ກາ​ຊັກ​ສະຖານ ປ່ຽນ​ຊື່​ນະຄອນຫຼວງ

227 22 ມ.ນ. 2019 ຂ່າວຕ່າງປະເທດ
ກາ​ຊັກ​ສະຖານ ປ່ຽນ​ຊື່​ນະຄອນຫຼວງ

    ຂ່າວສານ AFP ລາຍ​ງານ​ວ່າ ວັນ​ທີ 20 ມີນາ​ນີ້ ສະພາ​ແຫ່ງ​ຊາດ​ກາ​ຊັກ​ສະຖານ ໄດ້​ລົງ​ຄະແນນ​ສຽງ​ກ່ຽວ​ກັບ​ການ​ຕົກລົງ​ປ່ຽນ​ຊື່​ນະຄອນຫຼວງ ເພື່ອ​ເປັນ​ການ​ສັນລະເສີນ ອະດີດ​ປະທານາທິບໍດີ ນູ​ຊຸນ​ຕານ ນາ​ຊາ​ບາ​ແຢບ (Nursultan Nazarbayev) ຜູ້​ຊຶ່ງ​ໄດ້​ກຳ​ອຳນາດ​ໃນ​ການ​ນຳພາ​ປະເທດ​ຊາດ​ມາ​ເປັນ​ເວລາ​ຫຼາຍ​ປີ ແລະ​ ໄດ້​ປະກາດ​ລາ​ອອກ​ຈາກ​ຕຳແໜ່ງ​ໄປ ເມື່ອ​ກ່ອນ​ໜ້າ​ນັ້ນ​ໜຶ່ງ​ວັນ.

    ສຳນັກ​ຂ່າວສານ​ແຫ່ງ​ລັດ Kazinform ຂອງ​ກາ​ຊັກ​ສະຖານ ລາຍ​ງານ​ວ່າ ໃນ​ເວລາ​ນີ້ ນະຄອນຫຼວງ ອາ​ຕານາ ໄດ້​ປ່ຽນ​ຊື່​ເປັນ ນູ​ຊຸນ​ຕານ (Nursultan) ຢ່າງ​ເປັນ​ທາງ​ການ.

    ໃນ​ວັນ​ດຽວ​ກັນ ນາງ ດາ​ຣີ​ກາ ນາ​ຊາ​ບາ​ແຢບ ຜູ້​ເປັນ​ລູກ​ສາວ​ກົກ ຂອງ​ອະດີດ​ປະທານາທິບໍດີ ນູ​ຊຸນ​ຕານ ນາ​ຊາ​ບາ​ແຢບ ກໍ​ໄດ້​ຮັບ​ເລືອກ​ຕັ້ງ​ເປັນ​ປະທານ​ສະພາ​ສູງ​ຂອງ​ກາ​ຊັກ​ສະຖານ ໂດຍ​ເຂົ້າ​ໄປ​ແທນ​ທີ່​ທ່ານ ໂຈ​ມາດ ໂຕ​ກາ​ແຢບ ທີ່​ໄດ້​ເຂົ້າ​ພິທີ​ສາບານ​ຕົນ​ຮັບ​ຕຳແໜ່ງ ເປັນ​ປະທານາທິບໍດີ​ຊົ່ວຄາວ ເພື່ອ​ບໍລິຫານ​ປະເທດ ຫຼັງ​ຈາກ​ທີ່ ປະທານາທິບໍດີ ນູ​ຊຸນ​ຕານ ນາ​ຊາ​ບາ​ແຢບ ປະກາດ​ລາ​ອອກ​ຈາກ​ຕຳແໜ່ງ​ຢ່າງ​ບໍ່​ຄາດ​ຝັນ ເມື່ອ​ວັນ​ທີ 19 ມີນາ.

ຂ່າວທີ່ກ່ຽວຂ້ອງ