ມີແຜນສັກຢາກັນພະຍາດໝາກແດງທົ່ວປະເທດ ເກືອບ 2 ລ້ານຄົນ

257 18 ມ.ນ. 2019 ຂ່າວໜ້າ​ໜຶ່ງ
ມີແຜນສັກຢາກັນພະຍາດໝາກແດງທົ່ວປະເທດ ເກືອບ 2 ລ້ານຄົນ

    ກອງ​ປະ­ຊຸມ​ກະ­ກຽມ​ເປີດ​ບັ້ນ​ຂະ​ບວນ​ການ ວັນ​ສັກ​ຢາ​ກັນ​ພະ­ຍາດ​ແຫ່ງ​ຊາດ ເພື່ອ​ຕອບ​ໂຕ້​ການ­ລະ­ບາດ­ພະ­ຍາດ​ໝາກ​ແດງ ຈັດ​ຂຶ້ນ​ວັນ​ທີ 15 ມີ­ນາ 2019 ຢູ່​ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ​ນາງ ຄຳ​ຈັນ ພົມ​ແສງ​ສະ­ຫວັນ ຮອງ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ບັນ­ດາ​ຮອງ​ເຈົ້າ­ແຂວງ ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ຜູ້­ຕາງ­ໜ້າ​ຈາກ​ອົງ­ການ​ອະ­ນາ­ໄມ​ໂລກ ອົງ­ການ​ອຸຍ​ນີ​ເຊັບ ແລະ ຄູ່​ຮ່ວມ​ພັດ­ທະ­ນາ​ເຂົ້າ​ຮ່ວມ.

    ທ່ານ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ກ່າວ​ວ່າ: ກອງ​ປະ­ຊຸມ​ກະ­ກຽມ​ເປີດ​ບັ້ນ​ຂະ​ບວນ​ການ​ຄັ້ງ​ນີ້ ແນ­ໃສ່​ກະ­ກຽມ​ຄວາມ​ພ້ອມ​ໃນ​ການ­ຈັດ­ຕັ້ງ​ປະ­ຕິ­ບັດ ວັນ​ສັກ​ຢາ​ກັນ​ພະ­ຍາດ​ແຫ່ງ​ຊາດ ເພື່ອ​ກຳ­ຈັດ​ພະ­ຍາດ­ໝາກ­ແດງ ອັນ​ສຳ­ຄັນ​ເພື່ອ​ຄົ້ນ­ຄວ້າ​ສົນ­ທະ­ນາ ແລະ ແບ່ງ​ຄວາມ​ຮັບ­ຜິດ­ຊອບ ແລະ ໜ້າ­ທີ່​ໃຫ້​ແຕ່​ລະ​ພາກ­ສ່ວນ ເພື່ອ​ສ້າງ​ເງື່ອນ­ໄຂ​ເຮັດ​ໃຫ້​ວັນ​ສັກ​ຢາ​ກັນ​ພະ­ຍາດ​ແຫ່ງ​ຊາດ ທີ່​ຈະ​ປະ­ຕິ­ບັດ​ໃນ​ມໍ່ໆ​ນີ້ ໃຫ້​ບັນ­ລຸ 95% ຂຶ້ນ​ໄປ​ໃນ​ທຸກ​ເມືອງ ທຸກ​ບ້ານ ເພື່ອ​ປິດ​ຊ່ອງ​ວ່າງ​ດ້ານ​ພູມ​ຄຸ້ມ​ກັນ​ຕໍ່​ພະ­ຍາດ­ໝາກ­ແດງ ສິ່ງ​ຈຳ­ເປັນ​ອັນ​ຮີບ​ດ່ວນ​ທີ່​ສຸດ ແມ່ນ​ເພື່ອ​ສະ­ກັດ​ກັ້ນ​ການ­ລະ­ບາດ­ພະ­ຍາດ​ໝາກ​ແດງ​ໃຫຍ່ ທີ່​ກຳ­ລັງ​ເກີດ​ຂຶ້ນ​ໃນ​ບາງ​ເມືອງ​ໃນ​ເວ­ລາ​ນີ້ ໃຫ້​ຢຸດ­ຕິ​ໂດຍ​ໄວ​ເທົ່າ​ທີ່​ຈະ​ໄວ​ໄດ້ ຈຳ­ກັດ​ບໍ່​ໃຫ້​ມີ​ການ​ເຈັບ­ເປັນ ແລະ ສູນ​ເສຍ​ຕື່ມ​ອີກ.

    ລັດ­ຖະ­ບານ​ລາວ ຮ່ວມ​ກັບ​ບັນ­ດາ​ປະ­ເທດ​ສະ­ມາ­ຊິກ​ຂອງ​ອົງ­ການ​ອະ­ນາ­ໄມ​ໂລກ ພາກ​ພື້ນ​ປາ​ຊີ​ຟິກ​ຕາ­ເວັນ­ຕົກ ໄດ້​ໃຫ້​ຄຳ​ໝັ້ນ​ສັນ­ຍາ​ວ່າ ຈະ​ກຳ­ຈັດ​ພະ­ຍາດ­ໝາກ­ແດງ​ໃຫຍ່ ແລະ ໝາກ​ແດງ​ນ້ອຍ​ແຕ່​ປີ 2012 ເປັນ­ຕົ້ນ​ມາ ເພື່ອ​ຕອບ​ສະ­ໜອງ​ຕໍ່​ຖະ­ແຫຼງ­ການ​ຮ່ວມ ຂອງ​ຄະ­ນະ​ກຳ­ມະ­ການ​ອົງ­ການ​ອະ­ນາ­ໄມ​ໂລກ ປະ­ຈຳ​ພາກ​ພື້ນ ໃນ​ປີ 2005 ລາວ​ເຮົາ​ໄດ້​ສຸມ​ທຸກ​ກຳ­ລັງ ໃນ​ການ​ປັບ­ປຸງ​ວຽກ​ງານ​ສັກ​ຢາ​ກັນ​ພະ­ຍາດ ໂດຍ​ການ​ຊ່ວຍ­ເຫຼືອ​ດ້ານ​ວິ­ຊາ​ການ ແລະ ດ້ານ​ງົບ­ປະ­ມານ​ຈາກ​ບັນ­ດາ​ຄູ່​ຮ່ວມ​ພັດ­ທະ­ນາ ໃນ​ນັ້ນ ໄດ້​ຈັດ​ຕັ້ງ​ປະ­ຕິ­ບັດ​ຫຼາຍໆ​ກິດ­ຈະ­ກຳ ເພື່ອ​ບັນ­ລຸ​ການ​ກຳ­ຈັດ​ພະ­ຍາດ­ໝາກ­ແດງ​ຂຶ້ນ​ໃນ​ທົ່ວ​ປະ­ເທດ ອັດ­ຕາ​ປົກ​ຄຸມ​ສັກ​ຢາ​ກັນ​ພະ­ຍາດ­ໝາກ­ແດງ​ຮອບ​ປົກ­ກະ­ຕິ​ທົ່ວ​ປະ­ເທດ ໄດ້​ເພີ່ມ​ຂຶ້ນ​ຈາກ 40% ໃນ​ປີ 2007 ມາ​ເປັນ 80% ໃນ​ປີ 2018 ອັນ​ສຳ­ຄັນ​ໄດ້​ຈັດ​ວັນ​ສັກ​ຢາ​ກັນ​ພະ­ຍາດ­ໝາກ­ແດງ​ຂຶ້ນ 4 ຄັ້ງ​ທົ່ວ​ປະ­ເທດ ຄື: ປີ 2007 (ລຸ່ມ 15 ປີ) ບັນ­ລຸ 96% ປີ 2011 (ລຸ່ມ 19 ປີ) ບັນ­ລຸ 97% ປີ 2014 (ລຸ່ມ 1 ປີ) ບັນ­ລຸ 100% ແລະ ປີ 2017 (ລຸ່ມ 5 ປີ) ບັນ­ລຸ 99%.

    ເຖິງ​ວ່າ​ຈະ​ມີ​ການ​ເພີ່ມ​ຂຶ້ນ​ຂອງ​ອັດ­ຕາ​ປົກ​ຄຸມ​ສັກ​ຢາ​ກັນ​ພະ­ຍາດ​ໃນ​ລະ­ບົບ​ປົກ­ກະ­ຕິ​ທົ່ວ​ປະ­ເທດ ແລະ ໄດ້​ປະ­ຕິ­ບັດ​ກິດ­ຈະ­ກຳ ວສຊ ກັນ​ພະ­ຍາດ­ໝາກ­ແດງ​ປີ 2007 2011 2014 ແລະ 2017 ກໍ​ຕາມ ຍັງ​ມີ 11 ແຂວງ​ຈາກ​ທັງ​ໝົດ 18 ແຂວງ​ທົ່ວ​ປະ­ເທດ ທີ່​ລາຍ​ງານ​ອັດ­ຕາ​ປົກ​ຄຸມ​ສັກ​ຢາ​ກັນ​ພະ­ຍາດ­ໝາກ­ແດງ​ຫຼາຍ​ກວ່າ 80% ໃນ​ນັ້ນ ມີ 4 ແຂວງ​ຕ່ຳ​ກວ່າ 70% ດັ່ງ­ນັ້ນ ຈຶ່ງ​ເຮັດ​ໃຫ້​ຫຼາຍ​ທ້ອງ­ຖິ່ນ​ມີ​ພູມ​ຕ້ານ­ທານ​ຂອງ​ຊຸມ​ຊົນ​ຕ່ຳ ມີ​ຄວາມ​ສ່ຽງ​ສູງ​ຈະ​ເກີດ​ມີ​ການ​ລະ­ບາດ​ດັ່ງ​ທີ່​ປາ­ກົດ​ຂຶ້ນ​ໃນ​ເວ­ລາ​ນີ້ ໃນ​ຊຸມ​ປີ­ຜ່ານ­ມາ ປະ­ເທດ​ເຮົາ​ໄດ້​ມີ​ການ​ລະ­ບາດ​ເປັນ​ບາງ​ຄັ້ງ​ຄາວ​ໃນ​ບາງ​ຊຸມ​ຊົນ​ເຊັ່ນ: ປີ 2015 ເກີດ​ຂຶ້ນ​ທີ່​ແຂວງ​ຫຼວງ​ນ້ຳ​ທາ ແລະ ຫົວ­ພັນ ປັດ­ຈຸ­ບັນ​ນີ້ ກຳ­ລັງ​ເກີດ​ຂຶ້ນ​ທີ່​ນະ­ຄອນ­ຫຼວງ​ວຽງ​ຈັນ ແລະ ແຂວງ​ວຽງ​ຈັນ ພ້ອມ​ນັ້ນ ກໍ​ຍັງ​ມີ​ແນວ​ໂນ້ມ​ທີ່​ຈະ​ລະ­ບາດ​ກວ້າງ​ໄປ​ຍັງ​ແຂວງ​ອື່ນ ນີ້​ໄດ້​ສ່ອງ​ແສງ​ໃຫ້​ເຮົາ​ເຫັນ​ວ່າ ການ­ຈັດ­ຕັ້ງ​ປະ­ຕິ­ບັດ ວສຊ ໃນ​ໄລ­ຍະ​ຜ່ານ​ມາ ເຖິງ​ວ່າ​ຈະ​ບັນ­ລຸ​ອັດ­ຕາ​ປົກ​ຄຸມ​ສູງ ແຕ່​ຍັງ​ມີ​ກຸ່ມ​ເປົ້າ​ໝາຍ​ກຸ່ມ​ໃດ​ໜຶ່ງ ທີ່​ສືບ­ຕໍ່​ພາດ​ໂອ­ກາດ​ມາ​ຕະ­ຫຼອດ ຈຶ່ງ​ເຮັດ​ໃຫ້​ກຸ່ມ​ນັ້ນ​ກາຍ­ເປັນ​ເປົ້າ​ຈູ່​ໂຈມ​ຂອງ​ພະ­ຍາດ­ໝາກ­ແດງ​ໃຫຍ່ ຍ້ອນ​ເຂົາ­ເຈົ້າ​ບໍ່​ເຄີຍ​ໄດ້​ຮັບ​ວັກ​ຊີນ​ກັນ​ພະ­ຍາດ­ໝາກ­ແດງ​ແມ່ນ​ແຕ່ 1 ເຂັມ.

    ເພື່ອ​ໂຕ້​ຕອບ​ຕໍ່​ສະ­ພາບ​ການ­ລະ­ບາດ­ພະ­ຍາດ​ໝາກ​ແດງ​ທີ່​ກຳ­ລັງ​ເກີດ​ຂຶ້ນ​ໃນ​ເວ­ລາ​ນີ້ ແລະ ເພື່ອ​ສ້າງ​ຖານ​ພູມ​ຄຸ້ມ​ກັນ​ຕໍ່​ພະ­ຍາດ­ໝາກ­ແດງ​ໃຫຍ່​ໃນ​ທົ່ວ​ປະ­ເທດ ໃຫ້​ເຂັ້ມ­ແຂງ​ໝັ້ນ­ຄົງ ບໍ່​ມີ​ຄວາມ​ສ່ຽງ​ທີ່​ຈະ​ລະ­ບາດ​ຄືນ­ໃໝ່​ອີກ ກະ­ຊວງ​ສາ­ທາ­ລະ­ນະ​ສຸກ ກໍ​ຄື ລັດ­ຖະ­ບານ​ລາວ ພ້ອມ​ດ້ວຍ​ຄູ່​ຮ່ວມ​ພັດ­ທະ­ນາ​ໄດ້​ຕັດ­ສິນ​ໃຈ​ຈັດ​ຕັ້ງ​ປະ­ຕິ­ບັດ​ວັນ ວສຊ ກັນ​ພະ­ຍາດ­ໝາກ­ແດງ​ຂຶ້ນ​ໃນ​ເດືອນ​ມີ­ນາ ແລະ ເມ­ສາ 2019 ໃນ​ຂອບ​ເຂດ​ທົ່ວ​ປະ­ເທດ ແນ­ໃສ່​ເປົ້າ​ໝາຍ​ເດັກ​ອາ­ຍຸ​ລະ­ຫວ່າງ 6 ເດືອນ​ຫາ​ລຸ່ມ 10 ປີ ຢູ່ 14 ແຂວງ ຄື: ຜົ້ງ​ສາ­ລີ ຫຼວງ​ນ້ຳ​ທາ ອຸ­ດົມ​ໄຊ ບໍ່​ແກ້ວ ຫຼວງ​ພະ​ບາງ ຫົວ­ພັນ ໄຊ​ຍະ​ບູ​ລີ ຊຽງ​ຂວາງ ຄຳ​ມ່ວນ ສະ­ຫວັນ​ນະ​ເຂດ ສາ­ລະ​ວັນ ເຊ​ກອງ ຈຳ­ປາ​ສັກ ແລະ ອັດ​ຕະ​ປື ແລະ ລະ­ຫວ່າງ 6 ເດືອນ​ຫາ​ລຸ່ມ 20 ປີ ໃນ 4 ແຂວງ ຄື: ນະ­ຄອນ­ຫຼວງ​ວຽງ​ຈັນ ບໍ​ລິ​ຄຳ​ໄຊ ແຂວງ​ວຽງ​ຈັນ ແລະ ໄຊ​ສົມ­ບູນ ທັງ​ນີ້ ເພື່ອ​ຕັດ​ຕ່ອງ​ໂສ້​ການ​ຕິດ­ຕໍ່​ຂອງ​ພະ­ຍາດ­ໝາກ­ແດງ​ໃຫຍ່ ໝາກ​ແດງ​ນ້ອຍ ແລະ ທັງ​ເປັນ​ການ​ຍົກ​ອັດ­ຕາ​ການ​ສັກ​ຢາ​ກັນ​ພະ­ຍາດ​ປົກ­ກະ­ຕິ​ໃຫ້​ເດັກ­ນ້ອຍ​ລຸ່ມ 1 ປີ ໄດ້ 90% ຂຶ້ນ​ໄປ​ໃນ​ທຸກ​ບ້ານ ທຸກ​ເມືອງ​ໃນ​ຂອບ​ເຂດ​ທົ່ວ​ປະ­ເທດ ສຳ­ລັບ​ການ​ເປີດ​ບັ້ນ​ວັນ​ສັກ​ຢາ​ກັນ​ພະ­ຍາດ​ຄັ້ງ​ນີ້ ພວກ​ເຮົາ​ມີ​ເປົ້າ​ໝາຍ​ທັງ​ໝົດ 1.869.856 ຄົນ​ໃນ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ