ຣັດ​ເຊຍ ຈະ​ງົດ​ການ​ສົ່ງ​ແກ​​ັສ​ຜ່ານ​ອູ​ແກຣນ ໄປ​ຍັງ​ຕວກ​ກີ

221 15 ມ.ນ. 2019 ຂ່າວຕ່າງປະເທດ
ຣັດ​ເຊຍ ຈະ​ງົດ​ການ​ສົ່ງ​ແກ​​ັສ​ຜ່ານ​ອູ​ແກຣນ ໄປ​ຍັງ​ຕວກ​ກີ

    ແຫຼ່ງ​ຂ່າວ Sputniknews ລາຍ​ງານ​ອ້າງ​ຕາມ​ຂໍ້​ມູນ​ຈາກ​ບໍລິສັດ​ຂ່າວສານ Bloomberg ທີ່​ຄັດ​ສະເໜີ​ຄຳ​ເວົ້າ​ຂອງ​ນາງ ເຕ​ໂມ​ທີ​​ສ​ກາ ເປດ​ໂກ​ວາ ລັດຖະມົນຕີ​ພະລັງງານ​ຂອງ​ບູນ​ກາ​ຣີ ໃຫ້​ຮູ້ເມື່ອ​ວັນ​ທີ 12 ມີນາ​ນີ້​ວ່າ ບູນ​ກາ​ຣີ ໄດ້​ຮັບ​ຈົດໝາຍ​ຢ່າງ​ເປັນ​ທາງ​ການ​ຈາກ​ບໍລິສັດ Gazprom Export ຂອງ​ຣັດ​ເຊຍ​ທີ່​ເປັນ​ການ​ແຈ້ງ​ໃຫ້​ຮູ້​ເຖິງ​ແຜນການ​ງົດ​ການ​ສົ່ງ​ແກ​​ັສ ລຽບ​ຕາມ​ລະບຽງ ຜ່ານ​ບານ​ກັງ ນັບ​ແຕ່​ເດືອນ​ມັງກອນ ປີ 2020 ເປັນຕົ້ນ​ໄປ.

    ນາງ ເຕ​ໂມ​ທີ​​ສ​ກາ ເປດ​ໂກ​ວາ ໃຫ້​ສຳພາດ​ຂ່າວ​ຜ່ານ​ໂທລະພາບ​ເອກະ​ຊົນ​ຊ່ອງ Bulgaria bTV ໂດຍ​ໄດ້​ຢືນຢັນ​ວ່າ ບູນ​ກາ​ຣີ ມີ​ສິດ​ຍື່ນ​ຟ້ອງ​ຂຶ້ນ​ໄປ​ຍັງ​ສານ​ກຳມະການ ເພື່ອ​ທວງ​ໃຫ້ Gazprom ຈ່າຍ​ຄ່າ​ຊົດ​ເຊີຍ ສຳລັບ​ບ້ວງ​ໃຊ້​ຈ່າຍ​ຜ່ານ​ແດນ ຊຶ່ງ​ບູນ​ກາ​ຣີ​ຈະ​ໄດ້​ຮັບ​ຕາມ​ສັນຍາ ຮອດ​ປີ 2030.

    ຣັດ​ເຊຍ​ໄດ້​ປະກາດ​ຢຸດຕິ​ໂຄງການ​ທໍ່​ສົ່ງ​ແກ​​ັສ “ສາຍ​ທິດໃຕ້” ມາ​ຕັ້ງແຕ່​ເດືອນ​ທັນວາ ປີ 2014 ຍ້ອນ​ທັດສະນະ​ຂາດ​ຄວາມ​ສ້າງສັນ​ຂອງ​ສະຫະພາບ (EU) ທັງ​ນີ້​ກໍ​ເພື່ອ​ເປັນ​ການ​ສຸມ​ໃສ່​ໂຄງການ “ສາຍ​ຕວກ​ກີ” ໂດຍ​ມີ​ທໍ່​ສົ່ງ​ແກ​​ັສ 2 ສາຍ ທີ່​ມີ​ກຳລັງ​ການ​ຜະລິດ 15,75 ຕື້​ແມັດ​ກ້ອນ/ສາຍ. ໃນ​ນັ້ນ​ທໍ່​ສົ່ງ​ສາຍ​ທີ​ໜຶ່ງ ໄດ້​ຮັບ​ການ​ອອກ​ແບບ​ເພື່ອ​ສະໜອງ​ແກ​​ັສ​ໃຫ້​ແກ່​ຕວກ​ກີ ແລະ ສາຍ​ທີ​ສອງ ຈະ​ສົ່ງ​ແກ​​ັສ​ໄປ​ຍັງ​ບັນດາ​ປະເທດ​ເອີ​ຣົບ​ໃຕ້ ແລະ​ ເອີ​ຣົບ​ຕາເວັນ​ອອກ​ສ່ຽງ​ໃຕ້ ທີ່​ຄາດ​ວ່າ​ຈະ​ເປີດ​ຕົວ ໃນ​ທ້າຍ​ປີ 2019.

ຂ່າວທີ່ກ່ຽວຂ້ອງ