ລະວັງຂອງປອມ ຈະມາຄູ່ກັບການໂຄສະນາຫຼອກລວງ

807 20 ມ.ນ. 2019 ນານາສາລະ

    ຜູ້​ຂຽນ​ແອບ​ຄິດ​ດີ­ໃຈ ທີ່​ໄດ້​ຕິດ­ຕາມ​ຮູ້​ຂ່າວ​ມີ​ຫຼາຍ​ໜ່ວຍ​ງານ​ກ່ຽວ­ຂ້ອງ​ທີ່​ລົງ​ກວດ­ກາ​ນ້ຳ­ມັນ ສິນ­ຄ້າ ແລະ ອາ­ຫານ​ຕາມ​ຕະ­ຫຼາດ ເພາະ​ສິນ­ຄ້າ ຫຼື ອາ­ຫານ​ດັ່ງ­ກ່າວ ເພື່ອ​ພີ່­ນ້ອງ​ຄົນ​ລາວ​ຊື້​ໄປ ຖ້າ​ມີ​ຄຸນ​ນະ​ພາບ​ກໍ​ຈະ​ສົ່ງ​ຜົນ​ດີ​ຕໍ່​ສຸ­ຂະ­ພາບ ອີກ​ດ້ານ​ໜຶ່ງ​ຜູ້​ຊື້​ໄດ້​ສິນ­ຄ້າ​ມີ​ຄຸນ​ນະ​ພາບ​ກໍ​ເປັນ​ການ​ບໍ່​ໂກງ ບໍ່​ເອົາ​ປຽບ​ກັນ ລະ­ຫວ່າງ ຜູ້​ຊື້-ຜູ້​ຂາຍ ເຊິ່ງ​ນັ້ນ​ຄື​ຄວາມ​ຍຸດ­ຕິ​ທຳ​ຂອງ​ທຸກ​ຝ່າຍ​ທີ່​ສັງ­ຄົມ​ປາ­ຖະ­ໜາ.

    ກົມ​ອາ­ຫານ ແລະ ຢາ ກະ­ຊວງ​ສາ­ທາ­ລະ­ນະ​ສຸກ ໄດ້​ອອກ​ແຈ້ງ​ການ ເລກ​ທີ 1004 ທີ 6 ກຸມ­ພາ 2019 ເລື່ອງ​ຫ້າມ​ບໍ­ລິ­ໂພກ ແລະ ຈຳ­ໜ່າຍ​ຜະ­ລິດ​ຕະ​ພັນ​ອາ­ຫານ​ເສີມ 133 ລາຍ­ການ ເຊິ່ງ​ປະ­ກອບ​ມີ​ຜະ­ລິດ​ຕະ​ພັນ​ຫຼາຍ​ປະ­ເພດ ເຊັ່ນ: ປະ­ເພດ​ຢາ​ຊູ​ກຳ­ລັງ ປະ­ເພດ​ເຄື່ອງ​ສຳ­ອາງ​ທາ​ຜິວ​ຂາວ...ອວດ​ອ້າງ​ສັບ­ພະ​ຄຸນ​ເກີນ​ຄວາມ​ຈິງ ພ້ອມ​ນີ້ ກໍ​ມີ​ສານ​ເຄ​ມີ​ອັນ­ຕະ­ລາຍ​ປົນ​ຢູ່​ໃນ​ຜະ­ລິດ​ຕະ​ພັນ​ດັ່ງ­ກ່າວ ເຊິ່ງ​ແຈ້ງ​ການ​ດັ່ງ­ກ່າວ ຍັງ​ໄດ້​ຝາກ​ເນັ້ນ​ໃຫ້​ສາ­ທາ­ລະ­ນະ​ສຸກ ແຂວງ ແລະ ເມືອງ ໄດ້​ລົງ​ກວດ­ກາ​ຢູ່​ຕາມ​ຕະ­ຫຼາດ ຖ້າ​ພົບ​ເຫັນ​ໃຫ້​ຢຶດ ແລະ ປະ­ຕິ­ບັດ​ກົດ­ໝາຍ​ຕໍ່​ຜູ້­ກ່ຽວ ຂ້າງ​ເທິງ​ນັ້ນ​ຄື​ຜະ­ລິດ​ຕະ​ພັນ​ອາ­ຫານ​ເສີມ ແຕ່​ຍັງ​ມີ​ຂ່າວ​ທີ່​ສັງ­ຄົມ​ໄດ້​ຮູ້​ເຫັນ​ດ້ວຍ​ຕາ​ຕົນ​ເອງ ກໍ​ຄື ອາ­ຫານ​ປອມ ເຊັ່ນ: ໄຂ່​ປອມ ເລືອດ​ປອມ...ບັນ­ດາ​ອາ­ຫານ​ປອມ​ຍັງ​ບໍ່​ແລ້ວ ສັງ­ຄົມ​ຍັງ​ພົບ​ວ່າ​ຢູ່​ຕາມ​ຮ້ານ​ຄ້າ ຫຼື ຕະ­ຫຼາດ ລາ­ຄາ​ສິນ­ຄ້າ​ບາງ​ປະ­ເພດ​ລູກ​ຄ້າ​ຖືກ​ເອົາ​ປຽບ ເພາະ​ພໍ່­ຄ້າ-ແມ່​ຄ້າ​ໄດ້​ຂາຍ​ໃນ​ລາ­ຄາ​ແພງ​ເກີນ​ໄປ ເຊິ່ງ​ມັນ​ໄດ້​ຮຽກ­ຮ້ອງ​ໃຫ້​ຝ່າຍ​ກ່ຽວ­ຂ້ອງ ຂໍ​ໃຫ້​ລົງ​ກວດ­ກາ​ຕົວ​ຈິງ​ໃຫ້​ເຂັ້ມ​ງວດ ພ້ອມ​ອອກ​ມາດ​ຕະ­ການ​ຕໍ່​ຜູ້​ລະ­ເມີດ​ຢ່າງ​ເຂັ້ມ​ງວດ ເພື່ອ​ເຮັດ​ໃຫ້​ສັງ­ຄົມ​ບ້ານ​ເຮົາ​ໄດ້​ຊົມ­ໃຊ້ ຫຼື ບໍ­ລິ­ໂພກ​ອາ­ຫານ​ຖືກ​ຕາມ​ສຸ​ຂະ​ລັກ­ສະ­ນະ ເພື່ອ​ສຸ­ຂະ­ພາບ​ຂອງ​ຄົນ​ລາວ ແລະ ເຍົາ­ວະ​ຊົນ​ຜູ້​ຈະ​ກຳ​ອະ­ນາ­ຄົດ​ຂອງ​ຊາດ.

    ເລື່ອງ​ອາ­ຫານ​ປອມ ແລະ ລາ­ຄາ​ສິນ­ຄ້າ​ແພງ​ເກີນ​ເຫດ​ນີ້ ເປັນ​ເລື່ອງ​ທີ່​ສັງ­ຄົມ​ຕິດ­ຕາມ​ເອົາ­ໃຈ­ໃສ່ ເພາະ​ມັນ​ສົ່ງ​ຜົນ​ກະ­ທົບ​ຕໍ່​ຊີ­ວິດ​ຂອງ​ເຂົາ­ເຈົ້າ ເພາະ​ຖ້າ​ປະ­ປ່ອຍ​ໃຫ້​ມີ​ການ​ຜູກ­ຂາດ ຫຼື ເອົາ​ປຽບ​ລູກ​ຄ້າ​ນັ້ນ​ເຂົາ​ກໍ​ຈະ​ເອີ້ນ ພໍ່­ຄ້າ​ໜ້າ​ເລືອດ ຫຼື ບໍ່​ດັ່ງ­ນັ້ນ ເຂົາ​ກໍ​ສົງ­ໄສ​ວ່າ​ຜູ້­ກ່ຽວ​ຮ່ວມ​ມື​ກັບ​ພະ­ນັກ­ງານ​ບາງ​ຄົນ ເພື່ອ​ສວຍ­ໂອ­ກາດ​ສ້າງ​ຮັ່ງ​ຄູນ​ມີ​ໃສ່​ຖົງ​ໂຕ​ເອງ.

    ສັງ​ລວມ​ວ່າ: ຂໍ​ໃຫ້​ການ­ຈັດ­ຕັ້ງ​ກ່ຽວ­ຂ້ອງ​ໄດ້​ລົງ​ຕິດ­ຕາມ​ກວດ­ກາ​ຢ່າງ​ລຽນ­ຕິດ (ເຮັດ​ເປັນ​ໜ້າ­ທີ່​ປົກ­ກະ­ຕິ) ຕາມ​ຮ້ານ​ຄ້າ ແລະ ຕະ­ຫຼາດ ລວມ​ທັງ​ການ​ຊັ່ງ​ຕາ­ຊິງ ທີ່​ແມ່​ຄ້າ​ເອົາ​ປຽບ​ຜູ້​ຊື້ ເຈົ້າ​ໜ້າ­ທີ່​ຄວນ​ລົງ­ໂທດ​ພວກ​ນີ້ ຫຼື ພວກ​ຈັດ​ສັນ​ຕະ­ຫຼາດ​ຕ້ອງ​ເຂັ້ມ​ງວດ ເພາະ​ແມ່​ຄ້າ​ຕັ້ງ​ຊິງ​ໄວ້​ຍັງ​ຫຼຽວ​ບໍ່​ເຫັນ ສວຍ­ໂອ­ກາດ​ໜ້າ​ຕາ​ເສີຍ ເພື່ອ​ຄວາມ​ຍຸດ­ຕິ​ທຳ​ຂອງ​ສັງ­ຄົມ​ນໍ.

ຂ່າວທີ່ກ່ຽວຂ້ອງ