ເບິ່ງບ້ານເຂົາເອົາບົດຮຽນ 19/03/2019

115 19 ມ.ນ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ທາງ​ການ ຟິ​ລິບ​ປິນ ຫ້າມ​ບໍ­ລິ­ສັດ​ຕ່າງໆ​ບັງ­ຄັບ​ພະ­ນັກ­ງານ​ຍິງ​ໃສ່​ເກີບ​ສົ້ນ​ສູງ ເລື່ອງ​ຈຳ­ນວນ ປອ ເພດ​ຍິງ ຢູ່ ສິງ­ກະ­ໂປ ແລະ ຂໍ້​ຫ້າມ​ລົງ­ທຶນ​ໃສ່​ການ​ຄ້າ​ປະ­ເວ­ນີ​ທີ່​ຫວຽດ­ນາມ.

    ທີ່ ຟິ​ລິບ​ປິນ: ແຕ່­ໃດໆ​ມາ ຢູ່​ຟິ​ລິບ​ປິນ ບັນ­ດາ​ບໍ­ລິ­ສັດ​ຕ່າງໆ​ມີ​ກົດ​ລະ­ບຽບ​ເຫຼັກ​ບັງ­ຄັບ​ໃຫ້​ພະ­ນັກ­ງານ​ຍິງ​ໃສ່​ເກີບ​ສົ້ນ​ສູງໆ ຢູ່​ໃນ​ບ່ອນ​ເຮັດ​ວຽກ ແຕ່​ໃນ​ທີ່​ສຸດ​ກໍ​ມີ​ຂ່າວ​ວ່າ ລັດ­ຖະ­ບານ​ໄດ້​ອອກ​ຄຳ​ສັ່ງ ຫ້າມ​ບັນ­ດາ​ບໍ­ລິ­ສັດ​ຢູ່​ພາຍ​ໃນ​ປະ­ເທດ​ທັງ​ໝົດ​ບັງ­ຄັບ​ແມ່­ຍິງ​ໃສ່​ເກີບ​ສົ້ນ​ສູງ ໂດຍ​ຖື​ວ່າ ການ​ກະ­ທຳ​ດັ່ງ­ກ່າວ​ເປັນ​ອັນ­ຕະ­ລາຍ​ຕໍ່​ສະ​ຂະ​ພາບ​ຂອງ​ແມ່­ຍິງ ໂດຍ​ສະ­ເພາະ​ແມ່ນ​ພາກ­ສ່ວນ​ທີ່​ຕ້ອງ​ໄດ້​ໃຊ້​ເວ­ລາ​ຢືນ​ດົນໆ ເຊັ່ນ: ພະ­ນັກ­ງານ​ຂາຍ​ສິນ­ຄ້າ​ຕາມ​ຫ້າງ​ຮ້ານ ພະ­ນັກ­ງານ​ຕ້ອນ­ຮັບ​ຢູ່​ຕາມ​ໂຮງ­ແຮມ ແລະ ສະ­ໜາມ​ບິນ ໃນ​ເອ­ກະ­ສານ​ສັ່ງ​ຫ້າມ​ນັ້ນ​ໄດ້​ກຳ­ນົດ​ວ່າ: ບັນ­ດາ​ນາຍ​ຈ້າງ​ຄວນ​ປະ­ກາດ​ໃຊ້​ຂໍ້​ກຳ­ນົດ​ໃຫ້​ພະ­ນັກ­ງານ​ຍິງ​ໃສ່​ເກີບ​ທີ່​ມີ​ສົ້ນ​ສູງ​ຂະ­ໜາດ​ພໍ­ດີ ແລະ ຕາມ​ຄວາມ​ເປັນ​ຈິງ ເພື່ອ​ຮັບ­ປະ­ກັນ​ສຸ­ຂະ­ພາບ​ຂອງ​ພະ­ນັກ­ງານ​ຍິງ ເຊັ່ນ: ເກີບ​ສົ້ນ​ສູງ​ປະ­ມານ 2,54 ຊັງ​ຕີ​ແມັດ ຫຼື ສູງ​ຕາມ​ການ​ເລືອກ​ຂອງ​ພະ­ນັກ­ງານ​ຍິງ​ເອງ ຄຳ​ສັ່ງ​ຫ້າມ​ບັນ­ດາ​ບໍ­ລິ­ສັດ ບັງ­ຄັບ​ພະ­ນັກ­ງານ​ຍິງ​ໃສ່​ເກີບ​ສົ້ນ​ສູງໆ​ເວ­ລາ​ເຮັດ​ວຽກ​ນີ້ ໄດ້​ຮັບ​ການ​ຕອບ​ຮັບ​ເປັນ​ຢ່າງ​ດີ ຈາກ​ຊາວ​ຜູ້​ອອກ­ແຮງ​ງານ​ຟິ​ລິບ​ປິນ ເພາະ​ຖື​ວ່າ ກົດ​ລະ­ບຽບ​ບັງ­ຄັບ​ຂອງ​ເຫຼົ່າ​ບໍ­ລິ­ສັດ​ນັ້ນ ເປັນ​ຮູບ​ການ​ຈຳ­ແນກ​ໜຶ່ງ​ຕໍ່​ເພດ​ຍິງ ຢູ່ ຟິ​ລິບ​ປິນ ພະ­ນັກ­ງານ​ຂາຍ​ສິນ­ຄ້າ ພະ­ນັກ­ງານ​ວິ້ງ​ເຕັ້ນ​ເກັບ​ລາຍ​ຮັບ ກໍ​ຄື ພະ­ນັກ­ງານ​ຕ້ອນ­ຮັບ​ນັ້ນ​ສ່ວນ​ໃຫຍ່​ແມ່ນ​ເພດ​ຍິງ.

    ທີ່ ສິງ­ກະ­ໂປ: ຂ່າວ​ນີ້​ອ່າວ​ເກົ່າ ແຕ່​ກໍ​ເປັນ​ບົດ­ຮຽນ​ທີ່​ຊີ້​ອອກ​ວ່າ ແມ່­ຍິງ​ສິງ­ກະ­ໂປ​ນັ້ນ ມີ​ເຄົ້າ​ພະ­ລັງ​ທີ່​ຈະ​ກ້າວ​ຂຶ້ນ​ເທົ່າ​ທຽມ​ເພດ​ຊາຍ​ໃນ​ທຸກໆ​ດ້ານ ບໍ່​ວ່າ​ຈະ​ເປັນ​ດ້ານ​ຄຸນ​ນະ​ພາບ ກໍ​ຄື ປະ­ລິ­ມານ ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 9 ມີ­ນາ ປີ 2017 ຊີ້​ອອກ​ວ່າ ແມ່­ຍິງ​ສິງ­ກະ­ໂປ​ທີ່​ເປັນ​ເຈົ້າ​ຂອງ​ປະ­ກາ­ສະ­ນີ­ຍະ­ບັດ ລະ­ດັບ​ປະ­ລິນ­ຍາ​ເອກ (ປອ) ສາ­ຂາ​ວິ­ທະ­ຍາ­ສາດ​ນັ້ນ ນັບ​ມື້​ນັບ​ເພີ່ມ​ຈຳ­ນວນ​ຂຶ້ນ ບົດ​ຂ່າວ​ໄດ້​ອ້າງ​ເຖິງ​ຕົວ​ເລກ​ຄົ້ນ­ຄວ້າ​ຂອງ​ໜ່ວຍ​ງານ​ຄົ້ນ­ຄວ້າ ແລະ ພັດ­ທະ­ນາ​ຂອງ​ສິງ­ກະ­ໂປ ທີ່​ບອກ​ວ່າ ໃນ​ປີ 2010 ແມ່­ຍິງ ສິງ­ກະ­ໂປ ທີ່​ມີ​ຄວາມ​ຮູ້​ຂັ້ນ​ປະ­ລິນ­ຍາ​ເອກ​ໃນ​ຂະ­ແໜງ​ຄົ້ນ­ຄວ້າ​ວິ­ທະ­ຍາ­ສາດ ແລະ ວິ­ສະ­ວະ­ກຳ​ນັ້ນ ມີ​ຈຳ­ນວນ 1.729 ຄົນ ແລະ ໄດ້​ເພີ່ມ​ຂຶ້ນ​ເປັນ 2.740 ຄົນ ຕາມ​ສະ­ຖິ­ຕິ ປີ 2014 ບອກ​ວ່າ ໄດ້​ເພີ່ມ​ຂຶ້ນ​ຫຼາຍ​ກວ່າ 50% ພາຍ​ໃນ 3 ປີ ເທົ່າ​ນັ້ນ (2012-2014) ສະ­ຖິ­ຕິ​ທີ່​ສົມ​ທຽບ​ຈຳ­ນວນ ປອ ເພດ​ຍິງ ແລະ ເພດ​ຊາຍ ໃນ​ຂະ­ແໜງ​ຄົ້ນ­ຄວ້າ​ວິ­ທະ­ຍາ­ສາດ ວິ­ສະ­ວະ­ກຳ​ສາດ ເຕັກ​ໂນ​ໂລ​ຊີ ໃນ​ປີ 2015 (ສະ­ຖິ­ຕິ​ໃນ​ເດືອນ​ມີ­ນາ 2015) ຊີ້​ອອກ​ວ່າ ປ.ອ ເພດ​ຊາຍ​ມີ​ຈຳ­ນວນ 7.168 ຄົນ ເພດ​ຍິງ 2.483 ຄົນ ເມື່ອ​ສົມ​ທຽບ​ກັບ​ບັນ­ດາ​ປະ­ເທດ​ໃນ​ອົງ­ການ​ຮ່ວມ​ມື​ທາງ​ເສດ­ຖະ­ກິດ  ແລະ  ການ​ພັດ­ທະ­ນາ (OECD) ແລ້ວ ສະ­ຖິ­ຕິ​ໃນ​ປີ 2014 ຊີ້​ອອກ​ວ່າ ແມ່­ຍິງ​ສິງ­ກະ­ໂປ ລະ­ດັບ ປອ ຂະ­ແໜງ​ຄົ້ນ­ຄວ້າ​ວິ­ທະ­ຍາ­ສາດ ແລະ ວິ­ສະ­ວະ­ກຳ​ສາດ​ນັ້ນ ກວມ​ເອົາ 29% ຂອງ ປອ ພາຍ​ໃນ​ປະ­ເທດ ຢູ່​ປະ­ເທດ​ຝຣັ່ງ ກວມ​ເອົາ 25% ແລະ ຢູ່ ເຢຍ​ລະ​ມັນ 28%.

    ທີ່ ຫວຽດ­ນາມ: ກົດ­ໝາຍ​ການ​ລົງ­ທຶນ​ຂອງ​ຫວຽດ­ນາມ​ທີ່​ໄດ້​ຮັບ​ການ​ປັບ­ປຸງ ໃນ​ປີ 2016 ໄດ້​ກຳ­ນົດ​ຫ້າມ​ການ​ລົງ­ທຶນ​ໃນ 11 ຂະ­ແໜງ­ການ ລວມ​ມີ​ຂະ­ແໜງ­ການ​ທີ່​ພົວ­ພັນ​ກັບ​ຄວາມ​ໝັ້ນ­ຄົງ​ຂອງ​ຊາດ ການ​ຊື້-ຂາຍ​ອະ​ໄວ​ຍະ​ວະ​ມະ­ນຸດ ການ​ຜະ­ລິດ​ສິນ­ຄ້າ​ທີ່​ຂັດ​ຕໍ່​ສິນ​ລະ​ທຳ​ທາງ​ສັງ­ຄົມ ສິນ­ຄ້າ​ປອມ​ແປງ ລອກ​ແບບ ສິນ­ຄ້າ​ທີ່​ເປັນ​ໄພ​ຕໍ່​ຄົນ ແລະ ສັດ ພິ­ເສດ ກົດ­ໝາຍ​ໄດ້​ກຳ­ນົດ​ຫ້າມ​ການ​ລົງ­ທຶນ​ໃສ່​ການ​ຄ້າ​ປະ­ເວ­ນີ.

ຂ່າວທີ່ກ່ຽວຂ້ອງ