ສຳເລັດ​ການເຝິກແອບ-ແຂ່ງຂັນ​ປິງ​ປ່ອງ​ເຍົາວະ​ຊົນ​ອາ​ຊຽນ

248 21 ມ.ນ. 2019 ວົງຈອນກີລາ
ສຳເລັດ​ການເຝິກແອບ-ແຂ່ງຂັນ​ປິງ​ປ່ອງ​ເຍົາວະ​ຊົນ​ອາ​ຊຽນ

    ນັກກີລາ​ປິງ​ປ່ອງ​ເຍົາວະ​ຊົນ ຮຸ່ນ​ອາຍຸ​ບໍ່​ເກີນ 12 ປີ ຈາກ 5 ຊາດ ໃນ​ອາ​ຊຽນ ຄື: ​ສປປ ລາວ ສິງກະໂປ ມາ​ເລ​ເຊຍ ຟີ​ລິບ​ປິນ ແລະ ໄທ 19 ຄົນ ຍິງ 8 ຄົນ ສຳເລັດ​ການ​ຈັດ​ແຄ້ມ​ເຝິກແອບ ແລະ ແຂ່ງຂັນ​ກີລາ​ປິງ​ປ່ອງ ວັນ​ທີ 15 ມີນາ 2019 ຢູ່​ສູນ​ການ​ຄ້າ​ໄອ​ເຕັກ​ມໍ ໂດຍ​ມີ​ທ່ານ ສົມ​ພູ ພົງສາ ຜູ້​ຊ່ວຍ​ລັດຖະມົນຕີ​ກະຊວງ​ສຶກ​ສາ​ທິ​ການ ແລະ ກີລາ ຮອງ​ປະທານ ແລະ ເລຂາທິການ​ຄະ ນະ​ກຳມະການ​ໂອ​ແລມ​ປິກ​ແຫ່ງ​ຊາດ​ລາວ (​ຄອລ) ທ່ານ ແສງ​ພອນ ພົນ​ອາມາດ ຫົວໜ້າ​ກົມ​ກິລາ​ລະ ດັບ​ສູງ ພ້ອມ​ດ້ວຍ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

    ທ່ານ​ນາງ ສົມ​ໃຈ ວົງສາ ເລຂາທິການ​ສະຫະພັນ​ກິລາ​ປິງ​ປ່ອງ​ແຫ່ງ​ຊາດ​ລາວ ກ່າວ​ວ່າ: ການ​ຈັດ​ແຄ້ມ​ເຝິກແອບ ແລະ ແຂ່ງຂັນ​ກີລາ​ປິງ​ປ່ອງ​ຄັ້ງ​ນີ້ ຈັດ​ຂຶ້ນ​ພາຍ​ໃຕ້​ໂຄງການ “ເຝິກແອບ​ນັກ​ກິລາ​ປິງ​ປ່ອງ​ເຍົາວະ​ຊົນ​ອາ​ຊຽນ ປະຈຳ​ປີ 2019” ເພື່ອ​ຄັດ​ເລືອກ​ນັກກີລາ​ເຍົາວະ​ຊົນ​ອາ​ຊຽນ ຮຸ່ນ​ອາຍຸ​ບໍ່​ເກີນ 12 ປີ ທັງ​ເປັນ​ການ​ສົ່ງເສີມ-ພັດທະນາ​ວົງ​ການ​ກີລາ​ປິງ​ປ່ອງ​ລາວ ແລະ ອາ​ຊຽນ ໃຫ້​ມີ​ບາດກ້າວ​ເຕີບ​ໃຫຍ່​ຂະຫຍາຍຕົວ ທຽບ​ເທົ່າ​ກັບ​ພາກ​ພື້ນ ແລະ ສາກົນ ໂດຍ​ການ​ຈັດ​ແຄ້ມ​ດັ່ງກ່າວ​ໄດ້​ດຳເນີນ​ແຕ່​ວັນ​ທີ 10-15 ມີນາ 2019.

    ສຳລັບ​ຜົນ​ການ​ແຂ່ງຂັນ​ປະເພດ​ດ່ຽວ​ຊາຍ ອັນ​ດັບ 1 ທ້າວ TAN Nicholae ຈາກ​ປະເທດ​ສິງ ກະ​ໂປ ທີ 2 ທ້າວ MANLAPAZRAY Joshua Lawtence ຈາກ​ຟີ​ລິບ​ປິນ ທີ 3 ທ້າວ SAKUMPEE Weerasak ຈາກ​ໄທ ແລະ ທ້າວ NG Hong Siu ຈາກ​ສິງກະໂປ ປະເພດ​ດ່ຽວ​ຍິງ ອັນ​ດັບ 1 ນາງ CHANVANITBORIKAN Pacharaphorn ຈາກ​ປະເທດ​ໄທ ທີ 2 ນາງ DERUJUAROEN Khemisrar ຈາກ​ໄທ ທີ 3 ນາງ GAN Ai Lis ຈາກ​ມາ​ເລ​ເຊຍ ແລະ ນາງ LEE Eng Kee ຈາກ​ສິງກະໂປ.

ຂ່າວທີ່ກ່ຽວຂ້ອງ