ຈີນ​ ຈະດຳ​ເນີນ​ບັ້ນລຶບ​ລ້າງ​ຄວາມທຸກ​ຍາກ​​ໃນ​ປີ​ນີ້

296 22 ມ.ນ. 2019 ຂ່າວຕ່າງປະເທດ
ຈີນ​ ຈະດຳ​ເນີນ​ບັ້ນລຶບ​ລ້າງ​ຄວາມທຸກ​ຍາກ​​ໃນ​ປີ​ນີ້

    ກອງ​ປະຊຸມ​ສອງ​ສະພາ​ຂອງ​ຈີນ ຄື ກອງ​ປະຊຸມ​ສະພາ​ປຶກສາ​ການເມືອງ​ປະຊາຊົນ​ແຫ່ງ​ຊາດ​ຈີນ ແລະ ກອງ​ປະຊຸມ​ສະພາ​ປະຊາຊົນ​ແຫ່ງ​ຊາດ​ຈີນ ຫາ​ກໍ​ສິ້ນ​ສຸດ​ລົງ​ໃນ​ອາທິດ​ຜ່ານ​ມາ ຊຶ່ງ​ເປັນ​ການ​ເລີ່ມ​ຕົ້ນ ຂະ​ບວນ​ການ​ແຫ່ງ​ການ​ສູ້​ຊົນ​ຜ່ານ​ຜ່າ​ຂະ​ບວນ​ການ​ໃໝ່​ຂອງ​ປະຊາຊົນ​ຈີນ ໂດຍ​ໃນ​ນີ້ ພາລະກິດ​ການ​ລຶບລ້າງ​ຄວາມທຸກ​ຍາກ ທີ່​ພວມ​ຢູ່​ໃນ​ຂັ້ນ​ຕອນ​ປະສົບ​ຄວາມ​ຫຍຸ້ງຍາກ​ທີ່​ສຸດ​ນັ້ນ  ຈຶ່ງ​ບໍ່​ຕ້ອງ​ສົງ​ໃສ​ເລີຍ​ວ່າ​ເປັນ​ບັ້ນ​ສຳຄັນ​ທີ່​ສຸດ​ສຳລັບ​ລັດຖະບານ ແລະ​ປະຊາຊົນ​ຈີນ ທີ່​ຈະ​ປະ​ເຊີນ​ໜ້າ​ໃນ​ປີ​ນີ້.

    ໃນ​ໄລຍະ​ກອງ​ປະຊຸມ​ສອງ​ສະພາ​ດັ່ງກ່າວ ທ່ານ​ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ເຂົ້າ​ຮ່ວມ​ການ​ຄົ້ນຄວ້າ​ພິຈາລະນາ​ຂອງ​ຄະນະ​ຜູ້​ແທນ​ທ້ອງຖິ່ນ​ຕ່າງໆ ແລະ ໄດ້​ເວົ້າ​ເຖິງ​ບັນຫາ​ການ​ລຶບລ້າງ​ຄວາມທຸກ​ຍາກ​ຫຼາຍ​ເທື່ອ. ຈີນ​ໄດ້​ວາງ​ເປົ້າ​ໝາຍ​ການ​ສ້າງ​ສັງຄົມ​ອີ່ມ​ໜຳ​ສຳລານ​ໃຫ້​ສຳເລັດ​ຮອບດ້ານ​ໃນ​ປີ 2020 ແລະ ໃນ​ປີ 2019 ຈະ​ເປັນ​ປີ​ທີ່​ສຳຄັນ​ທີ່​ສຸດ ທີ່​ຈະ​ຕ້ອງ​ເອົາ​ຊະນະ​ໃນ​ບັ້ນ​ລຶບລ້າງ​ຄວາມທຸກ​ຍາກ ທີ່​ພວມ​ຢູ່​ໃນ​ຂັ້ນ​ຕອນ​ປະສົບ​ຄວາມ​ຫຍຸ້ງຍາກ​ທີ່​ສຸດ​ນີ້​ໃຫ້​ສຳເລັດ.

   ການ​ລຶບລ້າງ​ຄວາມທຸກ​ຍາກ ເປັນ​ສິ່ງ​ທ້າ​ທາຍ​ທີ່​ມີ​ລັກສະນະ​ທົ່ວ​ໂລກ​ທີ່​ໃຫຍ່​ທີ່​ສຸດ ຊຶ່ງ​ໂລກ​ພວມ​ປະ​ເຊີນ​ໃນ​ປັດຈຸບັນ ໃນ​ຂະນະ​ທີ່​ຈີນ​ໄດ້​ຮັບ​ຜົນສຳເລັດ​ອັນ​ພົ້ນ​ເດັ່ນ​ແລ້ວ​ໃນ​ດ້ານ​ນີ້. ທະນາຄານ​ໂລກ​ໄດ້​ເປີດເຜີຍ​ຕົວ​ເລກ​ຂໍ້​ມູນ​ວ່າ ໃນ​ບໍລິເວນ​ທົ່ວ​ໂລກ ໃນ​ແຕ່​ລະ 100 ຄົນ​ໃດ ທີ່​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ ຈະ​ມີ 70 ຄົນ​ເປັນ​ຄົນ​ຈີນ. ນັບ​ແຕ່​ປີ 1978-2017 ຈີນ​ສາມາດ​ເຮັດ​ໃຫ້ 700 ລ້ານ​ກວ່າ​ຄົນ ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ຕາມ​ເສັ້ນ​ກຳນົດ​ຄວາມທຸກ​ຍາກ​ຂອງ​ສາກົນ ໂດຍ​ຜ່ານ​ການ​ປະຕິ​ຮູບ-ເປີດ​ປະຕູ​ສູ່​ພາຍ​ນອກ ແລະ ພັດທະນາ​ເສດຖະກິດ.

   ທ່ານ​ໂຈ​ເຊ ກຣາ​ເຊຍ​ໂນ ດາ ຊີນ​ວາ ຜູ້ອຳນວຍການ​ໃຫຍ່​ອົງການ​ອາຫານ ແລະ ​ການ​ກະເສດ​ແຫ່ງ​ອົງການ​ສະຫະ​ປະຊາ​ຊາດ (FAO) ກ່າວ​ໄວ້​ວ່າ ເປົ້າ​ໝາຍ​ການ​ລຶບລ້າງ​ຄວາມທຸກ​ຍາກ​ຂອງ​ຈີນ ຍັງ​ໄວ​ກວ່າ 10 ປີ ຂອງ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ເມື່ອ​ຮອດ​ປີ 2030 ຂອງ​ອົງການ​ສະຫະ​ປະຊາ​ຊາດ. ທ່ານ​ຈິມ​ຢົງ​ກິມ ອະດີດ​ຜູ້ອຳນວຍການ​ໃຫຍ່​ທະນາຄານ​ໂລກ (WB) ກໍ​ເຫັນ​ວ່າ ພາລະກິດ​ການ​ລຶບລ້າງ​ຄວາມທຸກ​ຍາກ​ຂອງ​ຈີນ ແມ່ນ​ໜຶ່ງ​ໃນ​ເຫດການ​ທີ່​ຍິ່ງ​ໃຫຍ່​ທີ່​ສຸດ ໃນ​ປະຫວັດສາດ​ຂອງ​ມວນ​ມະນຸດ.

    ເຖິງ​ຢ່າງໃດ​ກໍ​ຕາມ ຈາກ​ປັດ​ໄຈ​ຕ່າງໆ​ເຊັ່ນ ປະຫວັດສາດ ທຳ​ມະ​ຊາດ ປະຊາກອນ ແລະ ​ການ​ພັດທະນາ​ເສດຖະກິດ​ບໍ່​ສະ​ໝ່ຳ​ສະເໝີ ຈຶ່ງ​ເຮັດ​ໃຫ້​ຈີນ​ຍັງ​ມີ​ປະຊາຊົນ​ທຸກ​ຍາກ​ຫຼາຍ​ສິບ​ລ້ານ​ຄົນ. ຕາມ​ຂໍ້​ມູນ​ຈາກ​ອົງການ​ສະຖິຕິ​ແຫ່ງ​ຊາດ​ຈີນ ໃຫ້​ຮູ້​ວ່າ ຮອດ​ທ້າຍ​ປີ​ກາຍ​ນີ້ ຊົນນະບົດ​ຈີນ​ຍັງ​ມີ​ຜູ້​ທຸກ​ຍາກ 16,6 ລ້ານ​ຄົນ. ລັດຖະບານ​ຈີນ​ໄດ້​ໃຫ້​ຄຳ​ໝັ້ນ​ສັນຍາ ວ່າ​ປີ​ນີ້​ຈະ​ຫຼຸດ​ຈຳນວນ​ຜູ້​ທຸກ​ຍາກ​ລົງ​ອີກ 10 ລ້ານ​ຄົນ​ຂຶ້ນ​ໄປ.

 

ຂ່າວທີ່ກ່ຽວຂ້ອງ