ຂ່າວຫຼ້າສຸດ

​ສປຊ ຮຽກຮ້ອງ​ເງິນ​ຊ່ວຍເຫຼືອ 8,8 ຕື້​ໂດ​ລາ ໃຫ້​ແກ່​ຊີ​ຣີ

164 15 ມ.ນ. 2019 ຂ່າວຕ່າງປະເທດ
​ສປຊ ຮຽກຮ້ອງ​ເງິນ​ຊ່ວຍເຫຼືອ 8,8 ຕື້​ໂດ​ລາ ໃຫ້​ແກ່​ຊີ​ຣີ

    ໃນ​ຄຳ​ຮຽກຮ້ອງ​ເງິນ​ຊ່ວຍເຫຼືອ 8,8 ຕື້​ໂດ​ລາ​ສະຫະລັດ ໃຫ້​ແກ່​ຊີ​ຣີ​ນັ້ນ ສະຫະ​ປະຊາ​ຊາດ (​ສປຊ) ໃຫ້​ຮູ້​ວ່າ ມີ​ຄວາມ​ຕ້ອງການ​ເງິນ 3,3 ຕື້​ໂດ​ລາ​ສະຫະລັດ ເພື່ອ​ນຳໄປ​ຊ່ວຍເຫຼືອ​ຊາວ​ຊີ​ຣີ ທີ່​ພວມ​ດຳລົງ​ຊີວິດ​ຢູ່​ພາຍ​ໃນ​ປະເທດ ພ້ອມ​ກັບ 5,5 ຕື້​ໂດ​ລາ​ສະຫະລັດ ເພື່ອ​ນຳໄປ​ຊ່ວຍເຫຼືອ​ຜູ້​ລີ້​ໄພ ແລະ ​ບັນດາ​ປະເທດ​ໃກ້​ຄຽງ​ທີ່​ຮັບ​ເອົາ​ຜູ້​ລີ້​ໄພ​ຈາກ​ຊີ​ຣີ.

    ທ່ານ ຟີ​ລິບ​ໂປ ກຣັນ​ດີ ຂ້າ​ຫຼວງ​ໃຫຍ່ ຂອງ​ອົງການ​ຂ້າ​ຫຼວງ​ໃຫຍ່ ​ສປຊ ກ່ຽວ​ກັບ​ຜູ້​ລີ້​ໄພ (UNHCR) ເວົ້າ​ວ່າ ມີ​ຊາວ​ຊີ​ຣີ 12 ລ້ານ​ຄົນ ພວມ​ດຳລົງ​ຊີ​ວິດ​​ລີ້​ໄພ ຫຼື​ພັດ​ພາກ​ຈາກ​ບ້ານ​ເກີດ ເມືອງ​ນອນ ໂດຍ​ກວມ​ເອົາ 1/2 ຂອງ​ຈຳນວນ​ປະຊາກອນ​ຊີ​ຣີ ໃນ​ຈຸດ​ເວລາ​ກ່ອນ​ເກີດ​ສົງຄາມ ພາຍ​ໃນ​ປະເທດ.

    ຄຳ​ຮຽກຮ້ອງ​ດັ່ງກ່າວ ມີ​ອອກ​ມາ​ຈາກ​ກອງ​ປະຊຸມ ທີ່​ມີ​ສະຫະພາບ​ເອີ​ຣົບ (EU) ແລະ ​ສປຊ ເປັນ​ປະທານ​ຮ່ວມ​ກອງ​ປະຊຸມ​ຄັ້ງ​ທີ 3 ກ່ຽວ​ກັບ​ການ​ຊ່ວຍເຫຼືອ​ໃຫ້​ແກ່​ຊີ​ຣີ ແລະ​ບັນດາ​ປະເທດ​ໃນ ພາກ​ພື້ນ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ ບຣຸກ​ແຊນ (ປະເທດ​ແບນ​ຊິກ) ແຕ່​ວັນ​ທີ 12-14 ມີນາ​ນີ້.  ຫົວຂໍ້​ຂອງ​ກອງ​ປະຊຸມ​ເທື່ອ​ນີ້​ກໍ​ແມ່ນ “ຊ່ວຍເຫຼືອ​ໃຫ້​ແກ່​ອະນາຄົດ​ຂອງ​ຊີ​ຣີ ແລະ ​ພາກ​ພື້ນ” ທັງ​ນີ້​ກໍ​ເພື່ອ​ລະດົມ​ຄວາມ​ຊ່ວຍເຫຼືອ ຂອງ​ປະຊາ​ຄົມ​ສາກົນ​ຫຼາຍ​ຂຶ້ນ ເພື່ອ​ສະໜັບສະໜູນ​ປະຊາຊົນ​ຊີ​ຣີ ແລະ ​ເພື່ອ​ຊອກ​ຫາ​ວິທີ​ການ​ແກ້​ໄຂ ທາງ​ການເມືອງ​ທີ່​ຍາວ​ນານ ໃຫ້​ແກ່​ວິ​ກິດ​ການ ຊຶ່ງ​ຊີ​ຣີ​ພວມ​ປະ​ເຊີນ​ຢູ່ ໂດຍ​ເປັນ​ການ​ແທດເໝາະ ກັບ​ມະຕິ 2254 ຂອງ​ສະພາ​ຄວາມ​ໝັ້ນຄົງ ​ສປຊ.

    ການ​ພິພາດ​ຢູ່​ໃນ​ຊີ​ຣີ ໄດ້ແກ່​ຍາວ​ເຂົ້າ​ສູ່​ປີ​ທີ 9 ໃນ​ຂະນະ​ທີ່​ບັນຫາ​ມະນຸດສະທຳ ພວມ​ນັບ​ມື້​ນັບ​ຮ້າຍ​ແຮງ​ຂຶ້ນ. ມີ​ປະຊາຊົນ​ຢູ່​ໃນ​ຊີ​ຣີ 11 ລ້ານ​ກວ່າ​ຄົນ ຍັງ​ຕ້ອງການ​ຄວາມ​ຊ່ວຍເຫຼືອ ສຸກ​ເສີນ ແລະ ​ອີກ 5 ລ້ານ​ກວ່າ​ຄົນ ຕ້ອງ​ໄດ້​ອອກ​ໄປ​ຍັງ​ຕ່າງປະເທດ​ເພື່ອ​ລີ້​ໄພ.

ຂ່າວທີ່ກ່ຽວຂ້ອງ