ຂ່າວຫຼ້າສຸດ

ຍ້ອງຍໍຜູ້ສະໜັບສະໜູນ ງານບຸນມະໂຫລານສົ່ງເສີມການອ່ານ

263 18 ມ.ນ. 2019 ຂ່າວໜ້າ​ໜຶ່ງ
ຍ້ອງຍໍຜູ້ສະໜັບສະໜູນ ງານບຸນມະໂຫລານສົ່ງເສີມການອ່ານ

    ພິ­ທີ​ມອບ​ໃບ​ຍ້ອງ­ຍໍ​ໃຫ້​ຜູ້​ສະ­ໜັບ­ສະ­ໜູນ ການ​ຈັດ​ງານ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ​ຂອງ​ນະ­ຄອນ­ຫຼວງ​ວຽງ​ຈັນ (ນວ) ຄັ້ງ​ທີ 1 ຈັດ​ຂຶ້ນ​ວັນ​ທີ 15 ມີ­ນາ 2019 ຢູ່​ສູນ​ການ​ຄ້າ​ເວີ​ເທດ​ເຊັນ​ເຕີ ນວ ໃຫ້​ກຽດ​ມອບ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ປະ­ທານ​ຊີ້​ນຳ​ຈັດ​ງານ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ​ຂອງ ນວ ຄັ້ງ​ທີ 1.

    ທ່ານ ພອນ​ຈັນ ແພງ​ພູ​ວັນ ຮອງ​ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ ນວ) ກ່າວ​ວ່າ: ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ​ຂອງ ນວ ຄັ້ງ​ທີ 1 ຈັດ​ຂຶ້ນ​ວັນ​ທີ 7-17 ມີ­ນາ 2019 ເຊິ່ງ​ນັບ​ແຕ່​ວັນ​ເປີດ​ງານ​ເຖິງ​ປັດ­ຈຸ­ບັນ ທຸກ​ໜ້າ​ວຽກ​ຢູ່​ໃນ​ຂໍ້​ຕົກ­ລົງ​ໄດ້​ຖືກ​ຈັດ​ຕັ້ງ​ເປັນ​ຂະ​ບວນ​ດ້ວຍ​ຄວາມ​ຮັບ­ຜິດ­ຊອບ​ສູງ ໃນ​ນີ້ ວຽກ​ງານ​ໂຄ­ສະ­ນາ​ໄດ້​ຈັດ​ຕັ້ງ​ຫຼາຍ​ຊ່ອງ​ທາງ ເປັນ­ຕົ້ນ ສື່​ອອນ​ລາຍ ມີ​ຜູ້​ເຂົ້າ​ຕິດ­ຕາມ 5.000 ຄົນ ໂທລະ­ພາບ 3 ຊ່ອງ ວິ­ທະ­ຍຸ 5 ຄື້ນ ໜັງ­ສື­ພິມ 5 ສະ­ບັບ ໃບ​ປິວ 40.000 ໃບ ສອດ​ໜັງ­ສື­ພິມ 10.000 ໃບ ປ້າຍ​ໂຄ­ສະ­ນາ​ຂ້າມ​ທາງ 20 ຈຸດ ປ້າຍ​ໂຄ­ສະ­ນາ​ແຄມ​ທາງ 5 ປ້າຍ ປ້າຍ​ຕິດ­ຕາມ​ເສົາ​ໄຟ 2.000 ປ້າຍ ວຽກ​ງານ​ກິດ­ຈະ­ກຳ​ມີ​ການ​ແຫ່​ຂະ​ບວນ​ພາ​ເລດ ແຕ່​ສວນ​ປະ­ຕູ​ໄຊ-ສູນ​ການ​ຄ້າ​ເວີ​ເທດ​ເຊັນ​ເຕີ 10 ຂະ​ບວນ ຈາກ 10 ໂຮງ­ຮຽນ 1.250 ຄົນ ສະ­ແດງ​ຟ້ອນ ເຕັ້ນ ຮ້ອງ­ເພງ 80 ລາຍ­ການ ຈາກ 20 ໂຮງ­ຮຽນ ຟ້ອນ​ຕ້ອນ­ຮັບ 4 ລາຍ­ການ ຈາກ​ສູນ​ບໍ­ລິ­ການ​ຄົນ​ພິ­ການ ການ­ສະ­ແດງ​ຈາກ​ສະ­ຖານ­ທູດ​ອິນ​ໂດ​ເນ​ເຊຍ ແລະ ສະ­ຖານ­ທູດ​ຟີ​ລິບ​ປິນ ກິດ­ຈະ­ກຳ​ມອບ​ປຶ້ມ​ໃຫ້​ຄູ-ອາ­ຈານ ແລະ ນັກ­ຮຽນ 1.000 ກວ່າ​ຫົວ ພາຍ​ໃນ​ງານ​ມີ​ຫ້ອງ​ວາງ​ປຶ້ມ 110 ຫ້ອງ ໃນ​ນີ້ ຈາກ​ສຳ­ນັກ​ພິມ​ປະ­ເທດ​ໄທ 20 ຫ້ອງ​ວາງ­ສະ­ແດງ ສະ­ມາ­ຄົມ​ການ​ພິມ ຮ້ານ​ຂາຍ​ປຶ້ມ ແລະ ສຳ­ນັກ​ພິມ​ແຫ່ງ​ປະ­ເທດ​ລາວ 80 ຫ້ອງ ຮ້ານ​ຄ້າ​ອື່ນໆ​ກ່ຽວ​ກັບ​ການ​ສຶກ​ສາ 10 ຫ້ອງ​ວາງ­ສະ­ແດງ ນອກ​ນີ້​ຍັງ​ມີ​ກິດ­ຈະ­ກຳ​ແຂ່ງ­ຂັນ​ຮ້ອງ­ເພງ ເວົ້າ ອ່ານ ຂຽນ ພິມ ແຕ້ມ​ຮູບ ຖາມ-ຕອບ ແລະ ທວາຍ ກິດ­ຈະ­ກຳ​ກີ­ລາ ແລະ ເສວະ­ນາ​ຈາກ​ຜູ້​ປະ­ສົບ​ຜົນ­ສຳ­ເລັດ​ດ້ານ​ການ​ຂຽນ ການ​ເວົ້າ ການ​ສຶກ​ສາ ແລະ ທຸ­ລະ​ກິດ​ທັງ​ພາຍ​ໃນ ແລະ ຕ່າງ­ປະ­ເທດ ເຊິ່ງ​ສັງ​ລວມ​ແລ້ວ ຜ່ານ​ການ​ຈັດ​ກິດ­ຈະ­ກຳ​ດັ່ງ­ກ່າວ ແມ່ນ​ດຳ­ເນີນ​ໄປ​ດ້ວຍ​ບັນ­ຍາ­ກາດ​ທີ່​ດີ ມີ​ເນື້ອ​ໃນ ແລະ ຄວາມ​ໝາຍ​ຄວາມ​ສຳ­ຄັນ ສາ­ມາດ​ຮັກ­ສາ​ໄດ້​ຄວາມ​ສະ­ຫງົບ ເປັນ​ລະ­ບຽບ​ຮຽບ​ຮ້ອຍ ໃນ​ນີ້ ນັບ​ແຕ່​ວັນ​ເປີດ​ງານ​ເຖິງ​ປັດ­ຈຸ­ບັນ ມີ​ຜູ້​ເຂົ້າ​ມາ​ຮ່ວມ 40.000 ກວ່າ​ຄົນ.

    ສຳ­ລັບ​ຜູ້​ໄດ້​ຮັບ​ການ​ຍ້ອງ­ຍໍ​ຄັ້ງ​ນີ້ ມີ 17 ພາກ­ສ່ວນ ຄື: ບໍ­ລິ­ສັດ ລາວ​ທາ­ນີ ຈຳ­ກັດ ສຳ­ນັກ​ພິມ​ມີ​ດີ​ບຸກ ບໍ­ລິ­ສັດ ປານ​ຄຳ​ຈຳ­ປາ ຈຳ­ກັດ ສູນ​ການ​ຄ້າ​ເວີ​ເທດ​ເຊັນ​ເຕີ ບໍ­ລິ­ສັດ ເອັກ​ແຊັກ ຈຳ­ກັດ ບໍ­ລິ­ສັດ ວຽງ​ຈັນ​ບິ​ຟ ບໍ­ລິ­ສັດ ແມັກ​ມີ​ເດຍ ບໍ­ລິ­ສັດ ປີ​ໂຕ​ລ້ຽມ​ເທຣດ​ດິ້ງ ຈຳ­ກັດ ບໍ­ລິ­ສັດ ເອັສວີກ​ຣຸບ ຈຳ­ກັດ ອົງ­ການ SDC ສະ­ມາ­ຄົມ​ອັນ­ຍະ​ມະ­ນີ​ລາວ ບໍ­ລິ­ສັດ ນ້ຳ­ຫວານ​ລາວ ຈຳ­ກັດ ບໍ­ລິ­ສັດ ອາ​ຄີ​ເນຍ​ແອັສ​ໂຊ​ຊີ​ເອ​ສ ຈຳ­ກັດ ສະ­ໂມ­ສອນ​ມາ​ສ​ເຕີ​ເຊ​ເວັນ ບໍ­ລິ­ສັດ ເຈິ້ນ​ຫົງ​ກໍ່­ສ້າງ-ຂົວ​ທາງ ຈຳ­ກັດ ບໍ­ລິ­ສັດ ແມັກ​ຊິມ ຈຳ­ກັດ ແລະ ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ ຈຳ­ກັດ.

ຂ່າວທີ່ກ່ຽວຂ້ອງ