ມວຍ​ປ້ຳ​ລາວ​ກຽມ​ເຂົ້າ​ຮ່ວມ​ແຂ່ງຂັນ​ທີ່​ປະເທດ​ໄທ

272 19 ມ.ນ. 2019 ວົງຈອນກີລາ
ມວຍ​ປ້ຳ​ລາວ​ກຽມ​ເຂົ້າ​ຮ່ວມ​ແຂ່ງຂັນ​ທີ່​ປະເທດ​ໄທ

   ຕາມ​ການ​ລາຍ​ງານ​ຂອງ​ທ່ານ ມະໂນ​ລົມ ພິນິດ ຄູ​ຝຶກ​ກີລາ​ມວຍ​ປ້ຳ​ທີມ​ຊາດ​ລາວ ໃນ​ວັນ​ທີ 15 ມີນາ 2019 ໃຫ້​ຊາບ​ວ່າ: ໃນ​ວັນ​ທີ 4-10 ເມສາ 2019 ສະຫະພັນ​ມວຍ​ປ້ຳ​ແຫ່ງ​ຊາດ​ລາວ ກຽມ​ສົ່ງ​ຄະນະ​ນຳ 2 ທ່ານ ກຳມະການ​ຕັດສິນ 4 ທ່ານ ຄູ​ຝຶກ 1 ທ່ານ ແລະ ນັກກີລາ 8 ຄົນ ເຂົ້າ​ຮ່ວມ​ການ​ແຂ່ງຂັນ​ກີລາ​ມວຍ​ປ້ຳ ລາຍການ South East Asian Junior & Cadet Wrestling Open 2019 ຈະ​ຈັດ​ຂຶ້ນ​ທີ່​ແຂວງ​ສີສະ​ເກດ ປະເທດ​ໄທ ໃນ​ນັ້ນ​ນຳ​ຂະ​ບວນ​ທັບ​ນັກກີລາ​ໂດຍ​ທ່ານ ຄຳນວນ ປັນຍາ​ສານ ຫົວໜ້າ​ຄະນະ ແລະ ທ່ານ ບຸນ​ເຮືອງ ດວງ​ປະເສີດ ຮອງ​ຫົວໜ້າ​ຄະນະ ສ່ວນ​ນັກກີລາ ມີ​ທ້າວ ໄຊ​ສົມບູນ ເພັດ​ສຸພັນ ຮຸ່ນ​ນ້ຳໜັກ 130 ກິ​ໂລ ທ້າວ ໄຊ​ນະ​ພອນ ທຸມ​ມະ​ແສງ ຮຸ່ນ​ນ້ຳໜັກ 125 ກິ​ໂລ ທ້າວ ດ້ຳ ອາດ​ວິໄລ ຮຸ່ນ​ນ້ຳໜັກ 61 ກິ​ໂລ ທ້າວ ບຸນ​ທຽນ ກົມ​ມະ​ລາ ຮຸ່ນ​ນ້ຳໜັກ 57 ກິ​ໂລ ທ້າວ ວິລະ​ເທບ ສົດ​ທິ​ລົມ ຮຸ່ນ​ນ້ຳໜັກ 65 ກິ​ໂລ ທ້າວ ຂັນ​ຊາຍ ທິດາ​ວົງ ຮຸ່ນ​ນ້ຳໜັກ 70 ກິ​ໂລ ແລະ ນາງ ມະນີ​ຈັນ ອິນ​ແພງ ຮຸ່ນ​ນ້ຳໜັກ 49 ຫາ 50 ກິ​ໂລ ທັງ​ໝົດ​ນີ້ ແມ່ນ​ໄດ້​ມີ​ການເຄື່ອນໄຫວ ແລະ ເກັບ​ຕົວ​ຝຶກ​ຊ້ອມ​ມາ​ດົນ ແລະ ພວກ​ເຮົາ​ພ້ອມ​ທີ່​ຈະ​ເຂົ້າ​ຮ່ວມ​ການ​ແຂ່ງຂັນ​ແລ້ວ.

    ນອກຈາກ​ເຂົ້າ​ຮ່ວມ​ການ​ແຂ່ງຂັນ​ຄັ້ງ​ນີ້​ຍັງ​ໄດ້​ສົ່ງ​ບຸກ​ຄະລາ​ກອນ​ຈຳນວນ​ໜຶ່ງ​ເຂົ້າ​ຮ່ວມ​ຝຶກ​ອົບຮົມ​ຍົກ​ລະດັບ​ຄວາມ​ຮູ້​ຄວາມ​ສາມາດ​ການ​ເປັນ​ກຳມະການ​ຕັດສິນ​ກີລາ​ມວຍ​ປ້ຳ ແລະ ກີລາ​ມວຍ​ກູ​ຣັກ ໃນ​ວັນ​ທີ 1-6 ເມສາ 2019 ທີ່​ບາງກອກ ປະເທດ​ໄທ ຫຼັງ​ສຳເລັດ​ການ​ຝຶກ​ອົບຮົມ​ຊຸດ​ນີ້​ຈະ​ໄດ້​ຮຽກ​ຜູ້​ທີ່​ຖືກ​ສົ່ງ​ເຂົ້າ​ຮ່ວມ​ມາ​ເຕົ້າໂຮມ​ກັນ​ເພື່ອ​ໃຫ້​ເຂົາເຈົ້າ​ກຽມ​ຖ່າຍ​ທອດ​ຄວາມ​ຮູ້​ຄວາມ​ສາມາດ​ໃຫ້​ຮຸ່ນ​ສືບ​ທອດ ສາມາດ​ຮຽນ​ຮູ້ ແລະ ນຳໄປ​ພັດທະນາ ເສີມ​ຂະຫຍາຍ​ມູນເຊື້ອ​ໃຫ້​ຕໍ່ໆກັນ​ຢ່າງ​ທົ່ວ​ເຖິງ ສົ່ງເສີມ​ວົງ​ການ​ກີລາ​ມວຍ​ປ້ຳ​ລາວ​ໃຫ້​ນັບ​ມື້​ເຕີບ​ໃຫຍ່​ຂະຫຍາຍຕົວ ແລະ ມີ​ທ່າ​ກ້າວ​ທີ່​ພົ້ນ​ເດັ່ນ ສາມາດ​ຮັບປະກັນ​ເຂົ້າ​ຮ່ວມ​ແຂ່ງຂັນ​ຍາດ​ເອົາ​ຜົນງານ​ໃນ​ເວທີ​ລະດັບ​ພາກ​ພື້ນ ອາ​ນຸ​ພາກ​ພື້ນ ແລະ ສາກົນ ໃນຕໍ່ໜ້າ​ອີກ​ດ້ວຍ. 

ຂ່າວທີ່ກ່ຽວຂ້ອງ