ສ ອາ​ເມ​ຣິ​ກາ ປະກາດ​ຫ້າມ​ເຄື່ອນ​ໄຫວ​ເປັນ​ການ​ຊົ່ວຄາວ​ກັບ​ເຮືອບິນ Boeing 737 MAX

293 15 ມ.ນ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ປະກາດ​ຫ້າມ​ເຄື່ອນ​ໄຫວ​ເປັນ​ການ​ຊົ່ວຄາວ​ກັບ​ເຮືອບິນ Boeing 737 MAX

    ອົງການ​ຄຸ້ມ​ຄອງ​ການບິນ​ຂອງ ສ ອາ​ເມ​ຣິ​ກາ (FAA) ປະກາດ​ເມື່ອ​ວັນ​ທີ 13 ມີນາ​ນີ້ ເຖິງ​ການ​ຫ້າມ​ເຄື່ອນ​ໄຫວ​ເປັນ​ການ​ຊົ່ວຄາວ ກັບ​ເຮືອບິນ Boeing 737 MAX ຫຼັງ​ກໍລະນີ​ທີ່​ເຮືອບິນ ປະເພດ​ນີ້ ຂອງ​ບໍລິສັດ​ການບິນ Ethiopian Airlines ເກີດ​ອຸບັດເຫດ​ຕົກ ເມື່ອ​ຫຼາຍ​ວັນ​ທີ່​ຜ່ານ​ມາ ສົ່ງ​ຜົນ​ໃຫ້​ຜູ້ໂດຍສານ ແລະ​ຈຸ​ບິນ ລວມ 157 ຄົນ ເສຍ​ຊີວິດ​ທັງ​ໝົດ.

    ຖະແຫຼງການ​ຂອງ FAA ຊີ້​ແຈງ​ວ່າ: “ຄຳ​ສັ່ງ​ຫາມ​ຈະ​ມີ​ຜົນ​ບັງຄັບ​ໃຊ້ ໃນ​ຂະນະ​ທີ່​ລໍຖ້າ ຜົນ​ຂອງ​ການ​ສືບສວນ​ສອບ​ສວນ​ເພີ່ມ​ເຕີມ ອັນ​ປະກອບ​ດ້ວຍ​ການ​ກວດກາ​ຂໍ້​ມູນ​ຂ່າວສານ ທີ່​ນຳ​ມາ​ຈາກ​ຂໍ້​ມູນ​ຂອງ​ຖ້ຽວ​ບິນ ກໍ​ຄື​ການ​ບັນທຶກ​ສຽງ​ຢູ່​ໃນ​ຫ້ອງ​ຂັບ” ຈາກ​ອຸບັດເຫດ​ດັ່ງກ່າວ.

    FAA ຍັງ​ໃຫ້​ຮູ້​ວ່າ ຈະ​ຕ້ອງ​ໄດ້​ເສຍ​ເວລາ ”ຫຼາຍ​ເດືອນ” ໃນ​ການ​ສ້ອມແປງ​ຊອບ​ແວ ເພື່ອ​ໃຫ້​ເຮືອບິນ Boeing 737 MAX ສຳເລັດ​ຢ່າງ​ສົມບູນ​ແບບ.

    ຫຼັງ​ແຈ້ງ​ການ​ໃໝ່​ຫຼ້າ​ສຸດ​ຂອງ ສ ອາ​ເມ​ຣິ​ກາ ກາ​ນາ​ດາ ແລະ ຫຼາຍ​ປະເທດ​ໃນ​ເຂດ ຕາເວັນ​ອອກ​ກາງ​ນັ້ນ ຈຳນວນ​ປະເທດ​ທີ່​ງົດ​ໃຊ້ ຫຼື​ປິດ​ເຂດ​ທ້ອງຟ້າ​ກັບ Boeing 737 MAX ໄດ້​ຂຶ້ນ​ສູ່​ຕົວ​ເລກ​ເກືອບ 50 ແລ້ວ.

ຂ່າວທີ່ກ່ຽວຂ້ອງ