ຂ່າວຫຼ້າສຸດ

ຫາລືຮ່າງຍຸດທະສາດວຽກປົກປ້ອງສັງຄົມ

446 19 ມ.ນ. 2019 ຂ່າວໜ້າ​ໜຶ່ງ

    ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ຮ່າງ​ຍຸດ​ທະ​ສາດ ວຽກ​ປົກ​ປ້ອງ​ສັງ­ຄົມ​ແຫ່ງ​ຊາດ ຮ່ວມ​ກັບ​ບັນ­ດາ​ຂະ­ແໜງ­ການ​ຂອງ​ລັດ ແລະ ຄູ່​ຮ່ວມ​ພັດ­ທະ­ນາ ຂຶ້ນ​ວັນ​ທີ 13 ມີ­ນາ 2019 ຢູ່​ໂຮງ­ແຮມ​ລ້ານ​ຊ້າງ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ ຮສສ ແລະ ທ່ານ​ນາງ ຄາ​ຣິ​ນາ ອິມ​ໂມ​ເນັນ ວ່າ­ການ​ຜູ້​ປະ­ສານ​ງານ​ອົງ­ການ​ສະ­ຫະ​ປະ­ຊາ​ຊາດ ປະ­ຈຳ​ລາວ ມີ​ຮອງ​ລັດ­ຖະ­ມົນ­ຕີ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ປຶກ­ສາ​ຫາ­ລື​ກ່ຽວ​ກັບ​ວຽກ​ປົກ​ປ້ອງ​ສັງ­ຄົມ 4 ໃສ່​ຮ່າງ​ຍຸດ​ທະ​ສາດ​ວຽກ​ປົກ​ປ້ອງ​ສັງ­ຄົມ​ແຫ່ງ​ຊາດ ຮ່ວມ​ກັບ​ບັນ­ດາ​ຂະ­ແໜງ­ການ​ຂອງ​ລັດ ແລະ ຄູ່​ຮ່ວມ​ພັດ­ທະ­ນາ ເພື່ອ​ໃຫ້​ມີ​ເນື້ອ​ໃນ​ສອດ­ຄ່ອງ​ກັບ​ນະ­ໂຍ­ບາຍ​ຂອງ​ລັດ ແລະ ສາ­ມາດ​ເຊື່ອມ​ໂຍງ​ກັບ​ຖະ­ແຫຼງ­ການ​ອາ​ຊຽນ ວ່າ​ດ້ວຍ​ການ​ສ້າງ​ຄວາມ​ເຂັ້ມ­ແຂງ​ວຽກ​ງານ​ປົກ​ປ້ອງ​ສັງ­ຄົມ ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ແລະ ອື່ນໆ.

    ທ່ານ ຄຳ​ແພງ ໄຊ​ສົມ​ແພງ ກ່າວ​ວ່າ: ວຽກ​ງານ​ປົກ​ປ້ອງ​ສັງ­ຄົມ ເປັນ​ວຽກ​ງານ​ທີ່​ມີ​ຄວາມ​ສຳ­ຄັນ ເຊິ່ງ​ໄດ້​ຖືກ​ກຳ­ນົດ​ເປັນ​ວາ­ລະ​ສຳ­ຄັນ ຂອງ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ຂອງ​ອົງ­ການ​ສະ­ຫະ​ປະ­ຊາ​ຊາດ ໂດຍ​ໄດ້​ຮັບ​ຮູ້​ຄວາມ​ໝາຍ ແລະ ຄວາມ​ສຳ­ຄັນ​ຂອງ​ວຽກ​ງານ​ປົກ​ປ້ອງ​ສັງ­ຄົມ ເພື່ອ​ແນ­ໃສ່​ຫຼຸດ­ຜ່ອນ​ຄວາມ­ທຸກ​ຍາກ ແລະ ຄວາມ​ບໍ່​ສະ­ເໝີ­ພາບ​ທາງ​ສັງ­ຄົມ ນອກ​ນີ້ ທ່ານ​ຍັງ​ຮຽກ­ຮ້ອງ​ໃຫ້​ຜູ້​ເຂົ້າ​ຮ່ວມ​ກອງ​ປະ­ຊຸມ ຄົ້ນ­ຄວ້າ ປຶກ­ສາ​ຫາ­ລື ແລະ ປະ­ກອບ​ຄຳ​ເຫັນ​ໃສ່​ຮ່າງ​ຍຸດ​ທະ​ສາດ ວຽກ​ງານ​ປົກ​ປ້ອງ​ສັງ­ຄົມ​ແຫ່ງ​ຊາດ​ສະ­ບັບ​ນີ້ ໃຫ້​ມີ​ເນື້ອ​ໃນ​ຖືກ­ຕ້ອງ ຄົບ​ຖ້ວນ ຊັດ​ເຈນ ແລະ ສອດ­ຄ່ອງ​ກັບ​ສະ­ພາບ​ຄວາມ​ເປັນ​ຈິງ ເພື່ອ​ຈະ​ນຳ​ສະ­ເໜີ​ຕໍ່​ລັດ­ຖະ­ບານ​ໃຫ້​ພິ­ຈາ­ລະ­ນາ​ຮັບ­ຮອງ.

ຂ່າວທີ່ກ່ຽວຂ້ອງ