ຂ່າວຫຼ້າສຸດ

ທພລ ຮ່ວມມືກັບຄູ່ຮ່ວມທຸລະກິດ ເພື່ອຊຳລະສະສາງສິນເຊື່ອລູກຄ້າ

364 18 ມ.ນ. 2019 ຂ່າວໜ້າ​ໜຶ່ງ
ທພລ ຮ່ວມມືກັບຄູ່ຮ່ວມທຸລະກິດ ເພື່ອຊຳລະສະສາງສິນເຊື່ອລູກຄ້າ

    ທະ­ນາ­ຄານ​ພັດ­ທະ­ນາ​ລາວ (ທພລ) ຮ່ວມ​ກັບ​ຄູ່​ຮ່ວມ​ທຸ­ລະ​ກິດ ປະ­ກອບ​ມີ​ສະ​ຖາ​ບັນ​ການ​ເງິນ​ປະ­ຕູ​ຄຳ ສະ​ຖາ​ບັນ​ການ​ເງິນ​ເນັກ ສະ​ຖາ​ບັນ​ການ​ເງິນ​ຊັບ​ທະ­ວີ ສະ​ຖາ​ບັນ​ການ​ເງິນ​ເພັດ​ອຸ­ໄລ ແລະ ບໍ­ລິ­ສັດ ກຸງ​ສີ​ເຊົ່າ​ສິນ​ເຊື່ອ ໄດ້​ມີ​ພິ­ທີ​ເຊັນ​ສັນ­ຍາ ວ່າ​ດ້ວຍ​ການ​ຮ່ວມ​ມື​ໃນ​ການ​ຮັບ​ຊຳ­ລະ​ສະ​ສາງ​ສິນ​ເຊື່ອ​ຂອງ​ລູກ​ຄ້າ​ແຕ່​ລະ​ບໍ­ລິ­ສັດ ແຕ່​ລະ­ສະ​ຖາ​ບັນ ຜ່ານ ທພລ ຫຼາກ​ຫຼາຍ​ຊ່ອງ​ທາງ ຊຶ່ງ​ໄດ້​ຈັດ​ຂຶ້ນ​ວັນ​ທີ 14 ມີ­ນາ 2019 ທີ່ ທພລ ໂດຍ​ການ​ເຂົ້າ​ຮ່ວມ​ຂອງ​ຜູ້­ຕາງ­ໜ້າ​ຈາກ​ທະ­ນາ­ຄານ ແຫ່ງ ສປປ ລາວ ບັນ­ດາ​ຄະ­ນະ​ອຳ­ນວຍ​ການ​ຈາກ​ບັນ­ດາ​ບໍ­ລິ­ສັດ​ເຊົ່າ​ສິນ​ເຊື່ອ ແລະ ສະ​ຖາ​ບັນ​ການ​ເງິນ​ຈຸ​ລະ​ພາກ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ອາ­ຄົມ ປຣະ​ເສີດ ຜູ້­ອຳ­ນວຍ­ການ ທພລ ໄດ້​ແຈ້ງ​ຄວາມ​ເປັນ​ມາ​ຂອງ​ການ​ຫັນ​ໄປ​ສູ່​ຄວາມ​ທັນ​ສະ­ໄໝ ພ້ອມ​ກັບ​ຄວາມ​ພ້ອມ​ໃນ​ການ​ພັດ­ທະ­ນາ​ລະ­ບົບ​ຮັບ​ຊຳ­ລະ​ສະ​ສາງ​ຜ່ານ​ຊ່ອງ​ທາງ​ຕ່າງໆ​ຂອງ ທພລ ຊຶ່ງ ທພລ ເປັນ​ທະ­ນາ­ຄານ​ທຸ­ລະ​ກິດ​ລັດ ແລະ ມີ 18 ສາ­ຂາ 78 ໜ່ວຍ​ບໍ­ລິ­ການ 18 ໜ່ວຍ​ແລກ­ປ່ຽນ​ຢູ່​ແຕ່​ລະ​ແຂວງ ບັນ­ດາ​ເມືອງ ແລະ ບ່ອນ​ຊຸມ​ຊົນ​ໜາ​ແໜ້ນ ທີ່​ພ້ອມ​ໃຫ້​ບໍ­ລິ­ການ​ແກ່​ສັງ­ຄົມ​ໃນ​ຂອບ​ເຂດ​ທົ່ວ​ປະ­ເທດ ຊຶ່ງ​ນັບ​ແຕ່​ມື້​ສ້າງ­ຕັ້ງ​ມາ​ເຖິງ​ປັດ­ຈຸ­ບັນ ໄດ້​ມີ​ການ​ສ້າງ​ຄວາມ​ໝັ້ນ­ຄົງ​ໃຫ້​ກັບ​ທະ­ນາ­ຄານ ກໍ​ຄື ການ​ພັດ­ທະ­ນາ​ຫັນ​ເອົາ​ການ​ບໍ­ລິ­ການ​ຂອງ​ທະ­ນາ­ຄານ​ໄປ​ສູ່​ຄວາມ​ທັນ​ສະ­ໄໝ ເພື່ອ​ຮອງ​ຮັບ​ກັບ​ການ​ບໍ­ລິ­ການ​ຮັບ​ໃຊ້​ສັງ­ຄົມ ສ້າງ​ຄວາມ​ສະ­ດວກ ວ່ອງ­ໄວ ທັງ​ຮັບ­ປະ­ກັນ​ເພື່ອ​ສາ­ມາດ​ແຂ່ງ­ຂັນ​ໃນ​ດ້ານ​ການ​ບໍ­ລິ­ການ​ໃນ​ຍຸກ​ປັດ­ຈຸ­ບັນ ແລະ ອະ­ນາ­ຄົດ.

    ທພລ ຈຶ່ງ​ໄດ້​ຕັດ­ສິນ​ໃຈ​ລົງ­ທຶນ ນຳ​ເອົາ​ເຕັກ​ໂນ​ໂລ​ຊີ​ເຂົ້າ​ມາ​ຮັບ​ໃຊ້​ໃນ​ການ​ບໍ­ລິ­ການ​ຈາກ Bank 2000 ມາ​ເປັນ Core Banking [T24] ທີ່​ເປັນ​ມາດ­ຖານ​ສາ­ກົນ ຊຶ່ງ​ສາ­ມາດ​ພັດ­ທະ­ນາ​ຮູບ​ແບບ​ການ​ບໍ­ລິ­ການ​ທີ່​ຫຼາກ​ຫຼາຍ ພ້ອມ​ດຽວ​ກັນ​ນີ້ ທພລ ກຳ­ລັງ​ກຽມ​ທີ່​ຈະ​ເປີດ​ໂຕ​ຢ່າງ​ເປັນ​ທາງ​ການ​ໃນ​ໄວໆ​ນີ້ ກໍ​ຄື LDB On Bank ເປັນ​ການ​ໃຫ້​ບໍ­ລິ­ການ​ດຳ­ເນີນ​ທຸ­ລະ​ກຳ​ທາງ​ການ​ເງິນ​ສຳ­ລັບ​ນິ­ຕິ­ບຸກ­ຄົນ​ທີ່​ສະ­ດວກ​ສະ­ບາຍ ແລະ ຮັບ­ປະ­ກັນ​ຄວາມ​ປອດ​ໄພ ເປັນ​ການ​ປະ­ກອບ­ສ່ວນ​ອັນ​ສຳ­ຄັນ ເຂົ້າ​ໃນ​ການ​ພັດ­ທະ­ນາ​ຍົກ​ລະ­ດັບ​ລະ­ບົບ​ການ​ບໍ­ລິ­ການ​ຊຳ­ລະ​ສະ​ສາງ​ພາຍ​ໃນ ແລະ ຕ່າງ­ປະ­ເທດ ໃຫ້​ຫັນ​ເຂົ້າ​ສູ່​ລະ­ບົບ​ການ​ຊຳ­ລະ​ຜ່ານ​ທະ­ນາ­ຄານ​ໃຫ້​ຫຼາຍ​ຂຶ້ນ ເພື່ອ​ຫຼຸດ­ຜ່ອນ​ການ​ຊຳ­ລະ​ສະ​ສາງ​ດ້ວຍ​ການ​ນຳ​ໃຊ້​ເງິນ­ສົດ ປະ­ຢັດ​ເວ­ລາ ທັງ​ຮັບ­ປະ­ກັນ​ບໍ່​ຕົກ­ເຮ່ຍ​ເສຍ​ຫາຍ ແລະ ສາ­ມາດ​ນຳ​ລາຍ​ຮັບ​ດັ່ງ­ກ່າວ ມາ​ເປັນ​ທຶນ​ໃນ​ການ​ພັດ­ທະ­ນາ​ຄອບ­ຄົວ ແລະ ສ້າງ­ສາ​ປະ­ເທດ​ຊາດ.

    ທັງ​ນີ້ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ບັນ­ດາ​ລູກ​ຄ້າ​ຂອງ​ບໍ­ລິ­ສັດ ໃຫ້​ສາ­ມາດ​ຊຳ­ລະ​ສິນ​ເຊື່ອ​ໄດ້​ຫຼາຍ​ຊ່ອງ​ທາງ ສະ­ດວກ​ສະ­ບາຍ ແລະ ວ່ອງ­ໄວ​ຍິ່ງ​ຂຶ້ນ ນອກ­ຈາກ​ຈະ​ສາ­ມາດ​ຊຳ­ລະ​ຜ່ານ​ຫ້ອງ­ການ​ຂອງ​ແຕ່​ລະ​ບໍ­ລິ­ສັດ ແລະ ແຕ່​ລະ­ສະ​ຖາ​ບັນ​ການ​ເງິນ​ຈຸ​ລະ​ພາກ​ແລ້ວ ຍັງ​ສາ­ມາດ​ຊຳ­ລະ​ຜ່ານ​ປ່ອງ​ບໍ­ລິ­ການ​ຂອງ ທພລ ທົ່ວ​ປະ­ເທດ.

ຂ່າວທີ່ກ່ຽວຂ້ອງ