ຍົກສູງຄວາມຮູ້ກ່ຽວກັບການຄວບຄຸມຝຸ່ນລະອອງ PM 2.5

332 21 ມ.ນ. 2019 ຂ່າວໜ້າ​ໜຶ່ງ

    ພະ​ແນກ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ນະ­ຄອນ­ຫຼວງ​ວຽງ​ຈັນ (ພຊສ ນວ) ຈັດ​ສຳ​ມະ​ນາ​ການ​ກະ­ກຽມ​ດຳ­ເນີນ​ມາດ​ຕະ­ການ ເພື່ອ​ຮັບ​ມື​ກັບ​ການ​ແຜ່​ກະ­ຈາຍ​ຂອງ​ຝຸ່ນ​ລະ­ອອງ PM 2.5 ເກີນ​ຄ່າ​ມາດ­ຕະ­ຖານ​ຢູ່ ນວ ຂຶ້ນ​ວັນ​ທີ 19 ມີ­ນາ 2019 ຢູ່​ພະ​ແນກ​ດັ່ງ­ກ່າວ ໂດຍ​ມີ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ທ່ານ ບຸນ​ຊົມ ຊົງ​ວິ­ໄລ ຮອງ​ຫົວ­ໜ້າ ພຊສ ນວ ເຈົ້າ­ເມືອງ-ຮອງ​ເຈົ້າ­ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຈຸດ­ປະ­ສົງ​ເພື່ອ​ໃຫ້​ຜູ້​ເຂົ້າ​ຮ່ວມ​ເຂົ້າ­ໃຈ​ເຖິງ​ສະ­ພາບ​ບັນ­ຫາ​ຝຸ່ນ​ລະ­ອອງ PM 2.5 ເກີນ​ຄ່າ​ມາດ­ຕະ­ຖານ ເພື່ອ​ລະ­ດົມ​ຄວາມ​ຄິດ​ເຫັນ​ດ້ານ​ມາດ­ຕະ­ຖານ​ແກ້​ໄຂ-ປ້ອງ​ກັນ​ການ​ກະ­ຈາຍ​ຂອງ​ຝຸ່ນ​ລະ­ອອງ​ດັ່ງ­ກ່າວ ແລະ ສະ­ແດງ​ໃຫ້​ເຫັນ​ເຖິງ​ຄວາມ​ຕື່ນ​ຕົວ​ຂອງ ນວ ຕໍ່​ການ​ແຜ່​ກະ­ຈາຍ​ຂອງ​ມົນ​ລະ​ພິດ​ເກີນ​ຄ່າ​ມາດ­ຕະ­ຖານ ຄຸ­ນະ­ພາບ​ສິ່ງ­ແວ­ດລ້ອມ​ແຫ່ງ​ຊາດ ກຳ­ນົດ​ປະ­ມານ 3,5 ເທົ່າ​ຕົວ.

    ທ່ານ ແກ້ວ​ພິ­ລາ​ວັນ ອາ​ໄພ​ລາດ ກ່າວ​ວ່າ: ນວ ເປັນ​ເມືອງ​ໜຶ່ງ​ທີ່​ນອນ​ໃນ​ເປົ້າ​ໝາຍ ເມືອງ​ທີ່​ມີ​ຄວາມ​ຍືນ​ຍົງ​ດ້ານ​ສິ່ງ­ແວ­ດລ້ອມ​ໃນ​ກຸ່ມ​ປະ­ເທດ​ອາ​ຊຽນ ເຊິ່ງ ນວ ໄດ້​ວາງ​ຄາດ­ໝາຍ ແລະ ນະ­ໂຍ­ບາຍ​ສິ່ງ­ແວ­ດລ້ອມ ໂດຍ​ສະ­ເພາະ ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ 6 ສ ຄາດ­ໝາຍ​ການ​ສ້າງ​ໃຫ້ ນວ ເປັນ​ເມືອງ​ສີ­ຂຽວ ສະ­ອາດ ແລະ ງາມ​ຕາ ແຕ່​ປັດ­ຈຸ­ບັນ​ສະ­ພາບ​ສິ່ງ­ແວ­ດລ້ອມ​ໃນ ນວ ກຳ­ລັງ​ປະ​ເຊີນ​ກັບ​ສິ່ງ​ທ້າ​ທາຍ​ຫຼາຍໆ​ດ້ານ​ເຊັ່ນ: ບັນ­ຫາ​ສິ່ງ­ແວ­ດລ້ອມ​ທີ່​ເກີດ​ຂຶ້ນ​ຈາກ​ໂຮງ​ຈັກ-ໂຮງ­ງານ ການ​ຖິ້ມ-ຈູດ​ຂີ້​ເຫຍື້ອ​ຊະ­ຊາຍ ການ​ຈູດ​ໄມ້​ທຳ­ລາຍ​ປ່າ ແລະ ອື່ນໆ ເຊິ່ງ​ໄດ້​ສ້າງ​ຄວາມ​ເປິ​ະ​ເປື້ອນ ສົ່ງ​ກິ່ນ​ເໝັນ ແລະ ມົນ​ລະ​ພິດ ຝຸ່ນ​ລະ­ອອງ​ຕ່າງໆ ໂດຍ​ສະ­ເພາະ ອາ­ທິດ​ຜ່ານ​ມາ ທົ່ວ ນວ ເລີ່ມ​ມີ​ຝຸ່ນ​ລະ­ອອງ​ຈຳ­ນວນ​ຫຼາຍ​ປົກ​ຄຸມ​ທອງ​ຟ້າ ເນື່ອງ​ຈາກ​ສະ­ພາບ​ອາ­ກາດ​ຮ້ອນ​ອົບ­ເອົ້າ ແລະ ມີ​ລົມ​ພັດ​ຝຸ່ນ​ລະ­ອອງ PM 2.5 ມາ​ຈາກ​ບ່ອນ​ອື່ນ ທັງ​ມີ​ການ​ກໍ່​ຕົວ​ຂອງ​ຝຸ່ນ​ອື່ນໆ ທີ່​ເກີດ​ມາ​ຈາກ​ການ​ປ່ອຍ​ຄວັນ​ຂອງ​ໂຮງ­ງານ​ອຸດ­ສາ­ຫະ­ກຳ ການ​ຈູດ​ເຜົາ​ສິ່ງ​ເສດ​ເຫຼືອ​ຕ່າງໆ ແລະ ໄຟ​ໄໝ້​ລາມ​ປ່າ​ໃນ ຢູ່​ເມືອງ​ນາ​ຊາຍ​ທອງ ສີ​ໂຄດ​ຕະ­ບອງ ແລະ ເມືອງ​ສັງ​ທອງ ບວກ​ກັບ​ໝອກ​ຄວັນ​ຈາກ​ແຂວງ​ໃກ້​ຄຽງ ແລະ ປະ­ເທດ​ເພື່ອນ​ບ້ານ ຈຶ່ງ​ໄດ້​ກໍ່​ຕົວ​ເຮັດ​ໃຫ້​ຝຸ່ນ​ລະ­ອອງ​ດັ່ງ­ກ່າວ ມີ­ຄ່າ​ສູງ​ມາດ­ຕະ­ຖານ​ແຫ່ງ​ຊາດ​ກຳ­ນົດ​ຫຼາຍ​ເທົ່າ​ຕົວ.

    ຕໍ່​ກັບ​ສະ­ພາບ​ການ​ທີ່​ເກີດ​ຂຶ້ນ ນວ ໄດ້​ມີ​ມາດ​ຕະ­ການ​ແກ້​ໄຂ​ຢ່າງ​ຮີບ​ດ່ວນ ແລະ ອອກ​ແຈ້ງ​ການ​ເຖິງ​ທຸກ​ພາກ­ສ່ວນ​ໃນ​ສັງ­ຄົມ ເພື່ອ​ເພີ່ມ​ຄວາມ​ເອົາ­ໃຈ­ໃສ່​ປົກ​ປັກ​ຮັກ­ສາ ແລະ ປ້ອງ​ກັນ​ສິ່ງ­ແວ­ດລ້ອມ ດ້ວຍ​ການ​ຫ້າມ​ບຸກ­ຄົນ ນິ­ຕິ­ບຸກ­ຄົນ ຈູດ​ຂີ້​ເຫຍື້ອ ຈູດ​ປ່າ​ຕາມ​ໄຮ່ ນາ ສວນ ແລະ ອື່ນໆ ໃນ​ບໍ­ລິ­ເວນ​ບ້ານ ເທ­ສະ​ບານ​ເມືອງ ແລະ ນວ ຢ່າງ​ເດັດ­ຂາດ ເພື່ອ​ສະ­ກັດ​ກັ້ນ​ບໍ່​ໃຫ້​ມີ​ຝຸ່ນ​ລະ­ອອງ ຫຼື ມົນ​ລະ​ພິດ​ເພີ່ມ​ຂຶ້ນ ເພື່ອ​ສ້າງ​ໃຫ້​ສະ­ພາບ​ແວດ​ລ້ອມ​ຂອງ ນວ ເປັນ​ເມືອງ​ທີ່​ໜ້າ​ຢູ່ ແລະ ສະ­ອາດ​ຈົບ­ງາມ ຕາມ​ນະ­ໂຍ­ບາຍ 6 ສ ວາງ​ອອກ.

ຂ່າວທີ່ກ່ຽວຂ້ອງ