ຂ່າວຫຼ້າສຸດ

ຊຽງ​ຂວາງ-ວຽງ​ຈັນ ແລກປ່ຽນ​ບົດຮຽນ​ວຽກ​ງານ​ກີລາ-ກາຍຍະກຳ

331 22 ມ.ນ. 2019 ວົງຈອນກີລາ
ຊຽງ​ຂວາງ-ວຽງ​ຈັນ ແລກປ່ຽນ​ບົດຮຽນ​ວຽກ​ງານ​ກີລາ-ກາຍຍະກຳ

     ພະ​ແນກ​ສຶກ​ສາ​ທິ​ການ ແລະ ກີລາ (​ສສກ) ແຂວງ​ຊຽງ​ຂວາງ ແລະ ພະ​ແນກ ​ສສກ ແຂວງ​ວຽງ​ຈັນ ຈັດ​ກອງ​ປະຊຸມ​ພົບ​ປະ​ແລກປ່ຽນ​ບົດຮຽນ​ວຽກ​ງານ​ກີລາ-ກາຍຍະກຳ ເພື່ອ​ເສີມ​ຂະຫຍາຍ​ສາຍ​ພົວ ພັນ​ຄວາມ​ສາມັກຄີ ແລະ ແລກປ່ຽນ​ຄວາມ​ຮູ້-ປະສົບ​ການ​ດ້ານ​ວິຊາ​ການ ຂຶ້ນ​ວັນ​ທີ 14 ມີນາ ຢູ່​ແຂວງ​ຊຽງ​ຂວາງ ໂດຍ​ມີ​ທ່ານ ທອງ​ຜິວ ສີ​ປັນຍາ ຮອງ​ຫົວໜ້າ​ພະ​ແນກ ​ສສກ ຊຽງ​ຂວາງ ທ່ານ ແກ້ວ​ເພັດ ເສນາ​ຄຳ ຮອງ​ຫົວໜ້າ​ພະ​ແນກ ​ສສກ ແຂວງ​ວຽງ​ຈັນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ ຄຳ​ພອນ ຍອຍ​ສາຍ​ຄຳ ຫົວໜ້າ​ຂະແໜງ​ກີລາ​ມວນ​ຊົນ​ພະ​ແນກ ​ສກກ ແຂວງ​ຊຽງ​ຂວາງ ກ່າວ​ວ່າ: ພະ​ແນກ ​ສສກ ແຂວງ​ຊຽງ​ຂວາງ ປະກອບ​ມີ​ຂະແໜງ​ກີລາ​ສາຍ​ສູງ ຂະແໜງ​ກີລາ​ມວນ​ຊົນ ແລະ ຂະແໜງ​ພະລະ-ສິລະ​ປະ ໄດ້​ເປັນ​ເສນາ​ທິ​ການ​ໃຫ້​ຄະນະ​ພະ​ແນກ ໃນ​ການຈັດຕັ້ງ​ການເຄື່ອນໄຫວ​ວຽກ​ງານ​ຕາມ​ພາລະ​ບົດບາດ​ດ້ວຍ​ຄວາມ​ຮັບຜິດຊອບ​ສູງ ມີ​ການເຄື່ອນໄຫວ​ຢ່າງ​ຕໍ່​ເນື່ອງ ສະແດງ​ອອກ​ຢູ່​ແຕ່​ລະ​ເມືອງ ໂຮງຮຽນ​ມີ​ການ​ສອນ​ວິຊາ​ພະລະ-ສິລະ​ປະ ຕາມ​ຫຼັກສູດ​ໂຄງການ​ທີ່​ກະຊວງ ​ສສກ ວາງ​ອອກ.

    ຂະແໜງ​ກີລາ​ມວນ​ຊົນ ໄດ້​ມີ​ການຈັດຕັ້ງ​ສະເຫຼີມສະຫຼອງ​ວັນ​ສຳຄັນ​ຂອງ​ຊາດ ສາກົນ ແລະ ວັນ​ບຸນ​ປະເພນີ​ຕ່າງໆ ທີ່​ຂັ້ນ​ເທິງ​ຈັດ​ຂຶ້ນ ສາມາດ​ບັນລຸ​ໄດ້ 25,89% ທຽບໃສ່​ບັນດາ​ແຂວງ​ໃນ​ທົ່ວ​ປະເທດ ແມ່ນ​ຢູ່​ໃນ​ລະດັບ​ກາງ ສຳລັບ​ແຜນການ​ໃນຕໍ່ໜ້າ​ແຕ່​ລະ​ຂະແໜງການ ຈະ​ເອົາໃຈໃສ່​ເຝິກຊ້ອມ​ໃຫ້​ນັກ ຮຽນ​ຫຼາຍ​ຂຶ້ນ ໂດຍ​ສະເພາະ​ຂະແໜງ​ກີລາ​ລະດັບ​ສູງ ຈະ​ໄດ້​ສ້າງ​ຄູ​ເຝິກ​ເພື່ອ​ກຽມ​ຄັດ​ເລືອກ​ເອົາ​ນັກກີລາ​ໄປ​ເຝິກຊ້ອມ​ຢູ່​ພາຍ​ໃນ ແລະ ຕ່າງປະເທດ ເພື່ອ​ກຽມ​ເປັນ​ເຈົ້າ​ພາ ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ໃຫ້​ໄດ້ 28 ປະເພດ​ກີລາ ໃນ​ນີ້​ມີ​ຄະນະ​ນຳ ຄູ​ເຝິກ ແລະ ນັກກີລາ 705 ຄົນ.

ຂ່າວທີ່ກ່ຽວຂ້ອງ