລິຍະ​ທຳ​ມູນເຊື້ອ ອັນ​ດີງາມ​ຂອງ​ປະຊາຊົນ​ບັນດາເຜົ່າ ເປັນ​ການ​ສົ່ງເສີມ ແລະ ພັດທະນາ​ວຽກ​ງານ​ກີລາ-ກາຍຍະກຳ​ແຫ່ງ​ຊາດ ໃຫ້​ນັບ​ມື້​ເຂັ້ມແຂງ ຮັບປະກັນ​ຈຸດປະສົງ ແລະ ລະດັບ​ຄາດ​ໜາຍ​ເປັນ​ການ​ສົ່ງເສີມ​ການ​ຂະຫຍາຍຕົວ​ທາງ​ດ້ານ​ວຽກ​ງານ​ກີລາ-ກາຍຍະກຳ ເຂົ້າ​ສູ່​ມວນ​ຊົນ​ບັນດາເຜົ່າ​ໃຫ້​ຫັນ​ມາ​ຫຼິ້ນ​ກີລາ​ຢ່າງ​ກວ້າງຂວາງ ແລະ ຕໍ່​ເນື່ອງ​ຍົກ​ສູງ​ສະມັດ​ຕະ​ພາບ​ທາງ​ດ້ານ​ຮ່າງກາຍ ແລະ ມານະ​ຈິດໃຈ​ໃນ​ການ​ຮັບ​ໃຊ້​ວຽກ​ງານ​ການ​ພັດທະນາ​ເສດຖະກິດ-ສັງຄົມ ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ​ເປັນ​ການເຄື່ອນໄຫວ​ດ້ານ​ວັດທະນະທຳ-ສັງຄົມ ສ້າງ​ນ້ຳໃຈ​ສາມັກຄີ ມີ​ລະບຽບ​ວິໄນ​ຂອງ​ຊາວ​ໜຸ່ມ ນັກ​ສຶກ​ສາ ປັນຍາ​ຊົນ ແລະ ປວງ​ຊົນ​ລາວ​ບັນດາ ເຜົ່າ.

    ສຳລັບ​ລາງວັນ​ທີ 1 ປະເພດ​ດ່ຽວ​ຍິງ-ຊາຍ ຈະ​ໄດ້​ຮັບ​ຂັນ+ຫຼຽນ​ຄຳ+ເງິນສົດ 2,5 ລ້ານ​ກີບ ທີ 2 ຈະ​ໄດ້​ຮັບ​ຫຼຽນ​ເງິນ+ເງິນສົດ 1,5 ລ້ານ​ກີບ ແລະ ທີ 3 ຈະ​ໄດ້​ຮັບ​ຫຼຽນ​ທອງ+ເງິນສົດ 1 ລ້ານ​ກີບ ສ່ວນ​ປະເພດ​ທີມ​ຄູ່​ຍິງ-ຊາຍ ທີ 1 ຈະ​ໄດ້​ຮັບ​ຂັນ+ຫຼຽນ​ຄຳ+ເງິນສົດ 3 ລ້ານ​ກີບ ທີ 2 ຈະ​ໄດ້​ຮັບ​ຫຼຽນ​ເງິນ+ເງິນສົດ 2 ລ້ານ​ກີບ ແລະ ທີ 3 ຈະ​ໄດ້​ຮັບ​ຫຼຽນ​ທອງ+ເງິນສົດ 1 ລ້ານ​ກີບ ປະເພດ​ທີມ​ຊຸດ​ຊາຍ ທີ 1 ຈະ​ໄດ້​ຮັບ​ຂັນ+ຫຼຽນ​ຄຳ+ເງິນສົດ 5 ລ້ານ​ກີບ ທີ 2 ຈະ​ໄດ້​ຮັບ​ຫຼຽນ​ເງິນ+ເງິນສົດ 3 ລ້ານ​ກີບ ແລະ ທີ 3 ຈະ​ໄດ້​ຮັບ​ຫຼຽນ​ທອງ+ເງິນສົດ 1 ລ້ານ​ກີບ ປະເພດ​ທີມ​ຊຸດ​ຍິງ ທີ 1 ຈະ​ໄດ້​ຂັນ+ຫຼຽນ​ຄຳ+ເງິນສົດ 4,5 ລ້ານ​ກີບ ທີ 2 ຈະ​ໄດ້​ຮັບ​ຫຼຽນ​ເງິນ+ເງິນສົດ 2,5 ລ້ານ​ກີບ ແລະ ທີ 3 ຈະ​ໄດ້​ຮັບ​ຫຼຽນ​ທອງ+ເງິນສົດ 1 ລ້ານ​ກີບ ທີມ​ຄູ່​ອາວຸໂສ ທີ 1 ຈະ​ໄດ້​ຮັບ​ຂັນ+ຫຼຽນ​ຄຳ+ເງິນສົດ 3 ລ້ານ​ກີບ ທີ 2 ຈະ​ໄດ້​ຮັບ​ຫຼຽນ​ເງິນ+ເງິນສົດ 2 ລ້ານ​ກີບ ແລະ ທີ 3 ຈະ​ໄດ້​ຮັບ​ຫຼຽນ​ທອງ+ເງິນສົດ 1 ລ້ານ​ກີບ.

ຂ່າວທີ່ກ່ຽວຂ້ອງ