ໄຟຟ້າລາວ ຍ້ອງຍໍກົມກອງ ແລະ ບຸກຄົນທີ່ມີຜົນງານດີເດັ່ນ

242 18 ມ.ນ. 2019 ຂ່າວໜ້າ​ໜຶ່ງ
ໄຟຟ້າລາວ ຍ້ອງຍໍກົມກອງ ແລະ ບຸກຄົນທີ່ມີຜົນງານດີເດັ່ນ

    ກອງ​ປະ­ຊຸມ​ສະ­ຫຼຸບ​ຜົນ­ງານ​ດຳ­ເນີນ​ທຸ­ລະ​ກິດ​ຂອງ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ປະ­ຈຳ​ປີ 2018 ແລະ ແຜນ ການ​ສູ້​ຊົນ​ປີ 2019 ແລະ ຍ້ອງ­ຍໍ​ຜົນ­ງານ​ດີ­ເດັ່ນ​ບຸກ­ຄົນ ແລະ ກົມ​ກອງ ໄດ້​ຈັດ​ຂຶ້ນ​ວັນ​ທີ 13 ມີ­ນາ 2019 ທີ່​ສຳ­ນັກ­ງານ​ໃຫຍ່​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ບັນ­ດາ​ຫົວ­ໜ້າ​ກົມ ຮອງ​ກົມ ຄະ­ນະ​ອຳ­ນວຍ​ການ​ບໍ­ລິ­ສັດ​ຕ່າງໆ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກົມ​ກອງ​ອ້ອມ​ຂ້າງ​ກະ­ຊວງ ແລະ ພະ­ນັກ­ງານ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ​ເຂົ້າ​ຮ່ວມ.

    ທ່ານ ບຸນ​ອູ້ມ ສີ​ວັນ­ເພັງ ຜູ້­ອຳ­ນວຍ­ການ​ໃຫຍ່​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ກ່າວ​ວ່າ: ໄລ­ຍະ​ປີ­ຜ່ານ­ມາ ໄຟ­ຟ້າ​ລາວ ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ຕາມ​ທິດ​ທາງ​ແຜນ​ນະ­ໂຍ­ບາຍ​ຂອງ​ພັກ ອີງ­ໃສ່​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລັດ­ຖະ­ບານ ກໍ​ຄື ການ​ຊີ້​ນຳ​ຂອງ​ກະ­ຊວງ​ພະ­ລັງ­ງານ ແລະ ບໍ່​ແຮ່ ເຊິ່ງ​ສາ­ມາດ​ຍາດ​ໄດ້­ຜົນ​ງານ​ຫຼາຍ​ດ້ານ ເປັນ­ຕົ້ນ ການ​ຄຸ້ມ​ຄອງ​ບໍ­ລິ­ຫານ ແລະ ຈັດ​ຕັ້ງ​ປະ­ຕິ­ບັດ​ໂຄງ­ການ​ທີ່​ເປັນ​ບຸ­ລິ­ມະ­ສິດ ເຊິ່ງ​ຖືກ​ຮັບ­ຮອງ ແລະ ອະ­ນຸ­ມັດ​ຈາກ​ລັດ­ຖະ­ບານ​ແລ້ວ​ນັ້ນ ເຊັ່ນ: ການ​ກໍ່­ສ້າງ​ແຫຼ່ງ​ຜະ­ລິດ​ສາຍ​ສົ່ງ-ສະ­ຖາ­ນີ​ໄຟ­ຟ້າ ຕະ­ຫຼາດ ທັງ​ການ​ຂະ­ຫຍາຍ​ຕາ​ຂ່າຍ​ໄຟ­ຟ້າ​ອອກ​ສູ່​ຊົນ­ນະ­ບົດ​ຫ່າງ​ໄກ​ສອກ­ຫຼີກ ປັດ­ຈຸ­ບັນ​ທົ່ວ​ປະ­ເທດ​ມີ​ແຫຼ່ງ​ຜະ­ລິດ​ໄຟ­ຟ້າ​ທັງ​ໝົດ 69 ແຫ່ງ ລວມ​ທັງ IPP SPP ເຊິ່ງ​ມີ​ກຳ­ລັງ​ຕິດ​ຕັ້ງ​ທັງ​ໝົດ 7.000,14 MW ໃນ​ນັ້ນ ປະ­ກອບ​ມີ 22 ເຂື່ອນ ເປັນ IPP ມີ​ກຳ­ລັງ​ຕິດ​ຕັ້ງ​ທັງ​ໝົດ 6.018 MW ໃນ​ນີ້ ສະ­ໜອງ​ໃຫ້​ໄຟ­ຟ້າ​ລາວ 1.552 MW ສ່ວນ​ທີ່​ເຫຼືອ 4.466 MW ສົ່ງ​ອອກ​ຕ່າງ­ປະ­ເທດ​ໂດຍ​ກົງ.

    ໃນ​ປີ 2018 ສາ­ມາດ​ຈຳ­ໜ່າຍ​ພະ­ລັງ­ງານ​ທັງ​ໝົດ 8.507,57 ລ້ານ​ກິ​ໂລ​ວັດ​ໂມງ ເປັນ​ເງິນ 5 ພັນ​ກວ່າ​ຕື້​ກີບ ທຽບ­ໃສ່​ແຜນ​ປີ​ເທົ່າ​ກັບ 97,29% ເປັນ​ເງິນ​ເທົ່າ​ກັບ 91,36% ຄ່າ​ສະ­ເລ່ຍ​ເທົ່າ​ກັບ 603,37 ກິ​ໂລ​ວັດ​ໂມງ ທົ່ວ​ປະ­ເທດ​ມີ​ທັງ​ໝົດ 148 ເມືອງ ມີ​ໄຟ­ຟ້າ​ໃຊ້​ຖາ­ວອນ ເທົ່າ​ກັບ 100% ຂອງ​ຈຳ­ນວນ​ເມືອງ​ທົ່ວ​ປະ­ເທດ ມີ 8.480 ບ້ານ ມີ​ໄຟ­ຟ້າ​ໃຊ້​ແລ້ວ 90,58% ຈຳ­ນວນ​ຄອບ­ຄົວ 1.206.926 ຄອບ­ຄົວ ມີ​ໄຟ­ຟ້າ​ໃຊ້​ແລ້ວ 1.132.019 ຄອບ­ຄົວ ເທົ່າ​ກັບ 93,79% ຂອງ​ຈຳ­ນວນ​ຄອບ­ຄົວ​ທັງ​ໝົດ​ທົ່ວ​ປະ­ເທດ ນອກ­ຈາກ​ນີ້ ກໍ​ຍັງ​ໄດ້​ມີ​ການ​ພັດ­ທະ­ນາ​ໂຄງ­ການ​ເຂື່ອນ​ໄຟ­ຟ້າ ສາຍ​ສົ່ງ-ສະ­ຖາ­ນີ​ໄຟ­ຟ້າ ປັບ­ປຸງ​ລະ­ບົບ​ສາຍ​ສົ່ງ-ສະ­ຖາ­ນີ​ໄຟ­ຟ້າ ສຳ­ເລັດ​ການ​ກໍ່­ສ້າງ ແລະ ເປີດ​ນຳ​ໃຊ້​ແລ້ວ 5 ໂຄງ­ການ ໄປ​ພ້ອມ​ກັບ​ການ​ເອົາ­ໃຈ­ໃສ່​ວຽກ​ງານ​ສິ່ງ­ແວ­ດລ້ອມ ວຽກ​ງານ​ການ​ຕະ­ຫຼາດ ແລະ ຂາຍ​ໄຟ ລວມ​ທັງ​ການ​ຄຸ້ມ​ຄອງ​ບໍ­ລິ­ຫານ ບຸ​ຄະ­ລາ​ກອນ ຍົກ​ສູງ​ວຽກ​ງານ​ແນວ​ຄິດ ການ­ເມືອງ ແລະ ພັດ­ທະ­ນາ​ບຸ​ຄະ­ລາ​ກອນ​ຢ່າງ​ບໍ່​ຢຸດ​ຢັ້ງ.

    ຈາກ​ຜົນ­ງານ​ດັ່ງ­ກ່າວ ຈຶ່ງ​ເຮັດ​ໃຫ້​ບຸກ­ຄົນ ແລະ ກົມ​ກອງ​ດີ­ເດັ່ນ​ໄດ້​ຮັບ​ຫຼຽນ​ໄຊ​ແຮງ​ງານ ຊັ້ນ II ຈຳ­ນວນ 56 ຄົນ ແລະ 4 ກົມ​ກອງ​ລວມ​ໝູ່ ໄດ້​ຮັບ​ຫຼຽນ​ໄຊ​ແຮງ​ງານ​ຊັ້ນ III ຈຳ­ນວນ 52 ຄົນ ໄດ້​ຮັບ​ຫຼຽນ​ກາ​ແຮງ​ງານ ຈຳ­ນວນ 46 ຄົນ ແລະ ຮັບ​ໃບ​ຍ້ອງ­ຍໍ​ຈາກ​ລັດ­ຖະ­ບານ 56 ຄົນ

    ສະ­ເພາະ​ວຽກ​ງານ​ຈຸດ​ສຸມ​ປີ 2019 ໄດ້​ອີງ­ໃສ່​ຄຳ​ຂວັນ​ທີ່​ວ່າ: ເພີ່ມ​ລາຍ​ຮັບ ຫຼຸດ​ລາຍ​ຈ່າຍ ຈຳ­ໜ່າຍ​ໄຟ​ໃຫ້​ພຽງ­ພໍ ບໍ­ລິ­ການ​ໄວ ດ້ວຍ​ຄວາມ​ປອດ​ໄພ ຊົມ­ໃຊ້​ໃຫ້​ເກີດ​ຜົນ ສູ້​ຊົນ​ປະ­ຕິ­ບັດ​ຄຳ​ສັ່ງ 02/ນຍ ກໍ່­ສ້າງ​ພະ­ນັກ­ງານ​ໃຫ້​ມີ 3 ຕ້ອງ ແລະ ເນັ້ນ​ໜັກ​ໃສ່​ວຽກ​ງານ​ແກ້​ໄຂ​ຖາ­ນະ​ການ​ເງິນ​ຂອງ​ໄຟ­ຟ້າ​ລາວ​ໃຫ້​ຄ່ອງ​ຕົວ​ກວ່າ​ເກົ່າ ເນັ້ນ​ໃສ່​ການ​ບໍ­ລິ­ການ​ລູກ​ຄ້າ​ໃຫ້​ມີ​ຄວາມ​ເພິ່ງ​ພໍ­ໃຈ ສູ້​ຊົນ​ຫຼຸດ­ຜ່ອນ​ຂັ້ນ​ຕອນ ແລະ ໄລ­ຍະ​ເວ­ລາ​ການ​ບໍ­ລິ­ການ​ຕິດ​ຕັ້ງ​ໄຟ­ຟ້າ ຕາມ​ຄຳ​ສັ່ງ​ນາ­ຍົກ­ລັດ­ຖະ­ມົນ­ຕີ ເອົາ­ໃຈ­ໃສ່​ສ້າງ​ພະ­ນັກ­ງານ​ສືບ​ທອດ ແລະ ພະ­ນັກ­ງານ​ວິ­ຊາ​ການ​ໃຫ້​ມີ​ຄຸນ​ນະ​ພາບ​ດີ​ຂຶ້ນ​ກວ່າ​ເກົ່າ ສູ້​ຊົນ​ປັບ­ປຸງ​ສັນ­ຍາ​ຊື້-ຂາຍ​ໄຟ​ຈາກ​ຜູ້​ຜະ­ລິດ ຜັນ​ຂະ­ຫຍາຍ​ມະ­ຕິ​ສະ­ພາ​ແຫ່ງ​ຊາດ​ທີ່​ຮັບ­ຮອງ​ເອົາ ການ​ພັດ­ທະ­ນາ​ໂຄງ­ການ​ສາຍ​ສົ່ງ​ໄຟ­ຟ້າ​ຂອງ​ໄຟ­ຟ້າ​ລາວ 7 ໂຄງ­ການ​ທີ່​ຍັງ​ເຫຼືອ 3 ໂຄງ­ການ​ບໍ່​ທັນ​ໄດ້​ແຫຼ່ງ​ເງິນ​ກູ້ ແລະ ສືບ­ຕໍ່​ຄົ້ນ­ຄວ້າ​ປັບ­ປຸງ​ໂຄງ­ການ​ສ້າງ​ລາ­ຄາ​ໄຟ­ຟ້າ​ຄືນ­ໃໝ່ ຮ່ວມ​ກັບ​ກະ­ຊວງ​ພະ­ລັງ­ງານ ແລະ ບໍ່​ແຮ່ ແລະ ນຳ​ສະ­ເໜີ​ຕໍ່​ຂັ້ນ​ເທິງ ເພື່ອ​ໃຫ້​ໄດ້​ຮັບ​ອະ­ນຸ­ມັດ ແລະ ແຈ້ງ​ການ​ອອກ​ນຳ​ໃຊ້​ໃນ​ໄລ­ຍະ​ປີ 2019-2023.

ຂ່າວທີ່ກ່ຽວຂ້ອງ