ຜູ້​ເສຍ​ຊີວິດ​ຍ້ອນ​ນ້ຳ​ຖ້ວມ ​ແລະ ​ດິນ​ເຈື່ອນ​ຢູ່​ໃນ​ອິນ​ໂດ​ເນ​ເຊຍ ​ເພີ່ມ​ຂຶ້ນ​ອີກ

239 22 ມ.ນ. 2019 ຂ່າວຕ່າງປະເທດ
ຜູ້​ເສຍ​ຊີວິດ​ຍ້ອນ​ນ້ຳ​ຖ້ວມ ​ແລະ ​ດິນ​ເຈື່ອນ​ຢູ່​ໃນ​ອິນ​ໂດ​ເນ​ເຊຍ ​ເພີ່ມ​ຂຶ້ນ​ອີກ

    ຈຳນວນ​ຜູ້​ເສຍ​ຊີວິດ ຈາກ​ເຫດການ​ນ້ຳນອງ​ໄຫຼ​ສຸ ແລະ ​ດິນ​ເຈື່ອນ​ຢູ່​ໃນ​ແຂວງ​ປາ​ປົວ ຂອງ​ອິນ​ໂດ​ເນ​ເຊຍ ໃນ​ຊຸມ​ມື້​ທີ່​ຜ່ານ​ມາ​ໄດ້​ເພີ່ມ​ຂຶ້ນ​ເປັນ 107 ຄົນ ແລະ ​ຄາດ​ວ່າ​ຍັງ​ຈະ​ເພີ່ມ​ຂຶ້ນ​ອີກ ເມື່ອ​ກອງ​ກຳລັງ​ກູ້​ໄພ​ພວມ​ພະຍາຍາມ​ຄົ້ນ​ຫາ​ຜູ້​ຫາຍ​ສາຍ​ສູນ 93 ຄົນ. ນອກຈາກ​ນັ້ນແລ້ວ ຍັງ​ມີ​ຜູ້​ໄດ້​ຮັບ​ບາດເຈັບ​ສາຫັດ​ອີກ​ຢ່າງ​ໜ້ອຍ 80 ຄົນ ແລະ ບາດເຈັບ​ເລັກ​ນ້ອຍ 75 ຄົນ.

    ແຈ້ງ​ການ​ຂອງ​ໂຄສົກ​ອົງການ​ຄວບ​ຄຸມ​ໄພພິບັດ​ອິນ​ໂດ​ເນ​ເຊຍ ທີ່​ມີ​ອອກ​ມາ​ເມື່ອ​ວັນ​ທີ 20 ມີນາ​ນີ້ ໃຫ້​ຮູ້​ວ່າ ນ້ຳນອງ​ໄຫຼ​ສຸ ແລະ ​ດິນ​ເຈື່ອນ ໄດ້​ເຮັດ​ໃຫ້​ປະຊາຊົນ​ເກືອບ 10.000 ຄົນ ຕ້ອງ​ໄດ້​ອົບ​ພະ​ຍົບ​ອອກ​ຈາກ​ເຮືອນ​ຊານ​ເພື່ອ​ໜີ​ໄພ ໂດຍ​ໄປ​ອາ​ໃສ​ຢູ່​ໃນ​ສູນ​ອົບ​ພະ​ຍົບ​ສຸກ​ເສີນ 20 ແຫ່ງ ຊຶ່ງ​ຕົ້ນຕໍ​ແມ່ນ​ນຳ​ໃຊ້​ອາຄານ​ຂອງ​ລັດຖະບານ ເປັນ​ສູນ​ອົບ​ພະ​ຍົບ.

   ໃນ​ເວລາ​ຮຸ່ງ​ເຊົ້າ​ຂອງ​ວັນ​ທີ 17 ມີນາ​ນີ້ ນ້ຳນອງ ແລະ​ດິນ​ເຈື່ອນ​ໄດ້​ທຳລາຍ​ຖະໜົນ​ຫົນທາງ ແລະ​ ຂົວ​ຫຼາຍ​ແຫ່ງ ຢູ່​ໃນ​ບາງ​ເຂດ​ຂອງ​ເມືອງ ຈາ​ຢາ​ປູ​ຣາ ທີ່​ຂຶ້ນ​ກັບ​ແຂວງ​ປາ​ປົວ ເຮັດ​ໃຫ້​ເກີດ​ຄວາມ​ຫຍຸ້ງຍາກ ໃຫ້​ແກ່​ຄວາມ​ພະຍາຍາມ​ກູ້​ໄພ. ໃນ​ຂະນະ​ດຽວ​ກັນ ລັດຖະບານ​ອິນ​ໂດ​ເນ​ເຊຍ ໄດ້​ປະກາດ​ພາວະ​ສຸກ​ເສີນ​ຢູ່​ໃນ​ແຂວງ​ປາ​ປົວ ເປັນ​ເວລາ 14 ວັນ. ກອງ​ກຳລັງ​ກູ້​ໄພ​ທີ່​ປະກອບ​ມີ 1.600 ກວ່າ​ຄົນ ໃນ​ນັ້ນ​ມີ ທະຫານ ຕຳຫຼວດ ໄດ້​ພົບ​ກັບ​ຄວາມ​ຫຍຸ້ງຍາກ ໃນ​ການ​ເກັບ​ມ້ຽນ​ຊາກ​ຫັກ​ພັງ ຍ້ອນ​ວ່າ​ຂາດ​ອຸປະກອນ​ຂະໜາດ​ໜັກ.

ຂ່າວທີ່ກ່ຽວຂ້ອງ